អង្គការឃ្លាំមើលសិទ្ធិមនុស្សអន្តរជាតិ (Human Rights Watch) រិះគន់ថា រដ្ឋាភិបាលកម្ពុជាក្នុងការមិនផ្តល់ប្រាក់ខែដល់បុគ្គលិកសាលាក្តីខ្មែរក្រហម ដែលនេះជាការបន្ទុចបង្អាក់ដល់ការប្រឹងប្រែងក្នុងការស្វែងរកយុត្តិធម៌សម្រាប់អ្នកប្រជាជនខ្មែរ។
រហូតមកដល់ពេលនេះ បុគ្គលិកជាតិទាំងអស់នៃសាលាក្តីខ្មែរក្រហម មិនទាន់បានទទួលប្រាក់បៀវត្សរ៍ ៣ខែមកហើយ គឺចាប់ពីខែ មិថុនា រហូតដល់ខែសីហានេះ។ បុគ្គលិកសាលាក្តីជាង១០០នាក់ បានសម្រេចព្យួរការងារបណ្តោះអាសន្ន ចាប់ពីថ្ងៃទី ១ ខែកញ្ញានេះ រហូតដល់ទទួលបានប្រាក់ខែ ដែលខ្លួនមិនទាន់បានបើក។មន្ត្រីសាលាក្តីខ្មែរក្រហម លើកឡើងថា ការឈប់សម្រាកបណ្តោះអាសន្នរបស់បុគ្គលិកទាំងនោះ នឹងប៉ះ ពាល់ដល់ដំណើរការរបស់ប្រព័ន្ធតុលាការ បើទោះជាបុគ្គលិកអន្តរជាតិ នៅបន្តការងារក៏ដោយ។
សេចក្តីថ្លែងការណ៍របស់HRWចេញផ្សាយនៅថ្ងៃទី០៥ខែកញ្ញានេះ ឲ្យដឹងថា ម្ចាស់ជំនួយ និងអង្គការសហប្រជាជាតិ គួរតែទទូចឲ្យរដ្ឋាភិបាលកម្ពុជា បញ្ឈប់ការធ្វើពុតជាមិនមានលុយ ក្នុងការផ្តល់ ទៅសាលាក្តី ដែលនេះមិនបង្ហាញពីការទទួលខុសត្រូវលើពលរដ្ឋរាប់លាននាក់ ដែលរងគ្រោះ។ អង្គការអន្តរជាតិមួយនេះ លើកឡើងថា រដ្ឋាភិបាល មានថវិកាច្រើនក្នុងការផ្តល់ទៅឲ្យកងទ័ព និងការទិញសន្លឹកឆ្នោត តែបដិសេធទៅលើការផ្តល់ថវិកាទៅសាលាក្តីខ្មែរក្រហម។
នាយកប្រចាំតំបន់របស់អង្គការឃ្លាំមើលសិទ្ធិមនុស្សអន្តរជាតិលោក ប្រេដ អាដាម (Brad Adams) មានប្រសាសន៍ថា ម្ចាស់ជំនួយ គួរតែនិយាយពីការចូលរួមចំណែកជាថវិការបស់រដ្ឋាភិបាល ក្នុងការដំណើរការសាលាក្តីខ្មែរក្រហម។
សេចក្តីថ្លែងការណ៍បន្តថា លោកនាយករដ្ឋមន្ត្រីហ៊ុន សែន បានរារាំងមិនឲ្យមានដំណើរការលឿន នៃសាលាក្តីខ្មែរក្រហម ដូចជាការកំណត់ជនជាប់ចោទជាដើម។
លោក ឯក ថា អ្នកនាំពាក្យអង្គភាពព័ត៌មាន និងប្រតិកម្មរហ័សនៃទីស្តីការគណៈរដ្ឋមន្ត្រី បដិសេធអត្ថាធិប្បាយលើករណីនេះ។
អ្នកនាំពាក្យសាលាក្តីខ្មែរក្រហម លោក នេត្រ ភត្ត្រា មានប្រសាសន៍ថា រហូតមកដល់ពេលនេះ បុគ្គលិកដល់ទៅ២៥០នាក់ហើយ បានផ្អាកពីការងារ ដោយសារមិនបានបើកប្រាក់ខែ។
កាលពីថ្ងៃពុធ ម្សិលមិញ ស្ថានទូតជប៉ុន បានបដិសេធទៅនឹងការលើកឡើងរបស់លោក ឯក ថា ថាជប៉ុន បានយល់ព្រមផ្តល់ថវិការដល់សាលាក្តីខ្មែរក្រហម។
ថ្មីៗនេះ អគ្គលេខាធិការអង្គការសហប្រជាជាតិ លោក បាន គីមូន បានអំពាវនាវទៅកាន់សហគមន៍អន្តរជាតិ បន្តផ្តល់ជំនួយបន្ថែមទៀតមកសាលាក្តីខ្មែរក្រហម ដើម្បីបន្តដំណើរការរកយុត្តិធម៌ជូនប្រជាជនកម្ពុជា។ ការអំពាវនាវនេះ ស្របពេលដែលសាលាក្តីមួយនេះ កំពុងជួបប្រទះវិបត្តិថវិកា៕
No comments:
Post a Comment
yes