ឯកអគ្គរដ្ឋទូតសហរដ្ឋអាមេរិកប្រចាំកម្ពុជា លោក វីល្លៀម ថត (William Todd) ថ្លែងទៅកាន់អ្នកយកព័ត៌មាន នាស្ថានទូតសហរដ្ឋអាមេរិក កាលពីថ្ងៃទី១៣ សីហា ឆ្នាំ២០១៣
ឯកអគ្គរដ្ឋទូតសហរដ្ឋអាមេរិក ប្រចាំកម្ពុជា លោក វីល្លៀម ថត (William E. Todd) ចេញសេចក្ដីថ្លែងការណ៍ថា នៅមានការងារត្រូវធ្វើជាច្រើនទៀតក្នុងការធានាថា ប្រជាជនទាំងអស់មានសេរីភាពដូចបានចែងក្នុងឯកសារដ៏សំខាន់នៃសិទ្ធិមនុស្ស ទោះជាមានសិទ្ធិសេរីភាពជាមូលដ្ឋាននៅជុំវិញពិភពលោក មានការរីកចម្រើនខ្លាំង និងបានប្រសើរក្ដី។
លោក វីល្លៀម ថត បន្តថា នៅកម្ពុជា ពុំមានអាទិភាពណាសំខាន់សម្រាប់សហរដ្ឋអាមេរិក ជាងការលើកកម្ពស់ការគោរពសិទ្ធិមនុស្ស និងលទ្ធិប្រជាធិបតេយ្យឡើយ។ សកម្មភាពដំបូងរបស់លោកក្នុងចំណោមការងារជាច្រើន គឺលោកបង្កើតក្រុមប្រឹក្សាពិគ្រោះយោបល់ (NGO Advisory Council) ជាមួយតំណាងមកពីអង្គការសង្គមស៊ីវិល និងសិទ្ធិមនុស្សនានានៅកម្ពុជា ដូចជា អង្គការអាដហុក (Adhoc) លីកាដូ (Licadho) មជ្ឈមណ្ឌលសិទ្ធិមនុស្សកម្ពុជា (CCHR) គណៈកម្មាធិការប្រតិបត្តិការសម្រាប់កម្ពុជា វេទិកាអង្គការមិនមែនរដ្ឋាភិបាលស្ដីពីកម្ពុជា អង្គការសហព័ន្ធពលកម្មកម្ពុជា គណៈកម្មាធិការត្រួតពិនិត្យការបោះឆ្នោតដោយសេរី និងត្រឹមត្រូវ អង្គការ សីលការ (SILAKA) អង្គការអុកស្វាម (Oxfam) វិទ្យាស្ថានជាតិប្រជាធិបតេយ្យ វិទ្យាស្ថានសាធារណរដ្ឋ និងអង្គការឃ្លាំមើលសិទ្ធិមនុស្ស។
ក្នុងឱកាសអបអរទិវាសិទ្ធិមនុស្សអន្តរជាតិនៅឆ្នាំនេះ លោក វីល្លៀម ថត វាយតម្លៃភាពក្លាហានរបស់អង្គការសង្គមស៊ីវិលនៅកម្ពុជា ទាំងជាតិ និងអន្តរជាតិ ដែលធ្វើការដើម្បីធ្វើឱ្យប្រសើរឡើងនូវសេចក្ដីថ្លៃថ្នូររបស់មនុស្សជាតិ និងប្រកាន់ខ្ជាប់ទស្សនៈសេរីភាព ភាពស្មើគ្នា និងយុត្តិធម៌ នៅក្រោមច្បាប់ទាំងអស់គ្នា។ លោកថា គួរឱ្យសរសើររាជរដ្ឋាភិបាលកម្ពុជា ដែលតាំងចិត្តការពារសិទ្ធិមនុស្សដល់ពលរដ្ឋខ្លួន តាមរយៈសន្ធិសញ្ញាអន្តរជាតិ។ ការធ្វើយុទ្ធនាការ និងបោះឆ្នោតដ៏សកម្ម និងដោយសន្តិភាព ពេលកន្លងទៅថ្មីៗនេះ បានបង្ហាញពីភាពប្រសើរក្នុងការគោរពសិទ្ធិស៊ីវិល។
ទោះជាយ៉ាងនេះក្ដី កម្ពុជា នៅប្រឈមក្នុងបញ្ហាជម្លោះដីធ្លី និងការបណ្ដេញពលរដ្ឋចេញពីផ្ទះសម្បែង អំពើពុករលួយ និងការរត់ពន្ធមនុស្ស។ លោក វីល្លៀម ថត ជឿថា រាជរដ្ឋាភិបាលនឹងអាចធ្វើឱ្យរីកចម្រើនចំពោះបញ្ហាស្មុគស្មាញពិបាកដោះស្រាយ ដោយធ្វើជាដៃគូជាមួយសង្គមស៊ីវិល ស្វែងរកដំណោះស្រាយ ដើម្បីបម្រើប្រយោជន៍ជាធំ។
សហរដ្ឋអាមេរិក តាំងចិត្តមុតមាំក្នុងការសម្រេចបានជោគជ័យនូវការការពារសិទ្ធិមនុស្ស ដែលមានចែងក្នុងសេចក្ដីប្រកាសជាសកលស្ដីពីសិទ្ធិមនុស្ស។ ការតាំងចិត្តនេះ បានជំរុញដោយគុណតម្លៃការបង្កើតសហរដ្ឋអាមេរិក និងជឿថា សន្តិភាពអន្តរជាតិ សន្តិសុខ និងវិបុលសុខ ត្រូវបានពង្រឹងពេលដែលប្រទេសនានាគោរព និងការពារសិទ្ធិមនុស្ស និងសេរីភាពជាមូលដ្ឋាន។ ប្រធានាធិបតីសហរដ្ឋអាមេរិក លោក បារ៉ាក់ អូបាម៉ា (Barack Obama) ពង្រឹងការតាំងចិត្តនេះតាមរយៈសន្ទរកថា ថា៖ «នៅពេលសហរដ្ឋអាមេរិក ក្រោកឈរដើម្បីសិទ្ធិមនុស្ស តាមរយៈកិច្ចខិតខំប្រឹងប្រែងនៅក្នុង និងក្រៅប្រទេស យើងចូលរួមជាមួយបុរស ស្ត្រីជុំវិញពិភពលោក ដើម្បីតស៊ូសម្រាប់សិទ្ធិក្នុងការបញ្ចេញទស្សនៈ ក្នុងការជ្រើសរើសអ្នកដឹកនាំរបស់គេ និងក្នុងការទទួលបានសេចក្ដីថ្លៃថ្នូរ និងការគោរព។ យើងក៏ពង្រឹងសន្តិសុខ និងសុខុមាលភាពរបស់យើង ពីព្រោះការរំលោភសិទ្ធិមនុស្ស អាចផ្ដល់គ្រោះថ្នាក់ជាច្រើនលើពិភពលោក ដែលយើងកំពុងប្រឈម រាប់ទាំងជម្លោះប្រដាប់អាវុធ និងវិបត្តិមនុស្សធម៌ អំពើពុករលួយ និងការរាលដាលមនោគមវិជ្ជា ដែលនាំទៅរកការស្អប់ និងអំពើហិង្សា។ ដូច្នេះ នៅក្នុងឱកាសនៃទិវាសិទ្ធិមនុស្ស យើងសូមឧទ្ទិសសាជាថ្មីទៀត ចំពោះខ្លួនយើង ដល់ការធ្វើឱ្យការគោរពសិទ្ធិមនុស្ស និងសេរីភាពប្រសើរឡើង សម្រាប់មនុស្សគ្រប់រូប និងសន្យាប្រកាន់យកឧត្ដមគតិ ដែលយើងលើកកម្ពស់ពិភពលោក»៕
No comments:
Post a Comment
yes