ក្រោយពីមានការរំខានពីអាជ្ញាធរ អង្គការអាដហុក នៅតែបន្តជួបប្រជុំជា
មួយអ្នកភូមិនៅឃុំប៉ាតាង
អាជ្ញាធរឃុំ ប៉ាតាង ក្នុងស្រុក លំផាត់ បានរារាំងមន្រ្តីអង្គការសង្គមស៊ីវិលនិងជនជាតិដើមភាគតិច មិនឲ្យធ្វើការជួបប្រជុំគ្នា ដើម្បីរៀនសូត្រ ពាក់ព័ន្ធទៅនឹងបញ្ហាសិទ្ធិមនុស្ស និងធនធានធម្មជាតិដែលកំពុងតែទទួលរងការរំលោភបំពាន និងបំផ្លិចបំផ្លាញយ៉ាងធ្ងន់ធ្ងរ។
លោក ឆាយ ធី មន្រ្តីសមាគមការពារសិទ្ធិមនុស្ស អាដហុក ប្រចាំខេត្ត រតនគិរី បានឲ្យដឹងកាលពីម្សិលមិញថា អាជ្ញាធរក្នុងឃុំ ប៉ាតាង ដែលរួមមាននាយប៉ុស្តិ៍ មេភូមិនិងកម្លាំងការពារសន្តិសុខភូមិចំនួន ៧ នាក់ បានរារាំងលោកមិនឲ្យជួបប្រជុំជាមួយនឹងជនជាតិដើមភាគតិចចំនួន ១៩ នាក់កាលពីព្រឹកថ្ងៃពុធម្សិលម៉្ងៃ។ លោកបញ្ជាក់ថា៖ «ជាការងារខ្ញុំដែលត្រូវចុះជួបប្រជុំនិងបង្រៀនប្រជាពលរដ្ឋ ពីបញ្ហាសិទ្ធិមនុស្ស សិទ្ធិតវ៉ា ដាក់ពាក្យបណ្តឹង និងការការពារធនធានធម្មជាតិ មានព្រៃឈើ និងរ៉ែ តែអាជ្ញាធរមូលដ្ឋាន បានទទួលបញ្ជាពីថ្នាក់លើមកហាមឃាត់»។
សកម្មជន សិទ្ធិមនុស្សដដែលនេះ ក៏បានឲ្យដឹងផងដែរថា នៅក្នុងតំបន់នោះជនជាតិភាគតិចកើតមានជម្លោះដីធ្លីជាមួយក្រុមហ៊ុន ឌីអឹម គ្រុប លើទំហំដី ២៦០ ហិកតា ក្នុងឆ្នាំ ២០០៥ ហើយខែ កក្កដា ឆ្នាំ ២០១២ អាជ្ញាធរមូលដ្ឋាន ក្នុងភូមិ និងឃុំ ប៉ាតាង ដែលរួមមានទាំងប៉ូលិសផងនោះធ្លាប់បានគំរាមកំហែង និងរារាំងមន្ត្រី អាដហុក លោក ប៉ែន ប៊ុណ្ណារ៍ (ដែលកាលនោះជាអ្នកសម្របសម្រួល) និងលោក ឈឹម សាវុធ មន្ត្រីមជ្ឈមណ្ឌលសិទ្ធិមនុស្សកម្ពុជា មិនឲ្យរៀបចំធ្វើវេទិកាសាធារណៈជាមួយនឹងប្រជាសហគមន៍។
លោកឲ្យដឹងទៀតថា៖ «កាលឆ្នាំនោះ អាជ្ញាធររារាំងបានសម្រេច ប៉ុន្តែកាលពីថ្ងៃពុធ ខ្ញុំជម្នះប្រជុំទាល់តែបានព្រោះខ្ញុំមិនបានធ្វើអ្វីខុសច្បាប់ទេ តែផ្ទុយទៅវិញ វាស្របនឹងរដ្ឋធម្មនុញ្ញ ហើយអង្គការខ្ញុំ ចុះបញ្ជីត្រឹមត្រូវ»។ មន្រ្តីអង្គការរូបនេះបានស្នើឲ្យអាជ្ញាធរចូលរួមប្រជុំជាមួយគ្នា ដើម្បីបានដឹងពីខ្លឹមសារនៃកិច្ចប្រជុំនោះកុំឲ្យមានការសង្ស័យថា អង្គការសង្គមស៊ីវិលដើរញុះញង់ប្រជាពលរដ្ឋ។
មេភូមិ ប៉ាតាង លោក ថេង មាំង បានឲ្យដឹងថា មន្ត្រីអង្គការ អាដហុក លោក ឆាយ ធី មិនបានជូនដំណឹងដល់អាជ្ញាធរទេនៅមុនពេលដែលបើកកិច្ចប្រជុំនោះ។
លោកមេភូមិបានបញ្ជាក់ថា៖ «រឿងប្រជុំពីសិទិ្ធមនុស្ស និងច្បាប់ផ្សេងៗនោះយើងមិនហាមឃាត់ទេ តែសូមឲ្យមានការផ្តល់ដំណឹងតាមទូរស័ព្ទឬលិខិតក៏បានដែរ។ យើងជាអ្នកគ្រប់គ្រងតែងតែសួរនាំអ៊ីចឹងហើយ ពេលមានការជួបជុំដោយមិនមានការជូនដំណឹងនោះ»។
ប្រជាសហគមន៍លោក ហ្យាយ ខាំណា អាយុ ៥០ ឆ្នាំ ដែលបានចូលរួមប្រជុំបានឲ្យដឹងថា អាជ្ញាធរពិតជាបានរារាំងបញ្ឈប់ការប្រជុំនោះមែន តែក្រោយពីការសម្របសម្រួលគ្នាក៏បានបន្តប្រជុំរហូតដល់ចប់។
លោកបន្តថា៖ «បន្ទាប់ពីការប្រជុំបែបនោះពួកយើងខ្ញុំមានការយល់ដឹងខ្លះៗពី ច្បាប់និងសិទ្ធិក្នុងនាមជាពលរដ្ឋ។ កម្រមានអ្នកមកបង្រៀនបែបនេះណាស់ ហើយចង់ឲ្យមានការបង្រៀនបែបនេះច្រើនទៀតទៅថ្ងៃខាងមុខ»៕
No comments:
Post a Comment
yes