កាលពីថ្ងៃទី១២ វិច្ឆិកា នៅភូមិក្បាលដំរី សង្កាត់កាកាប ខណ្ឌដង្កោ បន្ទាប់ពីចប់ពិធីបុណ្យអុំទូក អកអំបុក និងសំពះព្រះខែរួចមក ក្រុមគ្រួសារមួយ ក្នុងនោះមានបងថ្លៃ ប្អូនថ្លៃ និងបងប្អូនបង្កើតសរុបទាំងអស់១០នាក់ មានស្រី មានប្រុស បានជួបជុំគ្នាផឹកស្រាទំពាំងបាយជូរ ក្លែមជាមួយត្រីខកំប៉ុង និងផ្អកកំពឹស។ កម្មវិធីចាប់ផ្តើមតាំងពីម៉ោង១១ព្រឹក រហូតដល់ម៉ោង៦ល្ងាច ហើយមុននឹងបញ្ចប់កម្មវិធីក៏បានផឹកស្រា.សអស់១លីត្រទៀត ទើបបែកគ្នាទៅផ្ទះរៀងៗខ្លួន។ លុះដល់ព្រឹកថ្ងៃទី១៣ វិច្ឆិកា ស្រាប់តែមានមនុស្ស៣នាក់មានអាការៈដូចជាពុលអ្វីមួយ គឺចេះតែខ្សោយអស់កម្លាំង វិលមុខក្អួតចង្អោរពេញមួយយប់ រហូតដល់ព្រឹកថ្ងៃទី១៤ វិច្ឆិកា ក៏បញ្ជូនទៅព្យាបាលនៅមន្ទីរពេទ្យព្រះកុសុមៈ។
ប្រភពព័ត៌មានពីក្រុមគ្រួសារអ្នកពុលទាំងបីនាក់បានឱ្យដឹងថា នៅថ្ងៃទី១២ វិច្ឆិកា នោះមានការជួបជុំបងប្អូនសរុបចំនួន១០នាក់ ហើយទិញស្រាទំពាំងបាយជូរដែលច្រកក្នុងដបទឹកបរិសុទ្ធជាស្រាពណ៌ខ្មៅ ក្នុងមួយដបថ្លៃ១.០០០រៀល ផឹកអស់ជាច្រើនដបតាំងពីម៉ោង១១ព្រឹក រហូតដល់ម៉ោង៦ល្ងាច ។ លុះមុននឹងចប់កម្មវិធីផឹកស៊ី ដោយសារថវិកាក៏ខ្សត់ខ្សោយផង ក៏បានទិញស្រា.ស១លីត្រយកមកផឹកទៀត រួចទើបបែកគ្នាទៅផ្ទះរៀងៗខ្លួន ចំណែកសាច់ក្លែមក្នុងកម្មវិធីនោះ មានត្រីខកំប៉ុង និងផ្អកកំពឹសដែលធ្វើដោយខ្លួនឯង ។
ប្រភពព័ត៌មានដដែលបន្ដទៀតថា លុះផឹកស្រវឹងដាបរៀងៗខ្លួនអស់ទៅក៏នាំគ្នាទៅផ្ទះវិញ រហូតដល់ព្រឹកថ្ងៃទី១៣ វិច្ឆិកា បងប្អូន៧នាក់ចេញទៅប្រកបការងារជាធម្មតា ដោយឡែកតែ៣នាក់ មានអាការៈខ្សោយអស់កម្លាំងងើបអត់រួចចេះតែវិលមុខ។ អ្នកទាំងបីនាក់នោះមាន ១-ឈ្មោះប៉ូង សាវឿន ភេទប្រុស អាយុ៣៣ឆ្នាំ ជាម្ចាស់ផ្ទះ ២-ឈ្មោះប៉ូង ស្រីទូច ភេទស្រី អាយុ១៩ឆ្នាំ ត្រូវជាប្អូន និង៣-ឈ្មោះគ្រុយ យ៉ា ភេទប្រុស អាយុ៣៥ឆ្នាំ ត្រូវជាបងថ្លៃ។ ខណៈឃើញដូច្នេះ សាច់ញាតិក៏នាំគ្នាកោសខ្យល់ឱ្យ ព្រោះនឹកស្មានថា ស្រវឹងស្រារហូតដល់ខ្យល់ចាប់ ប៉ុន្ដែពេលកោសខ្យល់ហើយនៅតែមិនធូរស្រាលទៀត លុះដល់យប់ថ្ងៃទី១៣ វិច្ឆិកា អ្នកទាំងបីនាក់ចាប់ផ្ដើមក្អួតចង្អោរមួយយប់ទល់ភ្លឺ រហូតដល់ម៉ោង៥ភ្លឺ ថ្ងៃទី១៤ វិច្ឆិកា នៅតែក្អួតចង្អោរទៀតក៏បញ្ជូនអ្នកទាំងបីនាក់ទៅមន្ទីរពេទ្យបង្អែកពោធិចិនតុង។ ពេលទៅដល់ គ្រូពេទ្យដាក់ថ្នាំព្យាបាលនៅតែមិនបានធូរស្រាលក៏បញ្ជូនបន្ដទៅព្យាបាលនៅមន្ទីរពេទ្យព្រះកុសុមៈតែម្ដង ។
ខណៈពេលមកដល់មន្ទីរពេទ្យព្រះកុសុមៈហើយ ឈ្មោះគ្រុយ យ៉ា ក៏នៅតែដេកអោបកន្ថោរដដែលមិនឱ្យយកទៅណាឆ្ងាយទេ ទុកសម្រាប់ក្អួត។ ចំណែកឈ្មោះប៉ូង សាវឿន វិញគឺដេកស្ដូកស្ដឹងលែងដឹងខ្លួនទៅហើយដែលគ្រូពេទ្យប្រាប់ថា មានសង្ឃឹមតិចណាស់។ រីឯឈ្មោះប៉ូង ស្រីទូច នៅដឹងខ្លួនខ្លះ ប៉ុន្ដែអាការៈខ្សោយល្ហិតល្ហៃ ។
លោកវេជ្ជបណ្ឌិតដែលតាមដានស្ថានភាពរបស់អ្នកទាំងបីនាក់សន្និដ្ឋានថា អាចបណ្ដាលមកពីការពុលស្រាក៏ថាបាន ឬអាចមកពីពុលចំណីក៏ថាបាន ប៉ុន្ដែបើពុលស្រា និងពុលចំណី ចុះហេតុអីក៏អ្នក៧នាក់ទៀតមិនពុល? កត្ដានេះបណ្ដាលមកពីអ្នកទាំងបីនាក់មានប្រព័ន្ធការពារមេរោគខ្សោយ ទើបឈានដល់ដំណាក់កាលនេះមុនគេ ៕
ពីគេហទំព័រ៖ កោះសន្តិភាព
No comments:
Post a Comment
yes