២២-កញ្ញា-២០១៣៖ ក្រុមការងាររៀបចំវេទិកានៅរដ្ឋសភា ត្រៀម
សម្រាប់កិច្ចប្រជុំសភាលើកដំបូង នីតីកាលទី៥ នៅថ្ងៃទី២៣ កញ្ញា ឆ្នាំ២០១៣
មន្ត្រីរដ្ឋាភិបាលតែងនិយាយគ្រប់ម៉ាត់ថា កម្ពុជា ជាប្រទេសនីតិរដ្ឋ។ នេះមានន័យថា ជារដ្ឋមួយមានច្បាប់ មានប្រព័ន្ធយុត្តិធម៌ឯករាជ្យ គ្មានការជ្រៀតជ្រែកពីអ្នកនយោបាយ ហើយរាល់ការសម្រេចទាំងឡាយ គឺផ្អែកលើមូលដ្ឋានច្បាប់ គ្មានការសម្របសម្រួលក្រោមតុ ឬសម្របសម្រួលនយោបាយនោះទេ។ ក៏ប៉ុន្តែ អ្នករិះគន់តែងចោទថា រដ្ឋាភិបាលកម្ពុជា រំលោភច្បាប់ ហើយថាប្រជាពលរដ្ឋកម្ពុជា នៅមិនទាន់មានសិទ្ធិសេរីភាពពេញលេញទេ។
តើកម្ពុជា ជានីតិរដ្ឋ ហើយប្រជាពលរដ្ឋមានសិទ្ធិសេរីភាពមែនឬទេ?
អ្នកដែលរិះគន់ថានៅកម្ពុជា មិនមានសេរីភាពគ្រប់គ្រាន់នោះ ប្រាកដជាមិនបានសង្កេតពិចារណាអោយបានដិតដល់ទេ។ តាមពិត ប្រទេសកម្ពុជា ក្រោមការដឹកនាំរបស់សម្ដេចតេជោ មានសេរីភាពហូរហៀរ ចង់នរណាធ្វើអ្វីក៏បានដែរ មិនបាច់ទៅមើលឯណាឆ្ងាយទេ បើកភ្នែកពេលព្រឹកឡើង ហើយចេញដំណើរតាមផ្លូវភ្លាម ក៏គេអាចឃើញមនុស្សម្នាដែលធ្វើចរាចរតាមដងផ្លូវ អនុវត្តសិទ្ធិសេរីភាពតាមចិត្តចង់ មិនសូវមាននរណាគោរពច្បាប់ចរាចរណ៍អ្វីឡើយ។ បើទោះជាគេខំយកថ្មមកដាក់ខណ្ឌចែកផ្លូវឆ្វេងស្តាំ ក៏គេនៅតែត្បុលទាំងទទឹងទិសបានដែរ គ្មាននរណាហ៊ានធ្វើអីកល្យាណបានទេ។
ក៏ប៉ុន្តែ អ្នកទាំងនោះដោះសារថា បើមិនខំត្បុលខ្លះ ម៉េចនឹងទៅដល់ទីដៅបាន បើផ្លូវណែនប៉ែសដូច្នេះ។ អូ! បើសិនជាប៉ូលិសហៅវិញ ភាគច្រើនដកមួយសន្លឹកពីរទៅ ចរចាជាមួយគាត់ទៅ ក៏រួចខ្លួនទៅហើយ។
និយាយពីពួកអ្នកជិះឡានពាក់ស្លាក ខ.ម ឬនគរបាល ឬរាជរដ្ឋាភិបាល ឬឡានធុនកាលីបវិញ ពួកគាត់មានសេរីភាពជាងអ្នកណាទាំងអស់។ គាត់បើកលឿនដូចហោះ ហើយវ៉ាគេវ៉ាឯងគ្មានក្រែងចិត្តនរណាឡើយ។ មិនថាពេលព្រឹកព្រលឹម ឬយប់កណ្ដាលអាធ្រាត្រទេ ភ្លើងក្រហមក៏គាត់មិនឈប់ដែរ ម្នាក់ៗដូចជាទើបទទួលដំណឹងថាប្រទេសជាតិកំពុងមានអាសន្ន ហើយប្រញាប់ទៅជួយសង្គ្រោះអ៊ីចឹង។ ទាំងជនសាមញ្ញ ទាំងអ្នកអនុវត្តច្បាប់ និងអ្នកពង្រឹងច្បាប់ ហាក់មានសេរីភាពធ្វើអ្វីបានតាមចិត្តចង់ តាមកាលៈទេសៈបានដូចគ្នា។ នេះនិយាយត្រឹមតែសេរីភាពក្នុងការធ្វើចរាចរតាមដងផ្លូវមួយមុខ។
បែរទៅមើលអ្នកកាន់អាវុធវិញ ពួកគាត់មួយចំនួនក៏អាចបាញ់បោះសម្លាប់មនុស្សបានយ៉ាងសេរី។ បាញ់សម្លាប់គេហើយ ហាក់ដូចជាមានមោទនភាពពេញដើមទ្រូង គ្មានច្បាប់កម្ពុជា ណាទៅកាត់ទោសបានទេ។
មិនខុសពីទាហានខ្មែរក្រហម ដែលត្រូវគេពង្វក់អោយសម្លាប់ខ្មែរ ក្រោមស្លាកសម្លាប់ពួក សេ.អ៊ី.អា (CIA) ឬ កា.ហ្សេ.បេ (KGB) ដើម្បីការពារទឹកដី ក្រោមមាគ៌ាដឹកនាំដ៏ភ្លឺស្វាងរបស់អង្គការលើនោះ នាពេលថ្មីៗនេះ កងកម្លាំងប្រដាប់អាវុធបាញ់សម្លាប់បាតុករ ក្រោមស្លាកកម្ទេចក្រុមអានាធិបតេយ្យ ដើម្បីរក្សាសណ្ដាប់ធ្នាប់សង្គម តាមការចង្អុលបង្ហាញប្រកបដោយគតិបណ្ឌិតរបស់សម្ដេចដែរ។ ប្រសិនបើគេបានប្រាប់ពួកគាត់ថា កុំបាញ់សម្លាប់កម្មករស្លូតត្រង់ដែលជាប្ដីគេ ជាឪពុកគេ ឬជាបងប្អូនកូនចៅគេនោះ ប្រហែលជាពួកគាត់ពិបាកនឹងលើកដៃកេះកៃទៅរួចឡើយ។
ណ្ហើយស្លេះរឿងនេះតែត្រឹមណេះចុះ។ ងាកមកមើលថា តើកម្ពុជា ជានីតិរដ្ឋមែន ឬមិនមែនវិញម្តង។
តាមពិត រឿងកម្ពុជា ជានីតិរដ្ឋ ឬមិននីតិរដ្ឋនោះ ស្តាប់តែប្រសាសន៍សម្ដេចដែលទើបនឹងថ្លែងនាពេលថ្មីៗនេះ ក៏គេអាចវិនិច្ឆ័យខ្លួនឯងបានដែរ៖«...បន្ធូរដៃហើយប៉ុណ្ណឹងនោះ បើនិយាយឲ្យវាត្រឹមត្រូវ ខ្ញុំបានប្រាប់ ស៊ូប៊ែឌី (Subedi) ខ្ញុំព្រះករុណាខ្ញុំបានប្រាប់ ស៊ូប៊ែឌី បើនិយាយឲ្យត្រឹមត្រូវតាមច្បាប់ បើកុំទប់ទ្វារដើម្បីសម្របសម្រួលខាងនយោបាយ ត្រូវចាប់ខ្លួនភ្លាម ព្រោះនេះជាបទល្មើសជាក់ស្ដែង ត្រូវចាប់ខ្លួនភ្លាមប៉ុន្មាននាក់នោះ។ ប៉ុន្តែ ទុកផ្លូវសន្ទនាខាងនយោបាយ យើងមិនចាប់ខ្លួនទេ។ ហើយពេលចូលតុលាការហើយ តុលាការក៏មិនបានចេញដីកាឃុំខ្លួនទេ។ សូមឲ្យយល់ផង កុំទទឹងទិស...»។
សម្ដេចសារភាពហើយថា សម្ដេចមិននិយាយអោយត្រឹមត្រូវតាមច្បាប់ទេ ទោះបីជាសម្ដេចដឹងថាជាបទល្មើសជាក់ស្ដែងក៏ដោយ ត្បិតសម្ដេចត្រូវការគណបក្សសង្គ្រោះជាតិ ដើម្បីសម្របសម្រួលនយោបាយ។
ប៉ុណ្ណឹងហើយនៅមេៗគណបក្សប្រឆាំងមិនដឹងគុណសម្ដេចទៀត។ បើកុំតែបានសម្ដេចអន្តរាគមន៍ទៅលើប្រព័ន្ធតុលាការលើព្រះមហាក្សត្រ អោយលើកលែងទោសម្តងជាពីរដង កុំសង្ឃឹមថាលោកបានត្រឡប់ចូលស្រុកកំណើតលោកវិញអោយសោះ។ លោកទាំងពីរបែបមិនទាន់ដឹងថា ខ្លួនមានសំណាងជាងអ្នកដទៃឆ្ងាយណាស់ ដែលបានសម្ដេចនៅត្រូវការ ហើយហាមតុលាការកុំអោយអនុវត្តតាមនីតិវិធីនៃរដ្ឋដែលមានច្បាប់នោះ។ លោកគួរដឹងថា រាស្ត្រប្រជាសាមញ្ញធម្មតា ដែលសម្ដេចមិនត្រូវការវិញ ពេលមានរឿងក្តីក្ដាំងម្តងៗ ជាពិសេសមានរឿងគេរឹបអូសយកដីស្រែ ផ្ទះសម្បែងជាដើម ទោះជាខំនាំគ្នាទៅអង្គុយមុខផ្ទះសម្ដេច រួចលើករូបថតសម្ដេច និងសម្ដេចគតិព្រឹទ្ធបណ្ឌិត គ្រវីទាល់តែជ្រុះដៃពីស្មា ក៏ឥតប្រយោជន៍ដែរ។ បានគេមិនចាប់ដាក់គុក ហើយគេអោយដឹកដៃកូនចាកចោលដីធ្លីផ្ទះសម្បែងទៅជ្រកក្រោមដើមឈើនោះ រាប់ថាសំណាងហើយ។
ដូចនេះ តើកម្ពុជា ជាប្រទេសមានសេរីភាពកម្រិតណា ហើយជាប្រទេសនីតិរដ្ឋដែរ ឬទេ? សូមលោកអ្នកស្តាប់សម្រេចចិត្តចុះ!
No comments:
Post a Comment
yes