ប្រទេសអូស្ត្រាលីចង់ឃើញប្រព័ន្ធបោះឆ្នោតនៅកម្ពុជាត្រូវបានកែទម្រង់ឲ្យមានភាពល្អប្រសើរ

ក្នុងដំណើរបំពេញបេសកកម្មការងារនៅប្រទេសអូស្ត្រាលី លោកប្រធាន សម រង្ស៊ី លោកស្រី ជូឡុង ស៊ូមូរ៉ា លោក អេង ឆៃអ៊ាង កញ្ញា គឹម មនោវិទ្យា  បានជួបពិភាក្សាការងារជាមួយរដ្ឋ​មន្ត្រី​ក្រសួងការបរទេស អូស្ត្រាលី លោកស្រី Julie Bishop និងជួបឥស្សរជនសំខាន់ៗនៅក្នុងស្ថាបន រដ្ឋសភា ព្រឹទ្ធសភា និង រដ្ឋាភិបាលអូស្ត្រាលី ជាច្រើនរូបទៀត នៅ​ទីក្រុង កង់​បេរា ប្រទេសអូ​ស្ត្រា​លី ។

នៅក្នុងឱកាសដែលលោកប្រធាន សម រង្ស៊ី និងសហការី ជួបជាមួយរដ្ឋមន្ត្រីការបរទេស​អូស្ត្រាលី លោកស្រី Julie Bishop បានសន្យាថា​នឹង​ឃ្លាំមើល​ដំណើរការ​កែ​ទម្រង់​ការ​បោះឆ្នោត​នៅ​កម្ពុជា ដោយ​យកចិត្តទុកដាក់ ព្រោះអូស្ត្រាលី ចង់​ឃើញ​ប្រព័ន្ធ​បោះឆ្នោត​នៅ​កម្ពុជា ត្រូវ​បាន​កែទម្រង់​ឲ្យមាន​ភាពល្អប្រសើរ​ ។​

​សូមជំរាបថា ប្រព័ន្ធបោះឆ្នោតនៅកម្ពុជា ពីមួយអាណត្តិទៅមួយអាណត្តិ ភាពមិនប្រក្រតី កើត មានកាន់តែខ្លាំងឡើងៗ ក្រោមការដឹកនាំរបស់លោក អ៊ឹម សួស្តី ជាប្រធាន និងលោក ទេព នីថា ជាអគ្គលេខាធិការ នៃរដ្ឋាភិបាលគណបក្សប្រជាជន ក្រោមការដឹកនាំរបស់លោក ហ៊ុន សែន ដែលគណៈកម្មាធិការជាតិរៀបចំការបោះឆ្នោត បានធ្វើជាឈ្នាន់សម្រាប់ការលួចបន្លំសន្លឹកឆ្នោត បំពេញមហិច្ឆិតា គណបក្ស​ប្រជាជននោះ ។

សម្រាប់អាណត្តិទី៥នេះ គណបក្សសង្គ្រោះជាតិ បានទាមទារឲ្យមានការការទម្រង់ស្ថាប័នមួយ នេះជាដាច់ខាត ដើម្បីឲ្យការបោះឆ្នោតអាណត្តិក្រោយៗទៀត មានភាពត្រឹមត្រូវ និងយុត្តិធម៌ ស្របតាមឆន្ទៈពលរដ្ឋដែលជាម្ចាស់ឆ្នោត ។

ក្នុងនោះផងដែរ នៅបន្ទាប់ពីការជជែកគ្នាជាបន្តបន្ទាប់ រវាងគណៈកម្មការចំរុះរបស់គណបក្ស សង្គ្រោះជាតិ និងគណបក្សប្រជាជន ជាថ្មីម្តងទៀតនៅថ្ងៃទី២៤ មីនា ដើមសប្តាហ៏នេះ គណបក្ស សង្គ្រោះជាតិ បានលើកយកប្រធានបទ ​កំណែ​ទម្រង់​​ស្ថាប័ន​រៀបចំ​ការបោះ​ឆ្នោតជាអាទិ​ភាព​ដើម្បីធានា​ឯករាជ្យភាព និង​អព្យាក្រឹតភាពនៃការបោះឆ្នោត ជជែកជាមួយគណបក្សប្រជាជន ចាប់ពីវេលាម៉ោង៩ព្រឹក នៅវិមានព្រឹទ្ធសភា ៕