លោក សម រង្ស៊ី កំពុងនិយាយទៅកាន់ប្រជាពលរដ្ឋ ក្នុងទី
លានប្រជាធិបតេយ្យ ក្នុងថ្ងៃទិវាសិទ្ធមនុស្សអន្តរជាតិ១០ធ្នូ
ដូចការគ្រោងទុក គណបក្សសង្គ្រោះជាតិ បានប្រារព្ធទិវាសិទ្ធិមនុស្ស ថ្ងៃ១០ធ្នូ នាព្រឹកមិញ នៅទីលានប្រជាធិបតេយ្យ ក្នុងរាជធានីភ្នំពេញ។ ប៉ុន្តែមុននឹងជួបជុំ ថ្លែងការណ៍នៅទីលានប្រជាធិបតេយ្យ លោកសមរង្ស៊ី លោក កឹមសុខា រួមទាំងលោកស្រី មូរ សុខហួរ បានដឹកនាំក្បួនដង្ហែ ថ្មើរជើងបីកន្លែងផ្សេងៗគ្នា ពីទីស្នាក់ការគណបក្សសង្គ្រោះជាតិ នៅចាក់អង្រែ ពីស្នាក់ការបក្សនៅទួលគោក និងពីមុខឃ្លាំងសាំងឫស្សីកែវ។ ក្បួនសិទ្ធិមនុស្ស របស់គណបក្សសង្គ្រោះជាតិ ក្រោមប្រធានបទ «យើងទាំងអស់គ្នា ទាមទារសិទ្ធិពេញលេញ ដើម្បីជ្រើសរើសអ្នកដឹកនាំ មិនមានបញ្ហាអ្វីកើតឡើងទេ»។
សកម្មជនគណបក្សសង្គ្រោះជាតិរាប់រយនាក់ មកពីច្រើនខេត្ត រួមទាំងអ្នកនៅភ្នំពេញ បានជួបជុំដើរហែក្បួន នៅព្រឹកព្រលឹមថ្ងៃអង្គារ ទី១០ធ្នូនេះ ពីទីស្នាក់ការគណបក្សនៅចាក់អង្រែ ដឹកនាំដោយលោក សមរង្ស៊ី ពីទីស្នាក់ការគណបក្សសង្គ្រោះជាតិ នៅអូរបែកក្អម ទួលគោក ដឹកនាំដោយលោក កឹម សុខា និងពីមុខឃ្លាំងសាំង ឫស្សីកែវ ដឹកនាំដោយលោកស្រី មូរ សុខហួរ ដើរទៅកាន់ទីលានប្រជាធិបតេយ្យ ដែលគណបក្សសង្គ្រោះជាតិ ជួបជុំប្រារព្ធទិវាសិទ្ធិមនុស្សអន្តរជាតិ ថ្ងៃ១០ធ្នូ។
ទិវាសិទ្ធិមនុស្ស របស់គណបក្សសង្គ្រោះជាតិ ធ្វើឡើង ក្រោមប្រធានបទ «យើងទាំងអស់គ្នា ទាមទារសិទ្ធិពេញលេញដើម្បីជ្រើសរើសអ្នកដឹកនាំ»។ ជាប្រធានបទ ដែលទាំងលោកកឹមសុខា និងទាំងលោកសមរង្ស៊ី បានថ្លែងការណ៍ទៅកាន់អ្នកគាំទ្រ ដោយទាមទាររកយុត្តិធម៌សម្រាប់ការបោះឆ្នោតកន្លងមក។ វេទិកាសិទ្ធិមនុស្សរបស់គណបក្សសង្គ្រោះជាតិ នៅព្រឹកមិញ អ្នកចូលរួម ក៏បានថ្លែងទាមទារការផ្លាស់ប្តូរនាយករដ្ឋមន្ត្រីផងដែរ។
វីរៈភាពរបស់លោក Nelson Mandela អតីតប្រធានាធិបតីអាហ្វ្រិកខាងត្បូង ដែលទើបតែចូលមរណភាពកាលពីថ្ងៃទី៥ធ្នូ ហើយជាអ្នកតស៊ូប្រឆាំងនឹងការរើសអើងជាតិសាសន៍ តាមរយៈនយោបាយអហិង្សា និងមិនចាត់ទុកជនណាម្នាក់ ជាសត្រូវ ក៏ត្រូវបានលោក សមរង្ស៊ី លើកបង្ហាញដល់សកម្មជនអ្នកគាំទ្រ។
តាមលោកសមរង្ស៊ី គណបក្សសង្គ្រោះជាតិ ដើរតាមគន្លងរបស់លោក Nelson Mandela ដើម្បីឲ្យកម្ពុជា ទទួលបានលទ្ធិប្រជាធិបតេយ្យ ប្រកបដោយភាតរភាព ដូចលោក Nelson Mandela នៅអាហ្វ្រិកខាងត្បូងដែរ។
ក្នុងវេទិកា លោកសមរង្ស៊ី និងលោកកឹមសុខា មិនបានគៀងគរ ឲ្យអ្នកគាំទ្រ មកចូលរួមបាតុកម្ម នៅថ្ងៃអាទិត្យ ទី១៥ធ្នូ ចុងអាទិត្យនេះឡើយ។
នៅពេលរសៀល លោកសមរង្ស៊ី និងលោក កឹមសុខា ត្រូវដឹកនាំការជួបជុំ ប្រារព្ធទិវាសិទ្ធិមនុស្ស នៅទីរួមខេត្តសៀមរាប៕
No comments:
Post a Comment
yes