ក្រុងហាណូយៈ សេដ្ឋកិច្ចវៀតណាម បានកើនឡើងក្នុងកម្រិតទាបបំផុតនៅត្រីមាសទីមួយនេះគិតចាប់តាំងពីឆ្នាំ ២០០៩មក ដោយសារការផ្តល់កម្ចីរបស់ធនាគារ បានធ្លាក់ចុះ ហើយតម្រូវការក្នុងស្រុកក៏បានធ្លាក់ចុះផងដែរ ដែលអាចជំរុញឲ្យប្រទេសនេះបន្តទម្លាក់អត្រាការប្រាក់ថែមទៀត។
ការិយាល័យស្ថិតិវៀតណាម បានឲ្យដឹងនៅក្នុងសេចក្តីថ្លែងការណ៍មួយនៅទីក្រុងហាណូយកាលពីម្សិលមិញថា ផលិតផលក្នុងស្រុកសរុប (ផ.ស.ស) បានកើនឡើង ៤ភាគរយនៅត្រីមាសទីមួយ ធៀបនឹងរយៈពេលដូចគ្នាកាលពីឆ្នាំមុន ខណៈដែលកំណើន ផ.ស.ស នៅត្រីមាសទីបួន ឆ្នាំ២០១១ មានអត្រា ៦,១ភាគរយ និងកំណើន ផ.ស.ស ប្រចាំឆ្នាំ២០១១ មានកម្រិត ៥,៨៩ភាគរយ។
របាយការណ៍នេះ អាចដាក់សម្ពាធលើធនាគារកណ្តាលវៀតណាមក្នុងការជំរុញការចំណាយក្នុងស្រុក ខណៈអតិផរណាដែលមានកម្រិតខ្ពស់ជាងគេនៅក្នុងតំបន់អាស៊ីរបស់ប្រទេសនេះ បានធ្លាក់ចុះ ហើយវិបត្តិបំណុលរបស់អឺរ៉ុប ក៏បានកាត់បន្ថយកំណើនពាណិជ្ជកម្មផងដែរ។ ធនាគារកណ្តាលវៀតណាម បានកាត់បន្ថយអត្រារីប៉ូ (អត្រាការប្រាក់ដែលធនាគារកណ្តាលទិញមូលបត្របំណុលពីធនាគារពាណិជ្ជវិញ) និងអត្រាការប្រាក់លើការផ្តល់ឥណទានជាថ្មីនៅក្នុងខែមីនានេះ ព្រមទាំងបានបញ្ជាឲ្យធនាគារធំៗទាំង ៤ របស់ប្រទេសនេះ កាត់បន្ថយអត្រាការប្រាក់កម្ចីពីអត្រា ២៥ភាគរយផងដែរ ដែលកិច្ចប្រឹងប្រែងទាំងអស់នេះ គឺដើម្បីព្យាយាមទប់ស្កាត់ការធ្លាក់ចុះនៃឥណទានប្រមាណ ២ភាគរយចាប់តាំងពីដើមឆ្នាំរហូតមកដល់ពេលនេះ។
No comments:
Post a Comment
yes