តំណាងរាស្រ្តគណបក្សប្រឆាំង សម រង្ស៊ី ចុះទៅពិនិត្យស្ថានភាពរស់នៅរបស់ ប្រជាពលរដ្ឋ សហគមន៏បូរីកីឡាដែលត្រូវបានក្រុមហ៊ុន ផាន អ៊ីម៉ិច យកឲ្យទៅរស់នៅតំបន់ ភ្នំបាត ស្រុកពញ៉ាឭ ខេត្តកណ្តាល

ក្រុមអ្នកតំណាងរាស្រ្តគណបក្ស សម រង្ស៊ី ចំនួន ៤រូប រួមមានលោកស្រី មួរ សុខហួរ អ្នក​តំណាង​រាស្រ្តមណ្ឌលកំពត លោកស្រី លី ស្រីវីណា  អ្នកតំណាងរាស្រ្ត មកពី​មណ្ឌល​ភ្នំពេញ លោក ឃឹម ឡាក់គី អ្នកតំណាងរាស្រ្តមកពីមណ្ឌលកណ្តាល និងលោក​សុវណ្ណ ពីសាខា អ្នកតំណាង​រាស្រ្ត​មណ្ឌលកំពង់ចាម កាលពីរសៀល ថ្ងៃទី១២ ខែមករា បានចុះ​ពិនិត្យ ស្ថាន ភាពរស់នៅ របស់​អ្នក​ភូមិសហគមន៏បូរីកីឡា ចំនួនជាង២០០គ្រួសារ ដែលបាន ក្រុមហ៊ុន​ផានអ៊ីម៉ិច ដឹក​យក​ទៅចាក់​ចោល​នៅតំបន់ភ្នំបាត ស្រុកពញាឮ ខេត្តកណ្តាល ដែលមាន​ចំងាយ​ប្រហែល ៤០គ.ម ពីទីក្រុងភ្នំពេញ ដោយមិនមានការទទួលខុសត្រូវ។

លោកស្រី មួរ សុខហួរ នៅក្រោយពីត្រឡប់ពីការពិនិត្យស្ថានភាពរស់នៅ របស់ពលរដ្ឋបាន លើក​ឡើងថា ការយកពលរដ្ឋទៅចាក់ចោលដូច្នេះ គឺក្រុមហ៊ុនផានអ៊ីម៉ិច របស់លោកស្រី ស៊ុយ សុផាន ហាក់ប្រមាទទៅលើពលរដ្ឋយ៉ាងធ្ងន់ធ្ងរដូចជាសត្វធាតុ។ លោកស្រីថា វាពិត​ជាលំបាកគ្មាន​អ្វីប្រៀប​ផ្ទឹមបាននោះទេ ដោយសារនៅតំបន់រស់នៅថ្មីនោះ ពលរដ្ឋមាន​តែ​កៅស៊ូតង់ ចាន ឆ្នាំងបន្តិច​បន្តួច​បន្សល់ពីផ្ទះចាស់ អ្នកខ្លះគ្មានក្រែស្នាក់នៅតែឥតជញ្ជាំង គ្មានបង្គន់​អនាម័យ​ប្រើប្រាស់ គ្មានទឹក​ភ្លើង​ប្រើប្រាស់សមរម្យ ជាពិសេសមានការខ្វះខាត​ស្បៀង​អាហារយ៉ាងខ្លាំង ហើយអ្នកខ្លះ​កំពុងធ្លាក់​ខ្លួន​ឈឺថែមទៀត។

លោកស្រីលើកឡើងថា ការបើកដៃពីសំណាក់រដ្ឋាភិបាល​ អោយក្រុមហ៊ុនផានអ៊ីម៉ិច​បណ្តេញ ពល​រដ្ឋយកទៅចោលដូច្នេះ គឺពលរដ្ឋរងទុកលំបាកលើសពីសម័យអតីតកាល ដែលពលរដ្ឋ ខ្មែរភៀស​ខ្លួន​ទៅរស់នៅជុំរំជាយដែនខ្មែរថៃ កាលពីអតីតកាលនោះ។

លោកស្រី មួរ សុខហួរ បន្តថា អ្វីដែលក្រុមហ៊ុនផានអ៊ីម៉ិច របស់លោកស្រី ស៊ុយ សុផាន ដែល គេស្គាល់ថា ជាមនុស្សស្និតទៅនឹងមន្រ្តីជាន់ខ្ពស់ក្នុងជួរគណបក្ស កាន់អំណាច ក្រុមហ៊ុនេះ បាន​កំពង់អនុវត្តខុសកិច្ចសន្យារបស់ខ្លួនដែលថា សាងសង់អាគារចំនួន១០ ផ្តល់ជូនពលរដ្ឋ ចំនួន ១៧៧៦គ្រួសារនោះ ប៉ុន្តែនៅពេលនេះក្រុមហ៊ុនផានអ៊ីម៉ិច ទើបបានសាងសង់អាគារ បានតែ​ចំនួន​៨អាការតែប៉ុណ្ណោះ ហើយពលរដ្ឋដែលនៅសេសសល់ជាង៣០០គ្រួសារ ត្រូវ​ក្រុមហ៊ុន ប្រើកង​កម្លាំង​រាប់រយនាក់ បណ្តេញចេញទាំងបង្ខំ ដោយមិនទទួលខុសត្រូវដូច្នេះ ទៅវិញ។ លោកស្រីថា ទង្វើរដ្ឋាភិបាលដែលបើកដៃអោយក្រុមហ៊ុនអនុវត្តបណ្តេញចេញដូច្នេះ គឺកំពុងតែ​ធ្វើបាប​ពល​រដ្ឋរ​បស់ខ្លួនយ៉ាងធ្ងន់ធ្ងរ។

មិនខុសពីនេះឡើយ ពលរដ្ឋម្នាក់ឈ្មោះ ឡាយ សំអុល ដែលបានរស់នៅតំបន់បូរីកីឡា ចាប់​តាំង​ពីខែកញ្ញា ឆ្នាំ១៩៩៩ មក ហើយត្រូវបានក្រុមហ៊ុនដឹកទៅចាក់ចោល នៅតំបន់ ភ្នំបាត បានថ្លែងថា ទោះបីក្រុមហ៊ុនសន្យាថាផ្តល់ដីអោយរស់នៅតំបន់ភ្នំបាតក៏ដោយ ក៏មកទល់ពេល នេះគ្រួសារលោក និងគ្រួសារពលរដ្ឋមួយចំនួនទៀត នៅមិនទាន់ទទល់់បានដីកម្មសិទ្ឋិ របស់​ខ្លួន នោះឡើយ។

ប្រភព​​ព័ត៌មានចុងក្រោយអោយដឹងថា​ មកទល់ពេលនេះមានពលរដ្ឋចំនួន៨០គ្រួសារ​ នៅ​តំបន់​ភ្នំបាត ត្រូវបានក្រុមហ៊ុនចែកដីកម្មសិទ្ឋិអោយ ប៉ុន្តែនៅចំនួន១៩៧គ្រួសារទៀត នៅ​តំបន់ភ្នំបាតនោះ ពួកគាត់អះអាងថា នៅមិនទាន់ទទួលបានដីកម្មសិទ្ឋិនៅឡើយ។ ចំណែក​ពលរដ្ឋចំនួន​ជាង១០០​គ្រួសារ ពុំទាន់ចាកចេញពីតំបន់បូរីកីឡានៅឡើយទេ ដោយនៅបន្តតវ៉ា សុំការអភិវឌ្ឍន៏​សង់ផ្ទះ​នៅ​នឹងកន្លែងជូនពួកគាត់វិញ។ រីឯពលរដ្ឋ៣០នាក់ក្នុងចំណោមជាង ១០០គ្រួសារនេះ ត្រូវបាន​អាជ្ញា​ធរ​រាជធានីភ្នំពេញ ចាប់បញ្ជូនខ្លួនទៅឃុំនៅមណ្ឌល​សង្គមកិច្ច​ព្រៃស្ពឺ ជាយក្រុងភ្នំពេញ នឹងពលរដ្ឋ​ចំនួន៨នាក់ ដែលត្រូវអាជ្ញាធរចាប់ខ្លួនដាក់​ពន្ឋនាគារ​ព្រៃសរ នៅក្នុងព្រឹត្តការណ៏​បណ្តេញចេញ​កាលពីថ្ងៃទី០៣ មករា រហូត មកទល់​ពេល​នេះ មិនទាន់មានការដោះលែងនៅឡើយ ៕