ក្រុមការងារដែលចាត់តាំងដោយគណបក្សប្រជាជនកម្ពុជា និងគណបក្សសង្គ្រោះជាតិ គ្រោងជួបពិភាក្សាគ្នាម្តងទៀតនៅសប្តាហ៍ក្រោយ ពាក់ព័ន្ធនឹងយន្តការបង្កើតគណៈកម្មការចម្រុះ ដើម្បីរៀបចំក្របខណ្ឌកំណែទម្រង់ការបោះឆ្នោតនាពេលខាងមុខនេះ។
អ្នកនាំពាក្យ និងជាសមាជិកក្រុមការងារគណបក្សសង្គ្រោះជាតិ លោក យ៉ែម ប៉ុញ្ញឬទ្ធិ មានប្រសាសន៍ប្រាប់ VOD នៅសៀលថ្ងៃពុធនេះថា គណបក្សសង្គ្រោះជាតិ និងគណបក្សប្រជាជនកម្ពុជា គ្រោងនឹងជួបចរចារគ្នាម្តងទៀត នៅសប្តាហ៍ក្រោយ ដើម្បីពិភាក្សាពីការបង្កើតយន្តការរៀបចំគណៈកម្មការចម្រុះ ដែលបានព្រមព្រៀងគ្នាថានឹងបង្កើតឡើង កាលពីព្រឹកថ្ងៃអង្គារម្សិលមិញ។ លោកបន្ថែមថា ការគ្រោងជួបចរចាជាថ្មីទៀតនេះមិនទាន់បានកំណត់ថាថ្ងៃណា ហើយនឹងមានសមាសភាពរបស់មន្ត្រីណាខ្លះចូលរួមនៅឡើយទេ។
ពាក់ព័ន្ធនឹងការលើកឡើងនេះ VOD មិនអាចទាក់ទងសុំការបញ្ជាក់ពីប្រធាន និងសមាជិកក្រុមការងារគណបក្សប្រជាជនកម្ពុជា ដែលដឹកនាំដោយលោក ព្រុំ សុខា បានទេ នៅរសៀលថ្ងៃពុធនេះ។
កាលពីព្រឹកថ្ងៃអង្គារម្សិលមិញនេះ ក្រុមការងារដែលចាត់តាំងដោយគណបក្សទាំងពីរ បានសម្រេចគ្នាជាឯកច្ឆន្ទរៀបចំនូវយន្តការកែទម្រង់ការបោះឆ្នោត ដោយបង្កើតគណៈកម្មការចម្រុះ ដែលមានសមាសភាពស្មើគ្នា មកពីគណបក្សមានអាសនៈក្នុងសភា ស្របតាមខ្លឹមសារកិច្ចព្រមព្រៀងនៃជំនួបកំពូលរវាងថ្នាក់ដឹកនាំគណបក្សទាំងពីរ កាលពីថ្ងៃទី១៦ខែកញ្ញា។ គណៈកម្មការចម្រុះនោះ នឹងបំពេញការងាររបស់ខ្លួន ទៅតាមមតិយោបល់ និងអានុសាសន៍ពីអង្គការសង្គមស៊ីវិលជាតិ និងអន្តរជាតិ ព្រមទាំងប្រទេសដៃគូរអភិវឌ្ឍន៍នានា ដើម្បីកែលម្អច្បាប់ និងកំណែទម្រង់ការបោះឆ្នោត នាពេលខាងមុខ៕
No comments:
Post a Comment
yes