ក្រុមគ្រួសារជនជាប់ឃុំម្នាក់ ក្នុងចំណោមអ្នកជាប់ឃុំ ២១នាក់នៅពន្ធនាគារត្រពាំងផ្លុង ស្នើសុំកូនរបស់ខ្លួនឲ្យបាននៅក្រៅឃុំជាបន្ទាន់ ដើម្បីយកមកព្យាបាលរបួសដៃ ដែលត្រូវបានទាហានឆ័ត្រយោង៩១១ វាយបង្ក្រាបកាលពីថ្ងៃទី២ នៅផ្លូវវ៉េងស្រេង ករណីតវ៉ាប្រាក់ឈ្នួលកម្មករ ១៦០ដុល្លារ។
អ្នកស្រី ប៉ាន់ ស៊ីណា ជាម្តាយយុវជន សុគន្ធ សម្បតិ្ត ពិសិទ្ធិ ប្រាប់VOD នៅរសៀលថ្ងៃសុក្រនេះថា បច្ចុប្បន្នកូនអ្នកស្រីដែលកំពុងនៅជាប់ឃុំ បានស្វិតដៃឆ្វេង និងបង្ករការឈឺចាប់យ៉ាងខ្លាំង បន្ទាប់ពីទាហានឆ័ត្រយោងលេខ៩១១ វាយយ៉ាងដំណំ ហើយមិនបានព្យាបាលភ្លាមៗ។ អ្នកស្រី សំណូមពរឲ្យប្រធានពន្ធនាគារអនុញ្ញាតិ ឲ្យកូនបាននៅក្រៅឃុំ «ខ្ងុំយល់ថាឥតយុត្តិធម៏ទេព្រោះកូនខ្ងុំគ្មានកំហុសអីនិងទៅធ្វើបាតុកម្មអីទេ គេគ្រាន់ទៅថតយកពត៏មានប៉ុណ្ណឹង អង្វរសុំឲ្យកូនខ្ងុំឲ្យនៅក្រៅឃុំដើម្បីយកមកព្យាបាលបាក់ដៃ»។
ប្រធានពន្ធនាគារត្រពាំងផ្លុង លោក គា សុវណ្ណ បដិសេធការស្នើសុំនេះ ព្រោះលោកបាននាំបុរសម្នាក់នោះទៅមន្ទីរពេទ្យជំនាញហើយ តែក្រុមគ្រួសារ មិនព្រមឲ្យយកទៅវះកាត់ ។
កាលពីថ្ងៃទី១១ ខែកុម្ភៈ សាលាឧទ្ធរណ៍ បានបដិសេធបណ្តឹងសុំនៅក្រៅឃុំរបស់បុរសទាំង ២១នោះ ដោយហេតុថា ការដោះលែងនៅពេលនេះ អាចនាំឲ្យប៉ះពាល់ដល់សណ្តាប់ធ្នាប់សាធារណៈ និងប៉ះពាល់ដំណើរការសវនការ ខណៈសំណុំរឿងនេះ កំពុងស្ថិតក្នុងដំណាក់កាលស៊ើបអង្កេតនៅឡើយ។
No comments:
Post a Comment
yes