កសិករនៅក្នុងស្រុកអង្គស្នួល ខេត្តកណ្តាល ភ្ជួរដាស់ស្រែដែលគ្មានទឹកកន្លងមក
ភ្នំពេញៈ គ្រោះរាំងស្ងួត នៅក្នុងរដូវវស្សាឆ្នាំនេះ បានអូសបន្លាយ រយៈពេលជាងមួយខែមកហើយ ធ្វើឲ្យដំណាំស្រូវចំនួន ១០,៦៩៤ ហិកតា បានរងការខូចខាតទាំងស្រុង និង ១៣៥,៤៤៤ ហិកតាទៀតកំពុងប្រឈមយ៉ាងខ្លាំងនូវកង្វះទឹកស្រោចស្រព។
យោងតាមរបាយការណ៍ក្រសួងកសិកម្ម ដែលបានចុះកាលបរិច្ឆេទ ថ្ងៃទី ១៥ ខែសីហា ឆ្នាំ ២០១២ ដែលភ្នំពេញប៉ុស្តិ៍ទទួលបានកាលពីម្សិលមិញ បានបង្ហាញថា ការបង្កបង្កើនផលស្រូវ នៅក្នុងឆ្នាំនេះ មានការថយចុះជាងឆ្នាំមុន ប្រមាណជាង ៦ ភាគរយ ពោលគឺការបង្កបង្កើនផលស្រូវ នៅក្នុងឆ្នាំនេះ សរុបបានចំនួនជិត ១,៩៣ លានហិកតា តិចជាងឆ្នាំមុនចំនួន១១០,៨៤០ ហិកតា។
ទោះជាបែបណាក្ដី ប៉ុន្មានថ្ងៃកន្លងមកនេះ ភ្លៀងបានធ្លាក់នៅតាមតំបន់នៃខេត្តចំនួន ១៤ ដែលបានជួបភាពរាំងស្ងួត ដែលក្រុមអ្នកជំនាញកសិកម្ម មានក្ដីរំពឹងថា វាអាចនឹងជួយសង្គ្រោះស្រូវមួយចំនួនដែលកំពុងប្រឈមនឹងកង្វះទឹក ស្រោចស្រពនេះ។
លោកពេជ្រ រម្យនា អនុប្រធាននាយកដ្ឋានដំណាំស្រូវ នៃក្រសួងកសិកម្ម បានថ្លែងកាលពីម្សិលមិញថា ដោយផ្អែកលើស្ថានភាពអាកាសធាតុនាពេលបច្ចុប្បន្ន ភ្លៀងនឹងបន្តធ្លាក់រាយប៉ាយនៅគ្រប់ទីកន្លែង ដែលអាចអនុគ្រោះដល់ការលូតលាស់ដំណាំស្រូវ។
លោកថ្លែងថា៖«ដោយសារឥទ្ធិពលនៃព្យុះត្រូពិច និងប៉ាស៊ីហ្វិច ដែលកំពុងគ្របដណ្ដប់លើតំបន់អាងទន្លេមេគង្គនាពេលបច្ចុប្បន្ននេះ យើងមានជំនឿថា ដំណាំស្រូវនៅលើផ្ទៃដីស្រែមួយចំនួន ដែលបានប្រឈមនឹងភាពរាំងស្ងួតនាពេលកន្លងមក នឹងអាចជួយសង្គ្រោះបានមកវិញ»។
ថ្មីៗនេះ ក្រសួងកសិកម្មបានសហការជាមួយក្រសួងធនធានទឹក ចុះជួយអន្តរាគមន៍បូមទឹកបញ្ចូលស្រែ ដើម្បីជួយសង្គ្រោះស្រូវសន្ទូងរបស់ប្រជាកសិករ បានចំនួនជាងពីរម៉ឺនហិកតា និងបានរៀបចំផ្ដល់ស្រូវពូជមួយចំនួន ជូនប្រជាកសិករ ដែលស្រូវសន្ទូងរបស់ពួកគាត់ រងការខូចខាត ដោយភាពរាំងស្ងួតនាពេលកន្លងមក ដើម្បីឲ្យពួកគាត់អាចធ្វើការដាំដុះនៅចុងរដូវវស្សានេះ។
ទោះជាបែបណាក្ដី លោកអ៊ូ អិត អាយុ ៤៦ ឆ្នាំ ប្រជាកសិករ នៅស្រុកថ្មពួក ដែលស្រូវសន្ទូងជាងពីរហិកតារបស់គាត់ បានរងផលប៉ះពាល់ ដោយសារភាពរាំងស្ងួត បានថ្លែងថា ភ្លៀងបានចាប់ផ្ដើមធ្លាក់ជាបន្តបន្ទាប់ ប៉ុន្តែមិនច្រើននោះទេ ដែលជាហេតុធ្វើឲ្យលោកនៅតែមានក្ដីកង្វល់អំពីកង្វះខាតស្បៀង សម្រាប់ផ្គត់ផ្គង់ជីវភាពគ្រួសារនៅក្នុងឆ្នាំនេះ។
លោកថ្លែងថា៖«ខ្ញុំមានសង្ឃឹមតិចតួចបំផុតថា ស្រូវរបស់ខ្ញុំនៅក្នុងឆ្នាំនេះ អាចផ្ដល់ផលបានបីតោនក្នុងមួយហិកតា ស្មើនឹងឆ្នាំចាស់ ព្រោះភាពរាំងស្ងួតខ្លាំងពេកធ្វើឲ្យស្រូវអន់គុណភាព»។
លោក ហួត សុធី អនុប្រធានមន្ទីរកសិកម្មខេត្តបន្ទាយមានជ័យ បានឲ្យដឹង កាលពីម្សិលមិញថា នៅឆ្នាំនេះ ប្រជាកសិករទូទាំងខេត្តបន្ទាយមានជ័យ បានធ្វើស្រែរួចជាស្ថាពរលើផ្ទៃដីចំនួនជាង២៣ ម៉ឺនហិកតា ប៉ុន្តែ គ្រោះរាំងស្ងួតខ្លាំងជាងមួយខែកន្លងមកនេះ បានធ្វើឲ្យស្រូវសន្ទូងជាងបីម៉ឺនហិកតា ក្នុងស្រុកស្វាយចេក ព្រះនេត្រព្រះ ថ្មពួក អូរជ្រៅ មង្គលបុរី និងក្រុងសិរីសោភ័ណ ប្រឈមទៅនឹងជំងឺ និងកង្វះទឹកស្រោចស្រព។ លោកថ្លែងថា៖«បើសិនជាគ្រោះរាំងស្ងួត នៅតែបន្តអូសបន្លាយ ស្រូវសន្ទូងនឹងប្រឈមការខូចខាតទាំងស្រុង ព្រោះបច្ចុប្បន្ន ដីស្រែមួយចំនួនស្ងួតប្រេះបែកក្រហែង និងមានជំងឺក្រាស៊ីថែមទៀត»៕
No comments:
Post a Comment
yes