រូបថតអ្នកជាប់ឃុំទាំង ២៣នាក់ (រូបថត តាត ឧត្តម)
អង្គការសង្គមស៊ីវិលជាតិ និងអន្តរជាតិចំនួន ១៩៧ស្ថាប័ន នឹងបន្ដយុទ្ធនាការដាក់ញត្តិនៅស្ថានទូតបរទេសនៅរាជធានីភ្នំពេញចំនួន៧ និងស្នាក់ការអង្គការសហប្រជាជាតិប្រចាំនៅកម្ពុជា ស្នើសុំឲ្យអន្តរាគមន៍ទៅរដ្ឋាភិបាលកម្ពុជា គោរពសិទ្ធិមនុស្ស និងទាមទារឲ្យដោះលែងអ្នកជាប់ឃុំទាំង២៣នាក់។
សេចក្តីជូនដំណឹងរបស់បណ្តាអង្គការសង្គមស៊ីវិលជាតិ និងអន្តរជាតិទាំង ១៩៧ ចេញផ្សាយនៅរសៀលថ្ងៃអង្គារនេះ ឲ្យដឹងថា តំណាងអង្គការសង្គមស៊ីវិលមួយចំនួន នឹងបន្តយុទ្ធនាការដាក់ញត្តិសុំអន្តរាគមន៍ពីបញ្ហាសិទ្ធិមនុស្ស និងទាមទារឲ្យដោះលែងអ្នកជាប់ឃុំទាំង២៣នាក់នោះ នៅស្ថានទូតសឹង្ហបុរី ព្រុយណេ មីយ៉ាន់ម៉ា ឥណ្ឌូនេស៊ី ហ្វីលីពីន វៀតណាម ចិន និងស្នាក់ការអង្គការសហប្រជាជាតិប្រចាំនៅកម្ពុជា។
លោកស្រី រស់ សុភាព នាយិការអង្គការយេនឌ័រ និងអភិវឌ្ឍន៍ដើម្បីកម្ពុជា មានប្រសាសន៍ថា ការដាក់ញត្តិនៅថ្ងៃស្អែកនេះ នឹងចាប់ផ្តើមនៅម៉ោង ៨:៣០នាទីព្រឹក នៅស្ថានទូតសឹង្ហបុរី ហើយនិងបន្តទៅស្ថានទូតផ្សេងទៀត ដោយមិនមានការដង្ហែក្បួននោះទេ។
បន្ទាប់ពីកើតមានហេតុការណ៍បង្ក្រាបទៅលើកម្មករ ពីសំណាក់កងកម្លាំងប្រដាប់អាវុធ កាលពីថ្ងៃទី២ និងទី៣ខែមករា បណ្តាលឲ្យមានមនុស្សស្លាប់ រងរបួស និងចាប់ខ្លួនសកម្មជនសិទ្ធិមនុស្ស ដីធ្លី និងកម្មករ ២៣នាក់មក អង្គការសង្គមស៊ីវិលជាតិ និងអន្តរជាតិ មកពី ១៩៧ស្ថាប័ន ព្រមទាំងប្រជាសហគមន៍ដីធ្លី បានបើកយុទ្ធនាការដង្ហែញត្តិដាក់ទៅស្ថានទូតបរទេសនានាប្រចាំនៅកម្ពុជា ដូចជា ស្ថានទូតស៊ុយអែត អាឡឺម៉ង់ បារាំង កូរ៉េខាងត្បូង អូស្ត្រាលី រុស្ស៊ី ថៃ ម៉ាឡេស៊ី ជាដើម ដើម្បីបង្ហាញទៅកាន់សហគមន៍អន្តរជាតិទាំងនោះថា រដ្ឋាភិបាលតំណាងឲ្យប្រជាពលរដ្ឋ បានកំពុងរំលោភសិទ្ធិមនុស្ស តាមរយៈប្រព័ន្ធតុលាការ និងស្នើឲ្យមន្ត្រីទូតទាំងនោះ ជួយអន្តរាគមន៍ទៅរដ្ឋាភិបាល ដោះលែងអ្នកជាប់ឃុំទាំង២៣នាក់៕
No comments:
Post a Comment
yes