ប្រមុខរាជរដ្ឋាភិបាលកម្ពុជា អំពាវនាវឲ្យកងកម្លាំងប្រដាប់អាវុធទាំងអស់ រួមគ្នាការពាររដ្ឋធម្មនុញ ការពារឯករាជភាព អធិបតេយ្យភាពដ៏ពេញលេញ នៃព្រះរាជាណាចក្រកម្ពុជា និងធានាឲ្យបាននូវប្រក្រតីភាព នៃស្ថាប័នជាតិ និងរដ្ឋបាលសាធារណៈគ្រប់ជាន់ថ្នាក់។
នៅក្នុងពិធីបិទសន្និបាតបូកសរុបការងារប្រចាំឆ្នាំ២០១៣ នៅថ្ងៃទី២០ ខែកុម្ភៈ នៅក្រសួងមហាផ្ទៃ នាយករដ្ឋមន្ត្រីលោក ហ៊ុន សែន បានថ្លែងថា កងកម្លាំងនគរបាលជាតិត្រូវសហការជាមួយកងកម្លាំងសមត្ថកិច្ចនានា ខិតខំប្រមូលផ្តុំបង្កើនវិធានការប្រមូលព័ត៌មាន ដើម្បីវិភាគ និងវាយតម្លៃព័ត៌មានដែលទាក់ទងនឹងសន្តិសុខជាតិ។ លោក បន្តថា រាល់ឧបាយកលនានាដែលប៉ុនប៉ងបំផ្លាញសន្តិភាព សន្តិសុខសង្គម ស្ថេរភាពនយោបាយ ភាពចលាចល ការប៉ុនប៉ងឲ្យមានអំពើហិង្សា និងភាពវឹកវរក្នុងសង្គម ត្រូវចាត់វិធានការតាមផ្លូវច្បាប់ «ជាមួយនឹងការគោរពយ៉ាងខ្ជាប់ខ្ជួន នូវគោលការណ៍លទ្ធិប្រជាធិបតេយ្យ សេរី ពហុបក្ស ការគោរពសិទ្ធិនិងសេចក្តីថ្លៃថ្នូរ របស់មនុស្ស។ ក្នុងសា្មរតីនេះ ត្រូវរួមគ្នាការពាររដ្ឋធម្មនុញ្ញ ការពារឯករាជ្យភាព អធិបតេយ្យភាព ដ៏ពេញលេញនៃព្រះរាជាណាចក្រកម្ពុជា»។
លោក ហ៊ុន សែន បន្តថា ក្នុងឆ្នាំ ២០១៣ កម្លាំងនគរបាលត្រូវបានដោះស្រាយដោយជោគជ័យក្នុងការទប់ស្កាត់បញ្ហាមួយចំនួន ប៉ុន្តែទន្ទឹមនឹងនេះ ក៏បានជួបបញ្ហាមួយចំនួនដោយសារបាតុកម្មរបស់គណបក្សសង្គ្រោះជាតិ ប្រឆាំងនឹងលទ្ធផលការបោះឆ្នោតកាលពីថ្ងៃទី២៧ ខែកក្កដា ឆ្នាំ២០១៣។
ប្រធានផ្នែកឃ្លាំមើលការរំលោភសិទ្ធិមនុស្ស នៃសមាគមអាដហុក លោក នី ចរិយា យល់ថា ពាក្យថាការពាររដ្ឋធម្មនុញ្ញហាក់បីដូចជាប្រទេសកម្ពុជាស្ថិតក្នុងគ្រាអាសន្ន ក្នុងការធ្វើឲ្យមានរំលោភរដ្ឋធម្មនុញ្ញ ឬក៏មានអ្នកមិនអនុវត្តន៍រដ្ឋធម្មនុញ តែជាក់ស្តែងគ្មានទិដ្ឋភាពនេះកើតឡើងទេ។ លោក បន្តថា សព្វថ្ងៃនេះ រដ្ឋាភិបាលកំពុងរំលោភរដ្ឋធម្មនុញដែលប្រើប្រាស់កម្លាំងប្រដាប់អាវុធ និងយោធាបង្ក្រាប មកលើប្រជាពលរដ្ឋ «មានតែការមិនអនុវត្ត រដ្ឋធម្មនុញ្ញនូវប្រការមួយចំនួន ទាក់ទងទៅនឹងការជាប់គាំងខាងនយោបាយ ដូចជាការបង្កើតរដ្ឋសភា ប៉ុន្តែបញ្ហាអស់នេះ មិនមែនមានន័យថា ជាភាពវឹកវរ ដែលគួរឲ្យយើងធ្វើការប្រកាសអាសន្ន រហូតទៅដល់ប្រកាសឲ្យកងទ័ពមកការពាររដ្ឋធម្មនុញ្ញ ខ្ញុំថាមិនមែនជាកាលៈទេសៈ ដែលត្រូវប្រកាសនោះទេ គឺយើងគ្មានកាលៈទេសៈនោះទេ»។
អ្នកនាំពាក្យគណបក្សសង្គ្រោះជាតិ លោក យឹម សុវណ្ណ មានប្រសាសន៍ថា កន្លងទៅគណបក្សសង្គ្រោះជាតិធ្វើបាតុកម្មដោយសន្តិវិធី ហើយអ្នកដែលរំលោភរដ្ឋធម្មនុញ្ញគឺជាគណបក្សប្រជាជនកម្ពុជា ដែលបានប្រើប្រាស់កម្លាំងប្រដាប់អាវុធ បង្ក្រាបបាតុករអហិង្សា។ លោក បន្តថា គណបក្សប្រជាជនកម្ពុជា ដែលប្រជុំសភាឯកបក្សដើម្បីបង្កើតរដ្ឋាភិបាលនោះ ក៏ផ្ទុយពីរដ្ឋធម្មនុញ្ញ ហើយការអំពាវនាវឲ្យកងកម្លាំងប្រដាប់អាវុធការពាររដ្ឋធម្មនុញ្ញនោះ គឺជាលេសដើម្បីការពារអំណាចលោក ហ៊ុន សែន «ការរៀបចំរដ្ឋាភិបាល ដែលមានឯកបក្ស ដែលមានតំណាងរាស្ត្រតែ៦៨រូប ចូលរួមបង្កើតរដ្ឋាភិបាលនោះគឺ ស្របរដ្ឋធម្មនុញ្ញ ហើយការដែលរឹបអូសដីធ្លី ប្រជាពលរដ្ឋដែលខុសច្បាប់ ហ្នឹងរំលោភសិទ្ធិចែងក្នុងរដ្ឋធម្មនុញ្ញ។ ការបិទសិទ្ធិសេរីភាពមិនឲ្យកម្មករ កម្មការិនី ធ្វើបាតុកម្ម នោះវារំលោភសិទ្ធិជួបប្រជុំ ដែលចែងក្នុងរដ្ឋធម្មនុញ្ញ ដូច្នេះគណបក្សសង្គ្រោះជាតិ អត់បានធ្វើអ្វីរំលោភរដ្ឋធម្មនុញ្ញទេ គឺគណបក្សប្រជាជនខ្លួនគាត់នោះតែម្តង ដែលរំលោភរដ្ឋធម្មនុញ្ញ»។
ទន្ទឹមនឹងអំពាវនាវឲ្យកងកម្លាំងប្រដាប់អាវុធទាំងអស់ ការពាររដ្ឋធម្មនុញ ឬការពាររដ្ឋាភិបាលរបស់លោកនេះ លោក ហ៊ុន សែន បញ្ជាឲ្យក្រសួងពាក់ព័ន្ធជួយសម្រួលក្នុងការបើកប្រាក់បៀរវត្ស៍ជូនដល់កម្លាំងប្រដាប់អាវុធឲ្យទៀងទាត់ និងទាន់ពេលវេលា៕
No comments:
Post a Comment
yes