សន្និសីទសារព័ត៌មាន របស់គណៈកម្មាធិការជាតិរៀបចំការបោះ
ឆ្នោតនៅកម្ពុជា កាលពីព្រឹកមិញ (រូបថត៖ ណាត សុភាព)
គណៈកម្មាធិការជាតិរៀបចំការបោះឆ្នោត គជប ឲ្យដឹងនៅថ្ងៃសុក្រនេះថា គជប ត្រូវចំណាយថវិកាបន្ថែមជាង១០ម៉ឺនដុល្លារទៀត សម្រាប់ការបោះឆ្នោតថ្នាក់ក្រោមជាតិ ខណៈរដ្ឋាភិបាលបង្កើតខេត្តត្បូងឃ្មុំ និងបង្កើតខណ្ឌ៣ថ្មីបន្ថែមទៀត។
ខេត្តត្បូងឃ្មុំត្រូវបានបង្កើតជាផ្លូវការហើយ បន្ទាប់ពីព្រះមហាក្សត្រកម្ពុជានរោត្តមសីហមុនី បានឡាយព្រះហស្ថលេខា លើព្រះរាជក្រឹត្យចុះថ្ងៃទី៣១ ខែធ្នូ ឆ្នាំ២០១៣ តាមសំណើទូលថ្វាយរបស់លោកនាយករដ្ឋមន្ត្រី ហ៊ុន សែន។ រីឯ ខណ្ឌថ្មីចំនួន៣ទៀត គឺខណ្ឌច្បារអំពៅ ខណ្ឌជ្រោយចង្វារ និងខណ្ឌព្រែកព្នៅ ត្រូវបានបង្កើតថ្មីដែរ នៅរាជធានីភ្នំពេញ។
អគ្គលេខាធិការ គជប លោក ទេព នីថា មានប្រសាសន៍ថា គជប ធ្វើតាមគម្រោងរំកិល៣ឆ្នាំ របស់ក្រសួងហិរញ្ញវត្ថុ គឺតាមគម្រោងត្រូវចំណាយថវិកាជាង១លាន៦ សែនដុល្លារ។ លោកបញ្ជាក់ថា សម្រាប់ការបោះឆ្នោតជ្រើសរើសក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ អាណត្តិទី២ ឆ្នាំ២០១៤ គជប នឹងត្រូវចំណាយថវិកាជាង១០ម៉ឺនដុល្លារ បន្ថែមទៀត «តាមគម្រោងរបស់ក្រសួងហិរញ្ញវត្តុនិង គឹធ្វើថវិការ ៣ឆ្នាំរកិល អញ្ចឹងសំរាប់ការបោះឆ្នោតនេះយើងសុំដំបូង ដែលបានដាក់នៅក្នុងច្បាប់ហើយ គឹចំនួន ១លាន ៦សែនដុល្លារជាង ក៏ប៉ុន្តែនៅក្នុងឆ្នាំ២០១២ ចូលឆ្នាំ២០១៣ ២០១៤ យើងបានបង្កើតខេត្តថ្មី១ទៀត ហើយបង្កើតខណ្ទចំនួន៣ថ្មីទៀត អញ្ចឹងហើយវាត្រូវចំណាយថវិកាថែមប្រហែលជាជាង១០០០០០ដុល្លារទៀត នេះជាគម្រោងចំណាយសំរាប់ការបោះឆ្នោតនេះ»។
នាយកប្រតិបត្តិគណៈកម្មាធិការអព្យាក្រឹត និងយុត្តិធម៌ ដើម្បីការបោះឆ្នោតដោយសេរី និងត្រឹមត្រូវ(និចហ្វិច) លោក ហង្ស ពុទ្ធា មានប្រសាសន៍ថា ការបង្កើតខេត្តនិងខណ្ឌថ្មី ធ្វើឲ្យគជប មានការលំបាកក្នុងការបង្កើតក្បាលម៉ាស៊ីនដើម្បីធានាប្រសិទ្ធិភាពការងារ «ការបង្កើតខណ្ទថ្មីនេះធ្វើឲ្យ គជប កាន់តែជួបការលំបាក ដោយសាររៀបចំ ក្បាលម៉ាស៊ីនរដ្ឋបាលថ្មីនៅទីនោះ ហើយបានរៀបចំក្បាលម៉ាស៊ីននិងរដ្ឋបាលថ្មី គឹត្រូវការប្រើប្រាស់ថវិកា នេះគ្រាន់អ្វីដែរយើងមើលឃើញថា ប្រហែលជាង១០០០០០ដុល្លារ ប៉ុន្តែនៅ ការចំណាយផ្សេងៗទៀត ទោះជាមិនមែនបោះឆ្នោតក៏ដោយខ្ងុំគិតថាគឹជាខ្ទង់ចំណាយរបស់ជាតិ អញ្ចឹងក៏អាចជាការប៉ះពាល់ ដល់ថវិការបស់ជាតិដែរ»។
អ្នកសម្របសម្រួលនៃបណ្តាញរួបរួម ដើម្បីគណនេយ្យភាពសង្គម នៅអាស៊ីបូព៌ា និងប៉ាស៊ីហ្វិក ប្រចាំកម្ពុជា លោក សន ជ័យ យល់ថា ការបង្កើត ខេត្ត-ខណ្ឌថ្មីនោះ ធ្វើឲ្យរដ្ឋចំណាយខាតថវិកាជាតិ ព្រោះ ការបោះឆ្នោតជ្រើសរើសក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ ត្រូវចំណាយថវិកាច្រើន ហើយអ្វីដែលជួបបញ្ហាប្រឈមទៀតនោះ គឺត្រូវបង្កើតការិយាល័យខេត្ត-ក្រុង-ស្រុក ហើយប្រាក់ខែបុគ្គលិក ក៏ចំណាយបន្ថែមទៀតផង។ លោកបញ្ជាក់ថា បើរដ្ឋយកថវិកានោះទៅចំណាយ សម្រាប់ការពង្រឹងនៅភូមិ ឃុំ និងជួយពលរដ្ឋ ទើបល្អប្រសើរជាង «គេមើលទៅតាមប្រព័ទ្ធច្បាប់វាទំនងហើយ ប៉ុន្តែយើងឲ្យការចំណាយនិងវាឆ្លុះបញ្ចាំងពីតម្រូវការជាបន្ទាន់របស់ប្រជាពលរដ្ឋនៅរឿងសេវាសាធារណៈ ជាពិសេសរឿងឃុំនេះតែម្តង សុំតែមានថវិកាច្រើនដើម្បីផ្តល់សេវា ពេលនេះប្រជាពលរដ្ឋត្រូវការសេវាសាធារណះប្រសើរឡើង»។
របាយការណ៍របស់ គជប ចុះផ្សាយនៅថ្ងៃទី២២ ខែមករា ឆ្នាំ២០១៤ ឲ្យដឹងថា សម្រាប់អាណត្តិទី២ មានសមាជិកក្រុមប្រឹក្សាសរុបចំនួន ៣៣២៤នាក់ ដែលចំនួននេះ កើនឡើង៧០នាក់ បើប្រៀបធៀប ទៅនឹងចំនួនសមាជិកក្រុមប្រឹក្សានៃអាណត្តិទី១។
កំណើនចំនួនសមាជិកក្រុមប្រឹក្សាដោយសារខេត្តមួយចំនួន គឺខេត្តត្បូងឃ្មុំ និងខណ្ឌចំនួន៣នៃរាជធានីភ្នំពេញ គឺខណ្ឌច្បារអំពៅ ខណ្ឌជ្រោយចង្វារ និងខណ្ឌព្រែកព្នៅ ត្រូវបានបង្កើតថ្មី។
ការបោះឆ្នោតជ្រើសរើសក្រុមប្រឹក្សារាជធានី ខេត្ត/ក្រុង/ស្រុក/ខណ្ឌ អាណត្តិទី២ នឹងប្រព្រឹត្តទៅនៅថ្ងៃទី១៨ ខែឧសភា ឆ្នាំ២០១៤ខាងមុខនេះ៕
No comments:
Post a Comment
yes