ក្នុងវេទិកាស្តីពីដំណាំបន្លែនៅសណ្ឋាគារកាំបូឌីយ៉ាណា ឯកឧត្តមបណ្ឌិត ច័ន្ទ សារុន រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ បានជំរុញឱ្យបង្កើនការដាំបន្លែនៅក្នុងប្រទេសឱ្យបានកាន់តែច្រើន ដើម្បីឈានទៅកាត់បន្ថយការនាំបន្លែចូលពីបរទេស នាពេលអនាគត ខណ:ដែលការសិក្សាមួយបង្គាប់ថាក្នុងមួយឆ្នាំ កម្ពុជាត្រូវការបន្លែមិនតិចជាង៤ម៉ឺនតោន។
ឯកឧត្តមបណ្ឌិត ច័ន្ទ សារុន បានមានប្រសាសន៍ថា: តាមរយ:ការសិក្សារបស់អង្គការFAOក៏ដូចជា CAVAC បានបង្ហាញថា តម្រូវការបន្លែសម្រាប់មនុស្សម្នាក់ក្នុងមួយឆ្នាំ គឺប្រមាណ៣០-៣៥គីឡូក្រាម។
ដូចនេះតម្រូវការបន្លែសរុបប្រចាំឆ្នាំ គឺក្នុងចន្លោះពី ៤២០.០០០តោនទៅ៤៩០.០០០តោន។ ឯកឧត្តមបានបញ្ជាក់បន្តថា លទ្ធភាពផ្គត់ផ្គង់បន្លែរបស់កម្ពុជាគឺប្រមាណ៣៧៦.៥៤៦តោន។ ដូចនេះតម្រូវការបន្លែដើម្បីបំពេញបន្ថែមសម្រាប់ផ្គត់ផ្គង់ក្នុងស្រុកគឺប្រមាណ១១៤.០០០តោនក្នុងមួយឆ្នាំ។
ឯកឧត្តមបានបញ្ជាក់ថាជាការពិតណាស់ យើងទាំងអស់គ្នាបានដឹងហើយថា បន្លែដែលប្រជាជនកម្ពុជាទទួលទានមានច្រើនប្រភេទណាស់ ដែលភាគច្រើននៃបន្លែទាំងនោះជាប្រភេទបន្លែដែលគេដាំដុះ ប៉ុន្តែផលិតផលបន្លែនៅក្នុងប្រទេសកម្ពុជា ពុំទាន់បានបំពេញតាមតម្រូវការបរិភោគឱ្យបានគ្រប់គ្រាន់នៅឡើយទេ ដែលទាមទារនូវការនាំចូលពីបរទេស ជាពិសេសពីប្រទេសវៀតណាម និងថៃ។
ចំពោះមុខអ្វីដែលពុំទាន់មានលទ្ធភាពផ្គត់ផ្គង់នោះ ឯកឧត្តមរដ្ឋមន្ត្រីបានលើកឡើងថាប្រឈមមុខនឹងស្ថានភាពបែបនេះ ក្រសួងកសិកម្ម រុក្ខាប្រមាញ់ និងនេសាទ បានប្រឹងប្រែងក្នុងការលើកទិសដៅអភិវឌ្ឍន៍ផលិតកម្មដាំបន្លែយ៉ាងយកចិត្តទុកដាក់ ដោយបានសហការជាមួយអង្គការក្រៅរដ្ឋាភិបាលជាច្រើន ដែលកំពុងយកចិត្តទុកដាក់លើដំណាំផលិតកម្មបន្លែផ្លែឈើនៅតាមជនបទនានា។ ពិសេសទៅទៀតក្រសួងបានធ្វើការទំនាក់ទំនងជាមួយនិងមជ្ឈមណ្ឌលស្រាវ់ជ្រាវ និងអភិវឌ្ឍន៍ដំណាំបន្លែនៅក្នុងតំបន់អាស៊ី(AVRDC) ក៏ដូចជាមជ្ឈមណ្ឌលអូស្ត្រាលីសម្រាប់ការស្រាវជ្រាវកសិម្មអន្តរជាតិ(ACIAR)ឱ្យជួយជាបច្ចេកទេសក៏ដូចជាកម្មវិធីបណ្តុះបណ្តាលដល់អ្នកស្រាវជ្រាវដំណាំបន្លែនៅកម្ពុជា ដើម្បីបំពេញបន្ថែមនៅកង្វះខាត និងចូលរួមអភិវឌ្ឍន៍នៅក្នុងវិស័យនេះ។
យោងតាមរបាយការណ៍របស់ក្រសួងកសិកម្ម បានបង្ហាញថាក្នុងឆ្នាំ២០១១ ផ្ទៃដីដាំដុះបន្លែមានចំនួន៥២.៧០៦ហិកតា និងទទួលបានបរិមាណផលចំនួន៣៧៦.៥៤៦តោន ក្នុងនោះខេត្តដែលមានសក្តានុពលដាំដុះខ្លាំងគួរកត់សម្គាល់មាន: ខេត្តកំពង់ចាម កណ្តាល កំពង់ឆ្នាំងតាកែវ និងខេត្តកំពត។
បើតាមអង្កេតឃើញថា ដំណាំបន្លែនៅកម្ពុជាពិតជា កំពុងមានការរីកចម្រើនជាបន្តបន្ទាប់ជាលក្ខណ:គ្រួសារ និងជាលក្ខណ:វិនិយោគខ្នាតតូច និងមធ្យមហើយសង្វាក់ផលិតកម្មនេះកំពុងតែដើរទន្ទឹមផង ដែលទៅនិងតម្រូវការដល់ច្រើនក៏ដូចជា កំណើនរបស់ប្រជាពលរដ្ឋផងដែរ។
ប៉ុន្តែផលិតផលបន្លែនៅក្នុងប្រទេសកម្ពុជាពុំទាន់បានបំពេញតាមតម្រូវការបរិភោគឱ្យបានគ្រប់គ្រាន់នៅឡើយទេ។
វេទិកានេះ បានទទួលនូវការចូលរួមដោយលោកស្រី ផែននី រីចាដស៍ (Penny Richards) ឯកអគ្គរដ្ឋទូតអូស្ត្រាលីប្រចាំព្រះរាជាណាចក្រកម្ពុជា លោក Les Baxter អ្នកគ្រប់គ្រងកម្មវិធីស្រាវជ្រាវផ្នែកដំណាំសាកវប្បកម្ម នៃមជ្ឈមណ្ឌលអូស្ត្រាលីសម្រាប់ការស្រាវជ្រាវកសិកម្មអន្តរជាតិ (ACIAR) អ្នកស្រាវជ្រាវសំខាន់ៗ ដែលមានបទពិសោធន៍ខ្ពស់មកពីប្រភពជាច្រើនកសិករគំរូផងដែរ។
ឯកឧត្តមរដ្ឋមន្ត្រី បានអរគុណចំពោះក្រុមអនុវត្តគម្រោង និងតំណាងនាយកដ្ឋានឧស្សាហកម្មបឋមនៅ New South Wales(New South Wales Department of Primary Industry) តំណាងសកលវិទ្យាល័យ Charles Sturt និងតំណាងមជ្ឈមណ្ឌលស្រាវជ្រាវ និងអភិវឌ្ឍន៍ដំណាំបន្លែប្រចាំតំបន់អាស៊ី (Asian Vegetable Research and Development Center e’ AVRDC) ដែលបានសហការរៀបចំវេទិកានេះឡើង។
ឯកឧត្តមរដ្ឋមន្ត្រី បានថ្លែងទៅកាន់អ្នកចូលរួមទៀតថា វេទិការនេះជាការចូលរួមចំណែក ក្នុងការបង្កើតនៅផលិតភាពកសិកម្ម តាមរយ:ការបង្ហាញ ពីការស្រាវជ្រាវ និងអភិវឌ្ឍន៍ចុងក្រោយនៅក្នុងវិស័យ ដំណាំបន្លែនៅកម្ពុជា ការកសាងបណ្តាញទំនាក់ទំនងរវាងអ្នកពាក់ព័ន្ធក្នុងផលិតកម្មដំណាំបន្លែជាមួយនិងអង្គការក្រៅរដ្ឋាភិបាល និងវិស័យឯកជន ការផ្តល់ឱកាសស្វែងយល់ពីការអភិវឌ្ឍន៍ស្តីពីដំណាំបន្លែក្នុងតំបន់ និងការសម្របសម្រួលការផ្លាស់ប្តូរគំនិតលើការអភិវឌ្ឍន៍ដំណាំក្នុងបរិបទនៃសកលភាវូនីយកម្ម។
ការងារទាំងអស់នេះ សុទ្ធតែជាកត្តាគន្លឹះមិនអាចខ្វះបានសម្រេចកិច្ចអភិវឌ្ឍន៍អនុវិស័យនេះឱ្យទទួលបានជោគជ័យទាំងបរិមាណគ្រប់គ្រាន់ សម្រាប់ការផ្គត់ផ្គង់តម្រូវការប្រចាំថ្ងៃទាំងគុណភាព ដែលអាចធានាបានចំពោះសុខភាពអ្នកហូបចុកបន្លែ ដែលចេះតែកើនឡើងពីមួយថ្ងៃទៅមួយថ្ងៃពិសេសសម្រាប់ពេលបច្ចុប្បន្ននេះ ដែលយើងទាំងអស់គ្នាតែងតែគិតគួរពីបញ្ហាសុខភាពជាចម្បងសម្រាប់សុភមង្គលក្នុងគ្រួសារ។
គួរបញ្ជាក់ថាបន្លែជាប្រភពនៃសារធាតុចិញ្ចឹមរាងកាយ និងផ្តល់ថាមពល។ ចំពោះមនុស្សគឺទាមទារនូវបរិមាណថាមពលពី១៧០០-២២០០គីឡូកាឡូរីក្នុងមួយថ្ងៃនោះបន្លែផ្តល់នូវថាមពលប្រមាណ១៥-២០ភាគរយ៕
No comments:
Post a Comment
yes