លោកស្រី មូរ សុខហួរ គ្រោងដាក់សំណើ៣ចំនុចសំខាន់ៗទៅរដ្ឋាភិបាលពីបញ្ហាពលករខ្មែរទៅធ្វើការនៅប្រទេសម៉ាឡេស៊ី

លោកស្រី ​មូរ សុខហួរ អ្នកតំណាងរាស្ត្រគណបក្ស សម រង្ស៊ី បានថ្លែងក្នុងសន្និសីទកាសែតនាព្រឹក

ថ្ងៃទី១៤ វិច្ឆិកា នៅក្នុងបន្ទប់លោកស្រី ជូឡុង ស៊ូមូរ៉ា ក្នុងរដ្ឋសភា ថា លោកស្រីនិងស្នើទៅ

រដ្ឋាភិបាលកម្ពុជានូវចំនុច៣ធំៗ ទាក់ទងទៅនិងការនាំពលករចេញទៅធ្វើការនៅប្រទេស ម៉ាឡេស៊ី ដែលរងការរំលោភសិទ្ធិពីសំណាក់ថៅកែ រហូតដល់មានពលករស្លាប់ថែមទៀតផង។

​​​ដោយលោកស្រីលើកឡើងថា សំណើទាំង៣នោះមានដូចជា៖

១ ធ្វើកិច្ចសហប្រតិបត្តិការកិច្ចព្រមព្រៀងទ្វេភាគីរវាងរដ្ឋាភិបាល និងរដ្ឋាភិបាល ដោយយក​គោលការណ៍ពីសេចក្តីថ្លែងការណ៍របស់អាស៊ានស្តីពីពលករឆ្នាំ២០០៨ ការលើកស្ទួយ​ជម្រុញថាម​ពលតំលៃភាពថ្លៃថ្នូរ កម្មករ នៅក្នុងបរិបទ សិទ្ធិសេរីភាពជាមនុស្ស។

២ ការពារនូវស្ត្រីដែលទៅធ្វើការជាអ្នកបំរើនៅក្រៅប្រទេស។ ដោយសំអាតនៅអ្វីជាយន្តការនៅក្នុងការគ្រប់គ្រងក្រុមហ៊ុនដោយដាក់ច្បាប់វិធានច្បាប់ការអោយតឹងរឹង និងបញ្ឆូនក្រុមហ៊ុន​ដែលធ្វើ​ខុសច្បាប់បញ្ឆូនទៅតុលាការចាត់ការតាមផ្លូវច្បាប់។ ត្រូវមានប្រព័ន្ធគ្រប់គ្រងទាំងនៅកម្ពុជា និងនៅ​ម៉ាឡេស៊ីពីការនាំពលករចេញទៅធ្វើការ។

៣ នៅក្នុងកិច្ចសន្យា ត្រូវតែមានរដ្ឋាភិបាលនៅក្នុងកិច្ចព្រមព្រៀង ភាគីទាំងពីរបង្កបង្កើតជាកិច្ចសន្យារវាងអ្នកបំរើ និងថៅកែ ហើយត្រូវសរសេរជាភាសាដែលថៅកែ និងកម្មករ​​​​​​​អាចមើលយល់។

​ដោយកិច្ចព្រមព្រៀងត្រូវឈរលើគោលការណ៍អាស៊ាន និងអង្គការពលកម្មអន្តរជាតិ(អាយឡូ)។

លោកស្រី មូរ សុខហួរ បានបន្តថា ចំពោះពាក្យបណ្តឹងវិញលោកស្រីនិងដាក់ប្តឹងទៅគណៈកម្មាការ​សិទ្ធិមនុស្សនៅរដ្ឋសភាម៉ាឡេស៊ី ហើយការប្តឹងគឺចំពោះបញ្ហាដែលប្រឈម ហើយលោកស្រី 

និងដាក់សំណើសុំអោយមានការសហការជាមួយឯកអគ្គរាជទូតខ្មែរប្រចាំនៅប្រទេសម៉ាឡេស៊ី ពីបញ្ហាពលករខ្មែរស្លាប់នៅប្រទេស ម៉ាឡេស៊ី ។

​ចំពោះសំណើដាក់ទៅរដ្ឋាភិបាលកម្ពុជា និងពាក្យបណ្តឹងដាក់ទៅគណៈកម្មាសិទ្ធិមនុស្សក្នុង​រដ្ឋសភាប្រទេស ម៉ាឡេស៊ី ពីករណីពលករខ្មែរស្លាប់នៅម៉ាឡេស៊ីនៅមិនទាន់បានដាក់នៅឡើយទេ ដោយកំពុងតែធ្វើការសិក្សា និងស្រាវជ្រាវអំពីករណី នៃការរំលោភបំពានសិទ្ធិពលករខ្មែរនៅប្រទេស​ម៉ាឡេស៊ី។

​សូមជម្រាបថា ការគ្រោងដាក់សំណើទៅរដ្ឋាភិបាល និងគណៈកម្មាសិទ្ធិមនុស្សក្នុងរដ្ឋសភាម៉ាឡេស៊ី គឺបន្ទាប់ពីលោកស្រី មូរ សុខហួរ បានធ្វើដំណើរទៅកាន់ប្រទេស ម៉ាឡេស៊ី ក្នុងរយៈ​ពេល៥ថ្ងៃ​ពី​ថ្ងៃទី០៧ ដល់ថ្ងៃទី១១ វិច្ឆិកា ដោយក្នុងដំណើរកិច្ចសហប្រតិបត្តិការនោះ​លោកស្រីបាន​ជួបជាមួយ​អ្នកតំណាងរាស្ត្រចំនួន៤គណបក្ស ប្រធានគណៈកម្មាសិទ្ធិមនុស្សក្នុងរដ្ឋសភាម៉ាឡេស៊ី សមាគម​ក្រុមហ៊ុននាំពលករ អង្គការក្រៅរដ្ឋាភិបាល ពីបញ្ហាពលករខ្មែរដែលរងការរំលោភបំពានច្បាប់​ការងារ​ពីសំណាក់ថៅកែ៕