ស្ថានទូតអាមេរិកប្រចាំកម្ពុជា នៅថ្ងៃអង្គារនេះ ប្រកាសថា ខ្លួនចង់ឃើញកម្ពុជា លុបបំបាត់នូវភាពមិនល្អទាក់ទងនឹងបញ្ហារំលោភសិទ្ធិមនុស្ស ដែលក្នុងនោះ មានការបញ្ចប់បញ្ហាជម្លោះដីធ្លី ការបណ្តេញចេញ អំពើពុករលួយ និងការរត់ពន្ធមនុស្ស។
សេចក្តីថ្លែងការណ៍របស់លោក ឯកអគ្គរដ្ឋទូតសហរដ្ឋអាមេរិក លោក William Todd ចេញផ្សាយសម្រាប់ឱកាសនៃទិវាសិទ្ធិមនុស្ស ១០ធ្នូ ឆ្នាំ២០១៣ ឲ្យដឹងថា រាជរដ្ឋាភិបាលកម្ពុជា បានតាំងចិត្តក្នុងការការពារសិទ្ធិមនុស្សដល់ពលរដ្ឋរបស់ខ្លួនតាមរយៈសន្ធិសញ្ញាអន្តរជាតិជាច្រើន ដែលនេះជាការគួអោយកោតសរសើរ។ លោកបន្តថា ការប្រព្រឹត្តិទៅនៃយុទ្ធនាការ និងការបោះឆ្នោតដ៏សកម្មនិងដោយសន្តិភាព ក្នុងអំឡុងពេលនៃការបោះឆ្នោតជាតិកាលពីថ្ងៃទី២៨ខែកក្កដា បានបង្ហាញពីភាពប្រសើរនៅក្នុងការគោរពសិទ្ធិស៊ីវិល។
តែលោក William Todd ថ្លែងថា ប្រទេសកម្ពុជានៅតែមាន ការប្រឈមនៅក្នុងបញ្ហាជម្លោះដីធ្លី និងការបណ្តេញប្រជាជនចេញពីផ្ទះសម្បែង អំពើពុករលួយនិង ការរត់ពន្ធមនុស្ស។លោកថា លោកមានជំនឿថារាជរដ្ឋាភិបាលកម្ពុជា នឹងអាចធ្វើឲ្យមានការរីកចម្រើនជាសំខាន់ចំពោះបញ្ហាដែលមានលក្ខណៈស្មុគស្មាញពិបាកដោះស្រាយរបស់ខ្លួន ដោយធ្វើដៃគូជាមួយសង្គម ស៊ីវិលក្នុងការស្វែងរកដំណោះស្រាយដើម្បីបម្រើផលប្រយោជន៍ប្រជាជនជាធំ។
សេចក្តីថ្លែងការណ៍បន្តថា សហរដ្ឋអាមេរិកធ្វើការតាំងចិត្តយ៉ាងមុតមាំ ក្នុងការសម្រេចបានជោគជ័យនូវការគោរពសិទ្ធិមនុស្ស ដែលមានចែងនៅក្នុងសេចក្តីប្រកាសជាសកលស្តីពីសិទ្ធិមនុស្ស។សេចក្តីថ្លែងការណ៍ឲ្យដឹងទៀតថា នៅក្នុងប្រទេសកម្ពុជា ពុំមានអាទិភាពណាសំខាន់សម្រាប់សហរដ្ឋអាមេរិកជាងការលើកកម្ពស់ ការគោរពសិទ្ធិមនុស្សនិងគោលការណ៍នៃលទ្ធិប្រជាធិបតេយ្យនោះឡើយ។
អ្នកនាំពាក្យទីស្តីការគណៈរដ្ឋមន្ត្រី លោក ផៃ ស៊ីផាន មានប្រសាសន៍ថា រាជរដ្ឋាភិបាលនឹងធ្វើដូចការសំណូមពររបស់សហរដ្ឋអាមេរិក ហើយរដ្ឋាភិបាលកម្ពុជាមិនដែលភ្លេចទេនូវគោលការណ៍គោរពសិទ្ធិមនុស្ស។ លោកបន្តថា រយៈពេលប៉ុន្មានឆ្នាំចុងក្រោយនេះ ការគោរពសិទ្ធិមនុស្សនៅកម្ពុជា មានភាពប្រសើរឡើងច្រើន។ លោកបញ្ជាក់ថា៖«រដ្ឋាភិបាលបានប្តេជ្ញាថាធ្វើអ្វីៗដែលគេបានលើកឡើងហ្នឹង រឹតឲ្យបានប្រសើរប្រកបដោយគុណភាព ហើយរដ្ឋាភិបាលធ្វើជាមួយនឹងគោលការណ៍ ទន្ទឹមនឹងគោលការណ៍យើងមានច្បាប់ ដើម្បីឲ្យការប្រតិបត្តិច្បាប់ អីហ្នឹងការអនុវត្តច្បាប់ហ្នឹងបានប្រសើរ គឺប្រជាពលរដ្ឋទាំងអស់គ្នាហ្នឹង ត្រូវស្ថិតនៅក្នុងការដឹងការយល់និងការចូលរួមចំណែកទាំងប្រតិបត្តិ និងការអនុវត្តច្បាប់នេះឯង»។
នៅថ្ងៃអង្គារនេះ គណបក្សប្រជាជនកម្ពុជា បានអំពាវនាវដល់ គ្រប់គណបក្សនយោបាយ សង្គមស៊ីវិល និងប្រជាពលរដ្ឋទាំងអស់ បន្តរួមគ្នាការពារ សិទ្ធិមនុស្ស និងលទ្ធិប្រជាធិតេយ្យនៅកម្ពុជា ដោយគោរពច្បាប់ ដើម្បីធានានូវសន្តិភាព និងការអភិវឌ្ឍប្រទេស។គណបក្សកាន់អំណាចបន្តថា គណបក្ស បានឈ្នះការបោះឆ្នោតក្នុងអាណត្តិទី៥នេះ ដោយសេរីនិងត្រឹមត្រូវ ដែលឆ្លុះបញ្ចាំងពីភាពកាន់តែរឹងមាំនៃដំណើរការអនុវត្តសិទ្ធិមនុស្ស កម្ពុជា។ គណបក្សកាន់អំណាច លើកឡើងថា ខ្លួនកំពុងបន្តអនុវត្តនូវគោលការណ៍ការពារ និងលើកស្ទួយសិទ្ធិប្រជាពលរដ្ឋដូចមានចែងនៅក្នុងរដ្ឋធម្មនុញ្ញនៃ កម្ពុជា និងសេចក្តីថ្លែងការណ៍ជាសកលរបស់អង្គការសហប្រជាជាតិ ដូចជា សិទ្ធិមានជីវិតរស់នៅ សិទ្ធិប្រកបរបរចិញ្ចឹមជីវិត សិទ្ធិធ្វើនយោបាយ សិទ្ធិបញ្ចេញមតិ សេរីភាពសារព័ត៌មាន និងសិទ្ធិបង្កើតសហជីពជាដើម។ ប្រជាពលរដ្ឋទាំងអស់ទទួលបាន ផលប្រយោជន៍ដូចជាតម្លៃសារធារណ: ដោយសមធម៌៕
No comments:
Post a Comment
yes