លោក ទេព នីថា អគ្គលេខាធិការគណៈកម្មាធិការជាតិរៀបចំការ
បោះឆ្នោត (រូបថត៖ តាំង វីដា)
លិខិតរបស់ គ.ជ.ប ដែលធ្វើឡើងបដិសេធនឹងបម្រាមរបស់សាលារាជធានីភ្នំពេញនេះ បានស្នើឲ្យអាជ្ញាធរនៅរាជធានីភ្នំពេញ និងនៅតាមបណ្តាខេត្តទាំងអស់ រក្សាសន្តិសុខ សម្រាប់ការដង្ហែក្បួនរបស់គណបក្សនយោបាយ ដែលធ្វើកាឃោសនាសម្រាប់ការបោះឆ្នោតក្រុមប្រឹក្សារាជធានី ខេត្ត ក្រុង ស្រុក ខណ្ឌ អាណត្តិទី២ ឆ្នាំ២០១៤។
អគ្គលេខាធិការគណៈកម្មាធិការជាតិរៀបចំការបោះឆ្នោត លោក ទេព នីថា ប្រាប់ VOD នៅថ្ងៃពុធនេះថា គ.ជ.ប បានសម្រេចរួចហើយ ដោយស្មើឲ្យអាជ្ញាធរនៅគ្រប់រាជធានីខេត្ត ត្រូវបង្កលក្ខណៈងាយស្រួល ដល់គ្រប់គណបក្សទាំងអស់ ក្នុងការធ្វើយុទ្ធនាការឃោសនាបោះឆ្នោត ឲ្យស្របទៅតាមច្បាប់ បទបញ្ជា និងនីតិវិធីក្នុងការបោះឆ្នោត «គជប បានសម្រេចហើយ សូមឲ្យអាជ្ញាធររាជធានីខេត្តបង្កលក្ខណៈ ដល់គណបក្សដើម្បីធ្វើការឃោសនា ឲ្យស្របតាមច្បាប់ ព្រមទាំងបទបញ្ជា និងនីតិវិធីនៃការបោះឆ្នោត។ កុំប្រើពាក្យរារាំង ខុស អត់មានអ្នកណារារាំងទេ សាលារាជធានីភ្នំពេញស្នើមកគណៈកម្មការបោះឆ្នោត រាជធានីភ្នំពេញ ដោយយោងតាមសភាពការ សន្តិសុខ សុវត្ថិភាពជាក់ស្តែង របស់រាជធានី និងសណ្តាប់ធ្នាប់របស់រាជធានីគឺសុំឲ្យអាជ្ញាធរបោះឆ្នោត សុំឲ្យគណបក្សនយោបាយ ធ្វើការឃោសនា ឬក៏ជួបជុំ សកម្មជនអ្នកបោះឆ្នោតរបស់ខ្លួននៅក្នុងទីស្នាក់ការគណបក្ស នេះជាការស្នើសុំ មិនមែនជាការរារាំងទេ»។
ប៉ុន្តែលោក ទេព នីថា បន្តថា បម្រាមរបស់សាលារាជធានីភ្នំពេញដែលផ្ញើមក គ.ជ.ប ដោយឲ្យគណបក្សទាំងអស់ធ្វើការឃោសនាបោះឆ្នោត តែនៅតាមទីស្នាក់ការរបស់ខ្លួន ដោយហេតុផលសន្តិសុខក្នុងរាជធានីនោះ មិនមែនជាការរារាំងការឃោសនានោះទេ។
ការផ្លាស់ប្តូរជំហររបស់ គ.ជ.ប នេះ ធ្វើឡើងបន្ទាប់ពីមានការរិះគន់ថា គ.ជ.ប មិនឯករាជ្យ ហើយអាជ្ញាធររាជធានីភ្នំពេញ បានប្រើអំណាចរំលោភលើ គ.ជ.ប ក្នុងការចាត់ចែងរៀបចំការបោះឆ្នោត។
នាយកប្រតិបត្តិ គណៈកម្មការដើម្បីការបោះឆ្នោតដោយសេរី និងយុត្តិធម៌ ហៅកាត់ថា ខុមហ្វ្រែល លោក គល់ បញ្ញា បានសូមស្វាគមន៍ចំពោះការផ្លាស់ប្តូរជំហរបស់ គ.ជ.ប ជាថ្មីនេះ។
លោកចាត់ទុកថា នេះជាការបង្ហាញឆន្ទៈក្នុងការធ្វើឲ្យការបោះឆ្នោត ប្រព្រឹត្តទៅប្រកបដោយសេរី និងមិនមានភាពភ័យខ្លាច ដោយសារសកម្មភាពភាពរបស់អជ្ញាធរកន្លងមកជាការជ្រៀតជ្រែកក្នុង កិច្ចការបោះឆ្នោត ដែលជាកររំលោភទៅលើច្បាប់បោះឆ្នោតយ៉ាងធ្ងន់ធ្ងរ «ខ្ញុំគិតថា វាជាឆន្ទៈវិជ្ជមានមួយ នៅក្នុងការអនុវត្តសមត្ថកិច្ច របស់ខ្លួន ហើយជាការធ្វើការណែនាំទៅអាជ្ញាធរ ដើម្បីសហការ ប៉ុន្តែរឿងមិនសហការនេះជាការទទួលខុសត្រូវរបស់អាជ្ញាធរ ហើយប្រសិនជាមានបញ្ហាដែលអាជ្ញាធរមិនសហការ គជប មានសិទ្ធិ នៅក្នុងច្បាប់បោះឆ្នោត គេអាចចោទប្រកាន់ក្នុងការរារាំង ហើយ គជប គេអាចដាក់ពិន័យរហូតដល់មានការដកសិទ្ធិមួយចំនួន ប្រសិនជាចាំបាច់»។
ប្រធានគណបក្សសង្គ្រោះជាតិ លោក សម រង្ស៊ី ធ្លាប់ផ្ញើលិខិតទៅប្រធានគណៈកម្មាធិការជាតិរៀបចំការបោះឆ្នោត(គជប) លោក អ៊ឹម សួស្តី ចាត់វិធានការជាបន្ទាន់ចំពោះអាជ្ញាធរ ដែលរំលោភច្បាប់ បទបញ្ជា និងនីតិវិធី ដោយរារាំងសិទ្ធិបេក្ខជន និងគណបក្សក្នុងការធ្វើយុទ្ធនាការឃោសនាបោះឆ្នោត ជ្រើសរើសក្រុមប្រឹក្សារាជធានី ខេត្ត ក្រុង ស្រុក និងខណ្ឌ។
ខណៈដែលអាជ្ញាធររាជធានីភ្នំពេញ ដាក់បម្រាមហែក្បួនឃោសនានេះ គឺមានតែគណបក្សសង្គ្រោះជាតិមួយប៉ុណ្ណោះ ក្នុងចំណោមគណបក្សចំនួន៥ ដែលបានចុះឈ្មោះបោះឆ្នោតអសកលនេះ បានធ្វើយុទ្ធនាការហែក្បួនទាំងនៅរាជធានី និងតាមខេត្ត៕
No comments:
Post a Comment
yes