សមាជមហាជនដែលរៀបចំដោយគណបក្សសង្គ្រោះជាតិ កាលពីថ្ងៃអាទិត្យម្សិលមិញ ទាមទារឲ្យរាជរដ្ឋាភិបាលផ្តល់អាជ្ញាប័ណ្ណវិទ្យុ ទូរទស្សន៍ ដើម្បីផ្តល់ព័ត៌មានគ្រប់ជ្រុងជោយ និង តម្លាភាពព្រមទាំងមានគុណប្រយោជន៍ដល់សាធារណជន។
ការទាមទារនេះ ធ្វើឡើងនៅក្នុងសមាជមហាជនរបស់គណបក្ស នៅទីលានប្រជាធិបតេយ្យ រាជធានីភ្នំពេញ ដោយមានអ្នកចូលរួមជិតមួយម៉ឺននាក់ មានទាំងព្រះសង្ឃ កម្មកររោងចក្រ កសិករ អាជីវករ និងមន្ត្រីរាជការជាដើម។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ ប្រាប់VOD នៅព្រឹកថ្ងៃចន្ទ ទី០៧ ខែតុលា នេះថា បច្ចុប្បន្នប្រព័ន្ធផ្សព្វផ្សាយក្នុងស្រុកដូចជា ទូរទស្សន៍ និងវិទ្យុមួយចំនួនមាននិន្នាការទៅរកគណបក្សកាន់អំណាច ដែលមិនឈរលើគោលការណ៍ឯករាជ្យ។ លោក បន្តថា ដូច្នេះ គណបក្សសង្គ្រោះជាតិ ទាមទារឲ្យរដ្ឋាភិបាលផ្តល់អាជ្ញាប័ណ្ណទូរទស្សន៍ និងវិទ្យុ ក្នុងការផ្តល់ព័ត៌មានពិតដល់សាធារណជន។ លោក យល់ថា ការផ្សាយព័ត៌មានពិតមានសារៈសំខាន់ណាស់ ជាពិសេសអាចនាំឲ្យប្រជាពលរដ្ឋ យល់ដឹង ហើយអាចជ្រើសរើសអ្នកដឹកនាំបានត្រឹមត្រូវដែលខ្លួនពេញចិត្ត ៖ "ដើម្បីឲ្យប្រជាពលរដ្ឋហ្នឹង ចូលរួមក្នុងកិច្ចការនយោបាយ ដើម្បីឲ្យប្រជាពលរដ្ឋលោក មានចំណេះដឹងលើគ្រប់វិស័យទាំងអស់នៅក្នុងការធ្វើសេចក្ដីសម្រេចលើជោគវាសនាប្រទេសជាតិ ចំពោះប្រជាពលរដ្ឋម្នាក់ៗ អ្នកបោះឆ្នោតម្នាក់ៗ គាត់ទទួលខុសត្រូវទៅលើជោគវាសនាប្រទេសជាតិ មិនមែនមានតែមេដឹកនាំម្នាក់ពីរនាក់ទេ តាមរយៈការដែលគាត់យល់ដឹងគាត់មានព័ត៌មាន គាត់អាចជ្រើសរើសបានមេដឹកនាំល្អ តាមឆន្ទៈរបស់គាត់តាមអ្វីដែលគាត់មើលឃើញថា ជាមេដឹកនាំដែលបម្រើផលប្រយោជន៍ប្រទេសជាតិ ដល់ប្រជាពលរដ្ឋពិតប្រាកដ" ។
អ្នកនាំពាក្យរដ្ឋាភិបាល និងជារដ្ឋមន្ដ្រីក្រសួងព័ត៌មាន លោក ខៀវ កាញារីទ្ធ ប្រាប់ VOD តាមរយៈអ៊ីម៉ែលថា តាំងពីដើមមក ក្រសួងមិនដែលផ្តល់អាជ្ញាប័ណ្ណវិទ្យុ និងទូរទស្សន៍ សំរាប់គណបក្សនយោបាយទេ។
ចំណែក អគ្គនាយកទូរទស្សន៍ជាតិកម្ពុជា លោក កឹម គុណវឌ្ឍន៍ មិនខ្វល់នឹងការលើកឡើងថា ទូរទស្សន៍ក្នុងស្រុកមិនឯករាជ្យអីនោះទេ តែលោកអះអាងថា បច្ចុប្បន្នទូរទស្សន៍ជាតិកម្ពុជា មិនបានឃោសនាបម្រើឲ្យគណបក្សណានោះទេ ៖ "សម្រាប់ខ្ញុំ ខ្ញុំគិតថា ជាសិទ្ធិរបស់គាត់ដែលលើកឡើង សម្រាប់ខ្ញុំ ខ្ញុំបម្រើរបុព្វហេតុរបស់រដ្ឋ បាទរបស់ជាតិ របស់ព្រះមហាក្សត្រ" ។
កន្លងមក ប្រព័ន្ធផ្សព្វផ្សាយនៅកម្ពុជា រងការរិះគន់ថា ស្ថិតនៅក្រោមឥទ្ធិពលនយោបាយគណបក្សកំពុងដឹកនាំរដ្ឋាភិបាល ជាពិសេសវិទ្យុ និងទូរទស្សន៍។
អង្គការចំនួន៤០នៃបន្ទប់ស្ថានការណ៍ក្នុងថ្ងៃបោះឆ្នោត រកឃើញថា ប្រព័ន្ធផ្សព្វផ្សាយជាពិសេស ទូរទស្សន៍ និងវិទ្យុ មានភាពលម្អៀងខ្លាំងបំផុតទៅកាន់គណបក្សប្រជាជនកម្ពុជា និងបានបំពេញតួនាទីមួយមួយកាន់តែអាក្រក់ទៅ សម្រាប់ការបោះឆ្នោតនៅកម្ពុជា។ អង្គការទាំងនេះ ជំរុញឲ្យមានកំណែទម្រង់ប្រព័ន្ធផ្សព្វផ្សាយគោរពតាមគោលការណ៍សមធម៌ និងមានភាពសេរី ដើម្បីឲ្យការបោះឆ្នោតក្រោយៗទៀត មានភាពសេរី និងយុត្តិធម៌។
ចំណែកមជ្ឈមណ្ឌលសិទ្ធិមនុស្សកម្ពុជា (CCHR) បានដាក់អនុសាសន៍ទៅរដ្ឋាភិបាលកម្ពុជាអាណត្តិថ្មី ក្នុងការបង្កើតប្រព័ន្ធផ្សព្វផ្សាយជាតិឯករាជ្យមួយ ដើម្បីធានាថា ពលរដ្ឋទទួលបានព័ត៌មានពិតប្រាកដ និងធានាការបោះឆ្នោតប្រព្រឹត្តទៅដោយសេរី និងយុត្តិធម៌។ មជ្ឈមណ្ឌលសិទ្ធិមនុស្សកម្ពុជា លើកឡើងថា ខ្លួនគាំទ្រនូវការបង្កើតប្រព័ន្ធផ្សព្វផ្សាយព័ត៌មានជាតិឯករាជ្យមួយ ដោយលុបចោលច្បាប់ណាដែលមានលក្ខណៈរឹតបន្តឹងទៅលើខ្លឹមសារ និងបង្កើតស្ថាប័នគ្រប់គ្រងការចាក់ផ្សាយឯករាជ្យមួយ ទទួលខុសត្រូវចំពោះការចេញអាជ្ញាប័ណ្ណ និងធានាឲ្យបានថា ស្ថានីយផ្សព្វផ្សាយព័ត៌មាននោះ បំពេញការងារដោយសេរី៕
No comments:
Post a Comment
yes