ក្រុមសមត្ថកិច្ចពេលប្រឈមមុខជាមួយក្រុមយុវជនមួយក្រុមនៅជិត
វត្តឧណ្ណាលោម នៅរសៀលថ្ងៃទី១៥ កញ្ញា ឆ្នាំ២០១៣
អង្គការសិទ្ធិមនុស្សអន្តរជាតិមួយដែលមានមូលដ្ឋាននៅសហរដ្ឋអាមេរិក បានចាត់ថ្នាក់ប្រទេសកម្ពុជា ថាជាប្រទេសមួយដែលគ្មានសេរីភាព។ ចំណាត់ថ្នាក់នេះ បង្ហាញឲ្យឃើញថា ការអនុវត្តសិទ្ធិនយោបាយ និងសេរីភាពពលរដ្ឋនៅកម្ពុជា ពុំមានការប្រែប្រួលអ្វីឡើយក្នុងរយៈពេលជិត ២០ឆ្នាំចុងក្រោយនេះ។
អង្គការសិទ្ធិមនុស្សអន្តរជាតិឈ្មោះ ហ្វី្រដមហោស៍ (Freedom House) បានបញ្ចេញរបាយការណ៍កាលពីពេលថ្មីៗនេះ បង្ហាញថា កម្ពុជា ជាប្រទេសដែលមិនមានសេរីភាព។ របាយការណ៍ដែលមានឈ្មោះថា សេរីភាពលើពិភពលោកឆ្នាំ២០១៤ (Freedom in the World 2014) បានសិក្សាទៅលើប្រទេសទាំងអស់ចំនួន១៩៦ លើពិភពលោកក្នុងឆ្នាំ២០១៣ ដោយផ្ដោតជាពិសេសទៅលើសិទ្ធិនយោបាយ និងសេរីភាពពលរដ្ឋ។
របាយការណ៍ប្រើលេខពី ១ ដល់ ៧ ដើម្បីធ្វើចំណាត់ថ្នាក់។ សម្រាប់ប្រទេសដែលទទួលបានលេខ១ មានន័យថា ជាប្រទេសដែលបានអនុវត្តពេញលេញនូវសិទ្ធិនយោបាយ និងសេរីភាពពលរដ្ឋ ខណៈប្រទេសទទួលបានលេខ៧ ត្រូវចាត់ទុកថា ជាប្រទេសដែលអនុវត្តសិទ្ធិ និងសេរីភាពទាំងនេះតិចតួចបំផុត។
សម្រាប់ប្រទេសកម្ពុជា ទទួលបានលេខ៦ សម្រាប់សិទ្ធិនយោបាយ និងលេខ៥ សម្រាប់សិទ្ធិពលរដ្ឋ។ ពិន្ទុនេះ បានធ្វើឲ្យកម្ពុជា ក្លាយជាប្រទេសគ្មានសេរីភាព។ ក្នុងចំណោមប្រទេសទាំង១៩៦ ដែលអង្គការ ហ្វី្រដមហោស៍ ឃ្លាំមើល មានប្រទេសចំនួន៨៨ ដែលបានអនុវត្ត និងគោរពពេញលេញសិទ្ធិនយោបាយ និងសេរីភាពរបស់ពលរដ្ឋ ខណៈប្រទេសចំនួន៥៩ អនុវត្តបានមធ្យម ចំណែកប្រទេស៤៩ ផ្សេងទៀត គោរពបានតិចតួចបំផុត ក្នុងនោះក៏មានប្រទេសកម្ពុជា ផងដែរ។
ក្នុងចំណោមប្រទេសទាំង៤៩ ដែលត្រូវចំណាត់ថ្នាក់ថាជាប្រទេសគ្មានសេរីភាព ភាគច្រើនជាប្រទេសស្ថិតនៅក្នុងទ្វីបអាស៊ី និងទ្វីបអាហ្វ្រិក។ ហើយក៏មានដែរប្រទេសស្ថិតក្នុងតំបន់ការីប៊ីន (Caribbean) ដូចជាគុយបា (Cuba) និងប្រទេសនៅអឺរ៉ុបខាងកើត ដូចជាបេឡារុស្ស (Belarus) ជាដើម។
បើប្រៀបធៀបជាមួយប្រទេសក្នុងតំបន់អាស៊ានវិញ ប្រទេសកម្ពុជា មានចំណាត់ថ្នាក់ស្មើប្រទេសមីយ៉ាន់ម៉ា (Myanmar) និងប្រទេសប្រ៊ុយណេ (Brunei) ដែលសុទ្ធតែទទួលបានពិន្ទុ៦ សម្រាប់សិទ្ធិនយោបាយ និង៥ សម្រាប់សេរីភាពពលរដ្ឋ។ ហើយពិន្ទុនេះ ធ្វើឲ្យកម្ពុជា មីយ៉ាន់ម៉ា និងប្រ៊ុយណេ ល្អប្រសើរជាងប្រទេសវៀតណាម និងឡាវ។ ចំណែកប្រទេសក្នុងតំបន់អាស៊ាន៥ផ្សេងទៀត រួមមាន សិង្ហបុរី (Singapore) ម៉ាឡេស៊ី (Malaysia) ហ្វីលីពីន (Philippines) ឥណ្ឌូនេស៊ី (Indonesia) និងថៃ (Thailand) សុទ្ធតែទទួលបានចំណាត់ថ្នាក់ល្អមធ្យម។
វិទ្យុអាស៊ីសេរី មិនអាចទាក់ទងមន្ត្រីរដ្ឋាភិបាល សុំយោបល់ជុំវិញការលើកឡើងរបស់អង្គការ ហ្វ្រីដមហោស៍ បានទេ នៅថ្ងៃទី២៨ មករា។
ចាប់តាំងពីមានការសិក្សារបស់អង្គការ ហ្វ្រីដមហោស៍ ទៅលើការអនុវត្តសិទ្ធិនយោបាយ និងសេរីភាពពលរដ្ឋចាប់តាំងពីឆ្នាំ១៩៧២ មក កម្ពុជា ទទួលបានចំណាត់ថ្នាក់ល្អមធ្យមតែពីរដងគត់ គឺក្នុងឆ្នាំ១៩៩៣ និងឆ្នាំ១៩៩៤ ពោលគឺក្នុងឆ្នាំដែលកម្ពុជា បានរៀបចំការបោះឆ្នោតដោយមានការជួយជ្រោមជ្រែងពីអង្គការសហប្រជាជាតិ។ តែចំណាត់ថ្នាក់នេះបានធ្លាក់តាំងពីឆ្នាំ១៩៩៥ រហូតដល់ពេលបច្ចុប្បន្ន។
របាយការណ៍លទ្ធផលរបស់អង្គការ ហ្វ្រីដមហោស៍ ចេញផ្សាយជួនចំពេលដែលរដ្ឋាភិបាលរបស់លោកនាយករដ្ឋមន្ត្រី ហ៊ុន សែន កំពុងរងការរិះគន់យ៉ាងខ្លាំងពីសំណាក់អង្គការក្រៅរដ្ឋាភិបាលជាតិ និងអន្តរជាតិ ថាបានរំលោភធ្ងន់ធ្ងរលើសិទ្ធិ និងសេរីភាពពលរដ្ឋរបស់ខ្លួន ពិសេសគឺការប្រើកម្លាំងលើសលប់បង្ក្រាបលើកម្មករដែលឈានដល់ការបាត់បង់ជីវិតមនុស្ស ការចាប់ខ្លួនប្រជាពលរដ្ឋ ព្រមទាំងសកម្មជនសង្គមស៊ីវិល។ ហើយថ្មីៗនេះ គឺការប្រើកម្លាំងវាយបង្ក្រាប ដើម្បីបំបែកការប្រមូលផ្តុំរបស់ពលរដ្ឋ និងការប្រើកម្លាំងអុកឡុករំខានការប្រមូលផ្តុំរបស់គណបក្សប្រឆាំងជាដើម៕
No comments:
Post a Comment
yes