កម្មករលើកបដាទាមទារប្រាក់ខែគោល ១៦០ដុល្លារ តវ៉ានៅក្បែរ
ទីស្ដីការគណៈរដ្ឋមន្ត្រី នៅថ្ងៃទី៣០ ធ្នូ ឆ្នាំ២០១៣
សហព័ន្ធសហជីព និងសមាគមធំៗសរុបចំនួន ១៨ ចាប់ផ្ដើមយុទ្ធនាការចែកចាយខិត្តប័ណ្ណដល់កម្មករកម្មការិនីនៅតាមរោងចក្រ សហគ្រាស ចាប់ពីថ្ងៃទី២១ ខែកុម្ភៈ នេះតទៅ ដើម្បីអំពាវនាវឲ្យកម្មករចូលរួមសកម្មភាព ពហិការមិនធ្វើការថែមម៉ោង វេទិកាសាធារណៈ និងមហាកូដកម្មចាប់ពីថ្ងៃទី១២ ខែមីនា ឆ្នាំ២០១៤។
សហភាពសហជីព នៅថ្ងៃសុក្រ ទី២១ ខែកុម្ភៈ បានចេញសេចក្ដីប្រកាសព័ត៌មានមួយ សុំឲ្យភ្នាក់ងារសិទ្ធិមនុស្សជាតិ និងអន្តរជាតិ ស្ថានទូត អ្នកសារព័ត៌មានជាតិ និងអន្តរជាតិ ជួយឃ្លាំមើលសកម្មភាពចែកចាយខិត្តប័ណ្ណនេះ ដើម្បីកុំឲ្យមានការរារាំង និងឃាត់ខ្លួនអ្នកចែកចាយពីសំណាក់អាជ្ញាធរដែនដី។
លោក រ៉ុង ឈុន មានប្រសាសន៍នៅថ្ងៃសុក្រ ទី២១ កុម្ភៈ ថា ខិត្តប័ណ្ណដែលត្រូវចែកចាយនោះមានចំនួន ២០ម៉ឺនច្បាប់ ចែកជូនដល់កម្មករដែលជាសមាជិករបស់សហព័ន្ធសហជីព និងសមាគមចំនួន១៨ មន្ត្រីរាជការ គ្រូបង្រៀន និងប្រជាពលរដ្ឋទូទាំងប្រទេស។
កូដកម្មដែលគ្រោងធ្វើនៅខែមីនា នោះ ក្នុងគោលបំណងទាមទារឲ្យរដ្ឋាភិបាល និងនិយោជក ដោះស្រាយបញ្ហាចំនួន ៧ចំណុច។ ទី១ សុំដោះលែងជនជាប់ចោទទាំង ២១នាក់ និងទម្លាក់ចោលការចោទប្រកាន់ ២៣នាក់ទាំងស្រុង។ ទី២ ស្នើសុំឲ្យមានការចរចាដំឡើងប្រាក់ឈ្នួលគោល ១៦០ដុល្លារឡើងវិញ។ ទី៣ ត្រូវដាក់ទោសដល់ជនល្មើសដែលបានប្រើហិង្សា និងសម្លាប់កម្មករ ព្រមទាំងផ្តល់សំណងជំងឺចិត្តដល់ជនរងគ្រោះដែលបាត់បង់ជីវិត រងរបួស និងជាប់ឃុំឃាំង។ ទី៤ រដ្ឋាភិបាលត្រូវដកបម្រាមនៃការជួបជុំជាសាធារណៈមិនឲ្យលើសពី ១០នាក់ចេញ។
ទី៥ តំណាងក្រុមហ៊ុនត្រូវដកបណ្ដឹងដែលប្រឆាំងសហជីព និងកម្មករនិយោជិកទាំងអស់។ ទី៦ និយោជកត្រូវទទួលយកកម្មករដែលបានបញ្ឈប់ពីការងារ ឲ្យចូលធ្វើការវិញ និងត្រូវបង់ប្រាក់រំឭកដល់ពួកគេ និងទី៧ និយោជកត្រូវផ្តល់ប្រាក់ឈ្នួល និងប្រាក់រង្វាន់ដល់កម្មករ ក្នុងអំឡុងពេលកម្មករធ្វើកូដកម្មកន្លងមក។
No comments:
Post a Comment
yes