ប្រជាពលរដ្ឋរស់នៅភូមិតាង៉ែន ក្បែរអាងកំពីងពួយ ប្រមាណជិត ៨០០ ខ្នងផ្ទះ ត្រូវបានអាជ្ញាធរប្រកាសអាសន្នជម្លៀសចេញពីលំនៅដ្ឋាន ដើម្បីទៅរកទីទួលសុវត្ថិភាព កាលពីព្រឹកថ្ងៃទី៨ ខែតុលា ឆ្នាំ២០១៣ បន្ទាប់ពីទឹកជំនន់ ក្នុងអាងកំពីងពួយ ឡើងហៀរចេញលើខ្នងទំនប់ និងប្រេះ ២ កន្លែង។
លោក វ៉ាន់ សាវ៉ុន មេភូមិតាង៉ែន បានឲ្យដឹងថា អាងកំពីពួយ ស្ថិតក្នុងភូមិតាង៉ែន ឃុំតាគ្រាម ស្រុកបាណន់ ខេត្តបាត់ដំបង។ ទឹកជំនន់ក្នុងអាងកំពីពួយ បានឡើងតាំងពីម៉ោង ១២ យប់ថ្ងៃទី៧ ខែតុលា ឆ្នាំ២០១៣។ នៅវេលាម៉ោង ៤ ជិតភ្លឺថ្ងៃទី៨ ខែតុលា ទឹកជំនន់បានឡើងពេញហៀរលើខ្នងទំនប់ (ខាងកើតសំណង់ទីមួយ)។ ពេលនោះអាជ្ញាធរបានប្រកាសអាសន្ន និងជម្លៀសប្រជាពលរដ្ឋដែលមានផ្ទះរស់នៅក្នុងភូមិតាង៉ែន ក្បែរអាងកំពីងពួយមានចំនួន ៧៧១ ខ្នងផ្ទះ (ស្មើ ៧៧១ គ្រួសារ ឬមនុស្សចំនួន ៣៣៦២ នាក់) ចេញពីលំនៅដ្ឋាន ដើម្បីទីរកទីទួលសុវត្ថិភាពភ្លាមៗដែរ។
លោកបានបន្តថា ទឹកជំនន់ដែលឡើងក្នុងអាងកំពីងពួយ គឺមូលហេតុមកពីបាក់ទំនប់ប៉ង់ នៅពីទិសខាងលិច និងខាងត្បូង ស្ថិតក្នុងភូមិបឹងក្រសាល និងភូមិតាង៉ែនដែរ (ជាប់ព្រំប្រទល់គ្នា) ហើយទឹកហូរចូលមកក្នុងអាងកំពីងពួយ ទាំងទឹកស្ទឹងមកពីប៉ៃលិន មកពីសាលាក្រៅផងដែរ។
នៅព្រឹកថ្ងៃទី៨ ខែតុលា ឆ្នាំ២០១៣នោះ គេឃើញសមត្ថកិច្ចកងកម្លាំងប្រដាប់អាវុធជាច្រើនរយនាក់ ចុះទៅជួយអន្តរាគមន៍ និងជួយសង្គ្រោះប្រជាពលរដ្ឋ ដឹកជញ្ជូនចេញពីលំនៅដ្ឋានដើម្បីទៅរកទីទួលសុវត្ថិភាព ខ្លះមានមធ្យោបាយដូចជា គោយន្តកន្ត្រៃ ឬឡានតូច-ធំ បានរើឥវ៉ាន់ដឹកដោយខ្លួនឯងផងដែរ៕
No comments:
Post a Comment
yes