កម្លាំងសាមគ្គីពីប្រជាពលរដ្ឋ ជាចំណែកមួយយ៉ាងសំខាន់ក្នុងដំណើរឆ្ពោះទៅរកការបោះឆ្នោត ដើម្បីនាំមកនូវការផ្លាស់ប្ដូរ

ដោយ៖យ៉ន លីណេត

គណបក្សសង្គ្រោះជាតិ បានបោះមួយជំហានទៅមុខក្នុងរយៈពេលដ៏ខ្លី តែមួយជំហាន របស់​គណ​បក្សសង្គ្រោះជាតិ ជាជំហានដែលប្រុងប្រយ័ត្ន ក្នុងដំណើរវែងឆ្ងាយ​ប្រកបដោយភាព​រឹង​មាំ ពិតប្រាកដ និងពោរពេញ ទៅដោយកម្លាំងសាមគ្គីមូលដ្ឋានដ៏ខ្លាំងក្លា ពីប្រជាពលរដ្ឋ ក្នុង​ដំណើរឆ្ពោះទៅរកការបោះឆ្នោត ដើម្បីនាំមកនូវការផ្លាស់ប្តូរនៅពេលខាងមុខ ។

អ្នកនាំពាក្យគណបក្សសង្គ្រោះជាតិ លោក យ៉ែម បុញ្ញឬទ្ធិ ​បានសរសេរនៅលើបណ្ដាញសង្គម​ហ្វេស​ប៊ុកផ្ទាល់របស់លោកថា ប្រជាពលរដ្ឋត្រូវរួមគ្នាជាធ្លុងមួយ​ ក្នុងនាមជាខ្មែរ ដែលពោរ​ពេញ​​ទៅដោយសក្តានុពល នៃការសាមគ្គី គំនិត ឆន្ទៈ ឧត្តមគតិ និងគោលបំណងរួមមួយ គឺ​រួម​គ្នាសង្រ្គោះជាតិខ្មែរ ដោយបង្កើតនូវភាព អស្ចារ្យមួយសម្រាប់មូលដ្ឋាន​គ្រឹះរបស់អ្នក​ប្រជាធិប​តេយ្យ ក្នុងការជំរុញឲ្យមានការចូលរួម ពីប្រជាពលរដ្ឋក្នុងមូលដ្ឋាន ឲ្យរួមចំណែកបំពេញកាត​ព្វកិច្ច ក្នុងការកសាង និងអភិវឌ្ឍសង្គមមូលដ្ឋានរបស់ខ្លួនដោយផ្ទាល់ ។

លោកបានបន្តថា ថ្នាក់ដឹកនាំគណបក្សសង្គ្រោះជាតិ បានពុះពារគ្រប់ឧបសគ្គ ទើបទទួល​បាន​ការគាំទ្រ ការជឿទុកចិត្តពីប្រជាពលរដ្ឋ លើគោលនយោបាយ លើការគ្រប់គ្រងដឹកនាំ ក្នុង​គោល​បំណងធ្វើកំណែទម្រង់រដ្ឋ ដើម្បីផលប្រយោជន៍ប្រជាជាតិ តាមរយៈការខិតខំ សាមគ្គី​របស់​ក្រុម​ដឹកនាំ ការបណ្តុះមនសិការជាតិ ក្នុងការចូលរួមចំណែកពីប្រជាពលរដ្ឋម្នាក់ៗ ដែល​ជា​​ចលករ និងជាសមាជិកសង្គម ។

លោកបានបន្ថែមទៀតថា ការពង្រឹង និងបណ្តុះបណ្តាល របស់គណបក្សសង្គ្រោះជាតិ ដល់រច​នាសម្ព័ន្ធក្រុមដឹកនាំមូលដ្ឋាន គឺជាកត្តាចាំបាច់មួយ និងជាមូលដ្ឋានគ្រឹះដែលនាំទៅរកភាព​ជោគ​ជ័យ តាមរយៈការបោះឆ្នោតដោយ សេរី ត្រឹមត្រូវ សន្តិវិធី និងយុត្តិធម៌ ។ ជាពិសេស ក្នុង​នាម​ជាអ្នកដឹកនាំ ត្រូវបណ្តុះបណ្ដាលអ្នកដឹកនាំ ដែលជាអ្នកបន្តវេនជំនួស ដែលមានភាពមោះ​មុត អង់អាច ក្លាហាន នៅតាមមូលដ្ឋាន ដែលជារបាំងការពារដ៏ប្រសើរជាទីបំផុតសម្រាប់ការ​ឆ្លើយ​តបទៅនិងការកសាងជំនឿចិត្តឲ្យថ្នាក់ដឹកនាំជាតិ មួយជំហានម្តង មួយជំហានម្ដង ពុះ​ពារ​​គ្រប់ឧបសគ្គជាមួយគ្នា ដើម្បីចូលរួមធ្វើកំណែទម្រង់ទាំងផ្ទៃក្នុងគណបក្ស ក៏ដូចជាសង្គម​ជាតិទាំងមូលផងដែរ ។

គួរបញ្ជាក់ថា ការបណ្តុះបណ្តាល និងពង្រឹងសមត្ថភាពជាប្រចាំនេះហើយ ដែលជម្រុញឲ្យ​សកម្ម​ជន និងប្រជាពលរដ្ឋ ចូលរួមយ៉ាងសកម្មគ្រប់សកម្មភាព ដើម្បីជម្រុញ ឲ្យមានការផ្លាស់ ប្តូរមួយយ៉ាងឆាប់រហ័ស តាមរយ:ការកែប្រែផ្នត់គំនិតរបស់ពួកគេ ៕