លោក សម រង្ស៊ី និងលោក កឹម សុខា ថ្លែងសារនយោបាយក្នុង
ពិធីជួបជុំនៅខេត្តបាត់ដំបង
កងកម្លាំងអាជ្ញាធរមានសមត្ថកិច្ច ប៉ូលិស និងទាហានជាច្រើននាក់ ត្រូវបានគេដាក់ពង្រាយនៅតាមចំណុច គោលដៅក្នុងទីរួមខេត្ត និងនៅតាមដងផ្លូវជាច្រើនកន្លែងនៅស្រុកមួយចំនួនផ្សេងទៀត ក្នុងខេត្តបាត់ដំបង។
កងកម្លាំងអាជ្ញាធរនៅតាមស្រុកគោលដៅទាំងនោះ បានស្ទាក់បញ្ឈប់រថយន្ត ម៉ាស៊ីនគោយន្ត និងម៉ូតូជាច្រើនគ្រឿងមិនឲ្យប្រជាពលរដ្ឋទាំងនោះទៅចូលរួមស្ដាប់សេចក្ដីថ្លែងការណ៍នយោបាយរបស់មេបក្សប្រឆាំង។ មន្ត្រីគណបក្សសង្គ្រោះជាតិ និងមន្ត្រីអង្គការសង្គមស៊ីវិល ចាត់ទុកថា នេះជារូបភាពគំរាមកំហែង បិទសិទ្ធិសេរីភាពបញ្ចេញមតិរបស់ប្រជាពលរដ្ឋ។
មនុស្សជិត ១ពាន់នាក់បានចូលរួមស្ដាប់ការថ្លែងសារនយោបាយរបស់មេដឹកនាំគណបក្សប្រឆាំងនៅទីរួមខេត្តបាត់ដំបង នៅថ្ងៃទី១២ ខែមករា ឆ្នាំ២០១៤។ ទោះយ៉ាងនេះក្តី គេសង្កេតឃើញថា ជំនួបរបស់ សម រង្ស៊ី និងលោក កឹម សុខា ជាប្រធាននិងជាអនុប្រធានជាមួយសកម្មជននិងអ្នកគាំទ្ររបស់ គណបក្សសង្គ្រោះជាតិនេះ បានធ្វើឡើងឋិតក្រោមការហ៊ុមព័ទ្ធរបស់កងកម្លាំងអាជ្ញាធរដែលមានអាវុធនៅក្នុងដៃ។
នៅចំណុចគោលដៅជាច្រើន ក្នុងទីរួមខេត្តបាត់ដំបង គេសង្កេតឃើញអាជ្ញាធរខេត្តបានដាក់ពង្រាយកងប៉ូលិសទាហានការពារជាច្រើននាក់ កាលពីល្ងាចថ្ងៃទី១១ និងនៅព្រឹកថ្ងៃទី១២ ខែមករា ឆ្នាំ២០១៤។ ដោយឡែកនៅលើកំណាត់ផ្លូវនៃស្រុកមួយចំនួនផ្សេងទៀត ដូចស្រុកមោងឬស្សី ស្រុកថ្មគោល និងស្រុកឯកភ្នំ កងកម្លាំងអាជ្ញាធរប៉ូលិស ត្រូវបានគេដាក់ពង្រាយស្ទាក់បញ្ឈប់រថយន្តមិនឲ្យដឹកជញ្ជូនប្រជាពលរដ្ឋទៅកាន់ទីរួមខេត្តបាត់ដំបង នោះឡើយ។
មន្ត្រីគណបក្សសង្គ្រោះជាតិ ប្រចាំស្រុកឯកភ្នំ លោក ឡី សុខុន អះអាងថា នៅស្រុកឯកភ្នំ មានប្រជាពលរដ្ឋ ចំនួនជាង ២០០នាក់ បាននាំគ្នាធ្វើដំណើរតាមរថយន្ត ម៉ាស៊ីនគោយន្ត និងម៉ូតូ ដើម្បីទៅស្ដាប់សារនយោបាយរបស់លោក សម រង្ស៊ី និងលោក កឹម សុខា ប៉ុន្តែអ្នកភូមិទាំងនោះត្រូវសមត្ថកិច្ចហាមឃាត់៖ «បញ្ជូនមកស្រុកឯកភ្នំ មាន ២០០នាក់ជាង។ មធ្យោបាយមានឡាន គោយន្ត និងម៉ូតូ ក៏ប៉ុន្តែម៉ូតូក៏មិនឲ្យមក ឆែករកប័ណ្ណបើកបរគ្រប់បែបយ៉ាងទាំងអស់។ មួយចំនួនអត់បានមក មួយចំនួនពុះពារអង្វរ ដើម្បីឲ្យបានឡានមួយ ៥០នាក់បានចូលរួម។ ឥឡូវចាប់គោយន្តយើងមួយយកទៅដាក់សាលាស្រុកបាត់ហើយ»។
មន្ត្រីគណបក្សសង្គ្រោះជាតិ ចាត់ទុកថា ការហាមឃាត់នោះ គឺជារឿងអយុត្តិធម៌ និងជាការបំបិទសិទ្ធិសេរីភាពក្នុងការជួបជុំបញ្ចេញមតិ។ ទាក់ទិនបញ្ហានេះ អនុប្រធានគណបក្សសង្គ្រោះជាតិ លោក កឹម សុខា បានទម្លាក់កំហុសនេះទៅលើរដ្ឋាភិបាល និងគណបក្សប្រជាជនកម្ពុជា ដែលគ្រប់គ្រងដោយលោកនាយករដ្ឋមន្ត្រី ហ៊ុន សែន។
លោកបន្តថា កងកម្លាំងប្រដាប់អាវុធបានត្រៀមកងកម្លាំងប្រដាប់ដោយអាវុធហួសហេតុ។ លោកថា ទង្វើនេះបានបង្ហាញឲ្យប្រជាពលរដ្ឋឃើញកាន់តែច្បាស់ពីរូបភាពកាចសាហាវរបស់គណបក្សកាន់អំណាច៖ «ហើយប្រជាពលរដ្ឋខ្មែរ ទោះបីដាក់អាវុធប៉ុណ្ណឹងក៏ដោយ គេអត់ខ្លាចទេ កុំទៅរារាំងគេ អ៊ីចឹងហើយបានខ្ញុំថា គណបក្សប្រជាជនធ្វើឲ្យប្រជាពលរដ្ឋស្អប់ ដោយសារយកកម្លាំងប្រើហួសប្រមាណនិងកម្លាំងប្រជាពលរដ្ឋ។ គេអាចដាក់កម្លាំងសន្តិសុខដែរ ប៉ុន្តែគេមិនបាច់ប្រើកាំភ្លើងអី អ៊ីចឹងហើយមានន័យថា គណបក្សប្រជាជនភ័យខ្លួនហួសហេតុ»។
នៅក្នុងការជួបជុំរបស់គណបក្សសង្គ្រោះជាតិនោះ គេសង្កេតឃើញក្រុមមន្ត្រីអង្គការសហប្រជាជាតិទទួលបន្ទុកសិទ្ធិមនុស្សនៅកម្ពុជា និងមន្ត្រីអង្គការសិទ្ធិមនុស្សក្នុងស្រុកជាច្រើននាក់ បានតាមឃ្លាំមើលស្ថានការណ៍នោះយ៉ាងយកចិត្តទុកដាក់។ អ្នកសម្របស្រួលសមាគមអាដហុក ប្រចាំខេត្តបាត់ដំបង លោក យិន ម៉េងលី កត់សម្គាល់ថា កងកម្លាំងសមត្ថកិច្ចដែលគេដាក់ពង្រាយនៅតាមគោលដៅទាំងនោះ ប្រដាប់ដោយអាវុធនៅក្នុងដៃ ប៉ុន្តែពុំមានខែលការពារនោះឡើយ។ នៅតាមស្រុកមួយចំនួនសមត្ថកិច្ចប៉ូលិសបានត្រួតពិនិត្យរថយន្ត ម៉ូតូរបស់ប្រជាពលរដ្ឋ ក្រោមហេតុផលការអនុវត្តច្បាប់ចរាចរណ៍។
លោក យិន ម៉េងលី៖ «នេះមិនមែនជាការអនុវត្តច្បាប់ចរាចរណ៍ទេ គឺជាការរើសអើង ការគាបសង្កត់ ព្រោះយើងពិនិត្យឃើញហើយតាំងពីក្រោយការបោះឆ្នោតមករហូតមកដល់ពេលនេះ យើងឃើញថា មិនដែលមានសមត្ថកិច្ចទេ ទើបតែឃើញ។ នេះជាការរើសអើង មិនមែនជាការអនុវត្តច្បាប់ចរាចរណ៍ទេ»។
ទោះយ៉ាងនេះក្ដី ការជួបប្រជុំគ្នារបស់ថ្នាក់ដឹកនាំគណបក្សសង្គ្រោះជាតិ នៅទីរួមខេត្តបាត់ដំបង គេសង្កេតឃើញថា ពុំមានបាតុភាពហិង្សាកើតមានឡើងទេ។ លោក សម រង្ស៊ី និងលោក កឹម សុខា ជាប្រធាននិងជាអនុប្រធានគណបក្សសង្គ្រោះជាតិ បានលើកឡើងនូវបញ្ហាជាច្រើន ដែលកើតមាននៅក្រោយការបោះឆ្នោត ដូចជាករណីអាជ្ញាធរប្រើកងកម្លាំងអាជ្ញាធរបង្ក្រាបទៅលើហ្វូងបាតុករ ការបាញ់សម្លាប់ទៅកម្មកររោងចក្រ និងបានរិះគន់ទៅលើរដ្ឋាភិបាលកម្ពុជា ដែលដឹកនាំដោយលោក ហ៊ុន សែន។ ក្រៅពីសារនយោបាយកៀរគរ ប្រជាពលរដ្ឋឲ្យគាំទ្រខ្លួនប្រឆាំងទៅនឹងលទ្ធផលបោះឆ្នោត។ មេដឹកនាំគណបក្សសង្គ្រោះជាតិ អះអាងថា គណបក្សសង្គ្រោះជាតិ នៅតែរក្សាជំហរដឹកនាំការធ្វើបាតុកម្មដដែល ដើម្បីទាមទារឲ្យមានការបោះឆ្នោតឡើងវិញ។
No comments:
Post a Comment
yes