គណបក្សទាំង១០ ដែលមានឈរឈ្មោះបោះឆ្នោតជ្រើសរើសក្រុមប្រឹក្សាឃុំ-សង្កាត់ នៅថ្ងៃទី១៨ ឧសភា បានចូលរួមឃោសនាជាផ្លូវការសម្រាប់ការបោះឆ្នោតអាណត្តិ ទី៣ ឆ្នាំ២០១២។
បញ្ជីគណបក្ស នៅក្នុងឯកសារផ្សព្វផ្សាយអំពីការបោះឆ្នោតឃុំ-សង្កាត់ ឆ្នាំ២០១២ របស់គណៈកម្មការរៀបចំការបោះឆ្នោត (គ.ជ.ប.)
ស្លាកសញ្ញាគណបក្សនយោបាយមានរូបរាង និងបានបង្កប់នូវខ្លឹមសារផ្សេងៗ គ្នាក្នុងស្លាកសញ្ញានោះទៅតាមគោលនយោបាយរបស់គណបក្សនោះ។
គណបក្សប្រជាជនកម្ពុជាមាននិម្មិតសញ្ញារាងមូលពងក្រពើ ផ្ទៃពណ៌ស មានកម្រងគួរស្រូវពណ៌មាស អមសងខាងដោយរង្វង់ស្នែងក្របីជួបគ្នាខាងចុង។
ខ្សែបូរុំព័ទ្ធផ្នែកខាងក្រោមនៃកម្រងគួរស្រូវជាប្រាំថ្នាក់ នៅកណ្ដាលខ្សែបូដែលកាត់ទទឹងផ្នែកខាងក្រោមមានចារឹកអក្សរពណ៌សថា គណបក្សប្រជាជនកម្ពុជា។
មានក្បាច់ភ្ញីពណ៌មាសជាទម្រនៅចន្លោះក្បាច់ភ្ញី និងខ្សែបូមានស្ពឺគ្រឿងចក្រពណ៌មាស។ នៅលើផ្ទៃពណ៌សមានរូបទេវតាបាចផ្កាស្ថិតនៅចំកណ្ដាលរង្វង់។
បាវចនារបស់គណបក្ស គឺឯករាជ្យ សន្តិភាព សេរីភាព ប្រជាធិបតេយ្យ អព្យាក្រឹត និងវឌ្ឍនភាពសង្គម។
គណបក្សនេះដឹកនាំដោយប្រធានព្រឹទ្ធសភា លោក ជា ស៊ីម និងលោក ហ៊ុន សែន ជាអនុប្រធាន។
គណបក្សសមរង្ស៊ីដឹកនាំដោយលោក សម រង្ស៊ី មានស្លាកសញ្ញាសម្គាល់ជារូបទៀនសមួយដើម មានពន្លឺស្ថិតក្នុងរង្វង់មូល ដែលមានផ្ទៃពណ៌ផ្ទៃមេឃចាស់ និងមានសរសេរអក្សរខាងក្រោមថា គណបក្សសមរង្ស៊ី។
អ្នកតំណាងរាស្ត្រ និងជាអ្នកនាំពាក្យគណបក្សសមរង្ស៊ី លោក យឹម សុវណ្ណ បានពន្យល់ពីអត្ថន័យរបស់ស្លាកសញ្ញានេះថា ពណ៌ផ្ទៃមេឃចាស់ គឺតំណាងឲ្យសន្តិភាព ទាំងផ្លូវកាយ ទាំងផ្លូវចិត្ត និងមានយុត្តិធម៌ពិតប្រាកដ ៖ «មិនមានសន្តិភាពតែសម្បកក្រៅ សន្តិភាពមានដែលមានអយុត្តិធម៌រំលោភសិទ្ធិមនុស្សជារៀងរាល់ថ្ងៃនោះទេ ចំណែកភ្លើងទៀន តំណាងឲ្យពន្លឺដ៏ត្រចះត្រចង់ ភាពរុងរឿងជឿនលឿននៃប្រជាជាតិ សេចក្ដីសង្ឃឹម ដែលពោរពេញទៅដោយមោទនភាពជាតិ»។
លោកបន្តថា បាវចនារបស់គណបក្សនេះគឺ សីលធម៌ សច្ចធម៌ យុត្តិធម៌។
លោក កែវ ពុទ្ធ រស្មី ជាមគ្គុទ្ទេសក៍នៃគណបក្សហ៊្វុនស៊ិនប៉ិច។ លោកមានប្រសាសន៍ថា ស្លាកសញ្ញារបស់គណបក្សហ្វុនស៊ិនប៉ិចរបស់លោក មានរូបសញ្ញាវិមានឯករាជ្យ និងមានបន្ទះកាំរស្មីបញ្ចេញពន្លឺចែងចាំង។
លោកពន្យល់ថា វិមានឯករាជ្យនោះជានិម្មិតរូបនៃការតស៊ូទាំងសម័យចាស់ ទាំងសម័យថ្មី និងជានិម្មិតរូបនៃអធិបតេយ្យភាពជាតិ បូរណភាពទឹកដី ដែលត្រូវថែរក្សាឲ្យគង់វង្ស ស្ថិតថេរជារៀងរហូត ៖ «យើងអាចកសាងប្រទេសជាតិឲ្យភ្លឺចែងចាំងដូចកាំរស្មីនៅក្នុងឡូហ្គោនោះអ៊ីចឹង ឡូហ្គោនេះបើមើលទៅលើវិមានឯករាជទៀត គឺមានសរសេរអក្សរកាត់ ររច កឯអសស មានន័យថា រណសិរ្សរួបរួមជាតិ ដើម្បីកម្ពុជាឯករាជ អព្យាក្រឹត្យ សន្តិ និងសហប្រតិបត្តិ។ ផ្នែកខាងក្រោមបានសរសេរថា ហ៊្វុនស៊ិនប៉ិច ប៉ុន្តែពាក្យនេះមកពីកាត់របស់ភាសាបារាំងទេ»។
បាវចនារបស់គណបក្សហ៊្វុនសិនប៉ិច គឺ ជាតិ សាសនា ព្រះមហាក្សត្រ។
ចំណែកគណបក្សសិទ្ធិមនុស្ស ដែលទើបចូលប្រឡូកក្នុងការបោះឆ្នោតឃុំ-សង្កាត់ នៅអាណត្តិទី៣ នេះ មានស្លាក់សញ្ញាសម្គាល់ គឺមានរូបព្រះច័ន្ទពេញបូណ៌មី ស្ថិតនៅលើផ្ទៃចតុកោណកែងពណ៌បៃតង។
អគ្គលេខាធិការគណបក្សសិទ្ធិមនុស្ស លោក យ៉ែម បុញ្ញឫទ្ធិ មានប្រសាសន៍ថា ផ្ទៃពណ៌បៃតងគឺតំណាងឲ្យស្រែស្រូវរបស់ខ្មែរ បរិស្ថាន ព្រៃឈើដែលត្រូវការពារ និងត្រូវដាំដុះឡើងវិញ ចំពោះតំបន់ព្រៃឈើដែលគេបានកាប់បំផ្លាញកន្លងមកនោះ ៖ «យើងយកសញ្ញាព្រះច័ន្ទពេញវង្សដែលជាពន្លឺត្រជាក់ ខែភ្លឺដែលបំភ្លឺលោកទាំងអស់គ្នា ជាពន្លឺមួយដែលតំណាងឲ្យសន្តិភាព និងអហិង្សា ហើយអ្នកណាមួយក៏ពេញចិត្តនឹងពន្លឺព្រះច័ន្ទនេះដែរ លើកលែងតែក្រុមចោរទេដែលអត់ចូលចិត្តខែភ្លឺ ចង់បានខែងងឹតដើម្បីលួច លួចលក់ដី លក់ព្រៃឈើខ្មែរទាំងប៉ុន្មាន»។
លោកបន្តថា គណបក្សសិទ្ធិមនុស្សមានបាវចនា បម្រើ ការពារ និងកសាង។ គណបក្សនេះដឹកនាំដោយលោក កឹម សុខា។
លោក ប៉ែន សង្ហា អ្នកនាំពាក្យគណបក្សនរោត្តមរណឫទ្ធិ បានអធិប្បាយថា គណបក្សនរោត្តមរណឫទ្ធិ មានរូបសញ្ញារាងជារង្វង់មូល មានផ្ទៃទឹកប៉ិច ហើយពណ៌ទឹកប៉ិចនោះ ជាពណ៌តំណាងឲ្យរាជានិយម ហើយមានរូបព្រះឆាយាល័ក្ខណ៍សម្ដេចក្រុមព្រះនរោត្តមរណឫទ្ធិ ជាប្រធានគណបក្សនៅចំកណ្ដាល និងមានផែនទីប្រទេសកម្ពុជានៅពីក្រោយ ៖ «ព្រមទាំងលំអដោយក្បាច់ភ្ញីទេស ដែលជាក្បាច់របស់បុព្វបុរសយើងដែលបន្សល់ទុកតាំងពីបុរាណមក ព្រមទាំងរចនាដោយអក្សរថា គណបក្សនរោត្តមរណឫទ្ធិ ដែលមានបាវចនារបស់គណបក្ស គឺ សេរីភាព អធិបតេយ្យ និងបូរណភាពទឹកដី»។
ចំពោះគណបក្សសញ្ជាតិខ្មែរ ដែលមានលោក សេង សុខេង ជាប្រធាន បានជ្រើសរើសយកស្លាកសញ្ញាព្រះអាទិត្យមានពណ៌មាសជួបជាមួយព្រះចន្ទមានពណ៌ប្រាក់ ជាសញ្ញាសម្គាល់។
លោក សេង សុខេង មានប្រសាសន៍ថា ព្រះអាទិត្យ និងព្រះចន្ទជួបគ្នានេះ គឺតំណាងឲ្យការរួបរួមប្រជារាស្ត្រគ្រប់ស្រទាប់វណ្ណៈក្នុងប្រទេសកម្ពុជា ដោយមិនរើសអើងជំនឿសាសនា និន្នាការនយោបាយ និងជាតិសាសន៍ឡើយ ៖ «ឲ្យតែអ្នកទាំងអស់នោះទទួលស្គាល់ដោយច្បាប់សញ្ជាតិ និងព្រះមហាក្សត្រ ចំណែកព្រះអាទិត្យមានពណ៌មាស ព្រះច័ន្ទមានពណ៌ប្រាក់តំណាងឲ្យលទ្ធិប្រជាធិបតេយ្យ សន្តិភាព និងសហប្រតិបត្តិការ ការអភិវឌ្ឍ និងភាពថ្កុំថ្កើងរុងរឿង»។
គណបក្សនេះមានបាវចនា សញ្ជាតិ សាសនា អធិបតេយ្យ។
ចំណែកគណបក្សសម្ព័ន្ធដើម្បីប្រជាធិបតេយ្យវិញ មានស្លាកសញ្ញាជួង ជាសញ្ញាសម្គាល់។
លោក ខឹម វាសនា ដែលជាប្រធានគណបក្សនេះមានប្រសាសន៍ថា រូបសញ្ញាជួងនោះមានន័យថា ជាការបន្លឺសំឡេង ដាស់ប្រជាពលរដ្ឋឲ្យគិតពីបញ្ហារបស់ប្រទេសជាតិ ឲ្យយល់ពីរបៀបដោះស្រាយបញ្ហាប្រទេស ឲ្យយល់ពីសិទ្ធិជាម្ចាស់ និងអំណាចជាម្ចាស់ ៖ «បាវចនា រួមគិតរួមសម្រេច រួមទទួលខុសត្រូវ យើងចង់បង្ហាញពីភាតរភាពក្នុងសង្គម។ សង្គមមួយដែលមានពលរដ្ឋជាម្ចាស់ សង្គមមួយដែលយើងជាម្ចាស់រវាងអ្នកដែលត្រូវគេដឹកនាំ និងអ្នកដែលត្រូវដឹកនាំគេ»។
ដោយឡែកគណបក្សខ្មែរឈប់ក្រ ដឹកនាំដោយលោក ក្រវ៉ាញ ដារ៉ន។
អគ្គលេខាធិការរបស់គណបក្ស លោក ស៊ិន វណ្ណារិទ្ធ មានប្រសាសន៍ថា គណបក្សលោកមានរូបសញ្ញាដើមឈើ និងភ្នំជានិមិត្តសញ្ញារបស់គណបក្ស។
លោកពន្យល់ថា ដើមឈើតំណាងនូវភាពត្រជាក់ត្រជំ ភាពរុងរឿងដែលមនុស្សសត្វទាំងឡាយតែងតែត្រូវការដើមឈើជាម្លប់ជានិច្ច ៖ «រីឯដើមឈើតំណាងឲ្យភាពរឹងមាំ សាមគ្គីភាពរវាងខ្មែរ និងខ្មែរ ខ្មែរក្រោម ខ្មែរកណ្តាល គឺជាខ្មែរតែមួយ ដូច្នេះបើយើងមានការបាក់បែកវាធ្វើឲ្យយើងបាត់បង់បូរណភាពទឹកដី ហើយនិងបាត់បង់នូវវប្បធម៌ជាដើម»។
គណបក្សខ្មែរឈប់ក្រ មានបាវចនា ស្រលាញ់ សេរីភាព យុត្តិធម៌ សុភមង្គល។
អនុប្រធានគណបក្សសាធារណរដ្ឋប្រជាធិបតេយ្យ លោក ចាន់ យ៉េត បានឲ្យដឹងថាគណបក្សលោកមានស្លាកសញ្ញាផែនទីប្រទេសកម្ពុជាពណ៌បៃតង មានបន្ទះបូទ្រពីក្រោម មានផ្ទៃពណ៌ស មានពន្លឺព្រះអាទិត្យ និងមានផ្កាយបីរះពីលើ ៖ «ផ្កាយបី និងពន្លឺព្រះអាទិត្យបង្ហាញថា ខ្មែរការពារទឹកដី សាសនា និងប្រទេសរបស់ខ្លួន និងតំណាងឲ្យអំណាចទាំងបី គឺនីតិប្បញ្ញត្តិ នីតិប្រតិបត្តិ និងតុលាការ»។
គណបក្សនេះមានអ្នកស្រី សុខ រ័ត្នសុវណ្ណបញ្ចសីលា ជាប្រធាន និងមានបាវចនាថា បម្រើ យុត្តិធម៌ និងអភិវឌ្ឍ។
ដោយឡែកគណបក្សចលនាប្រជាធិបតេយ្យ មានស្លាកសញ្ញាត្បូងពេជ្រក្នុងរង្វង់មូល រំលេចចេញជាពីរពណ៌ គឺពណ៌ខៀវ និងពណ៌ក្រហម ៖ «សញ្ញាត្បូងពេជ្រតម្កល់លើជើងពានប្រាក់ បង្ហាញពីឆន្ទៈស្មោះសរនឹងជាតិ សាសនា និងព្រះមហាក្សត្រ ឯពណ៌ខៀវនោះគឺតំណាងឲ្យលទ្ធិប្រជាធិបតេយ្យ និងតំណាងឲ្យការបាត់បង់ទឹកដី ទាំងចាស់ទាំថ្មី ឯពណ៌ក្រហមនោះតំណាងឲ្យឆន្ទៈប្ដូរផ្ដាច់របស់សមាជិកសមាជិកាទូទាំង ២៤ខេត្តក្រុង នៃព្រះរាជាណាចក្រកម្ពុជា»។
គណបក្សនេះមានបាវចនា ឯករាជ អព្យាក្រឹត្យ និងយុត្តិធម៌។
គណបក្សនេះបានដាក់បេក្ខជនឈរឈ្មោះតែមួយឃុំទេ គឺឃុំទ្រព្យ ស្រុកបាធាយ ខេត្តកំពង់ចាម។
គណបក្សទាំង១០ដូចបានរៀបរាប់ជូនមកនេះ នឹងចូលរួមប្រកួតប្រជែងដណ្ដើមយកសន្លឹកឆ្នោតនៅថ្ងៃទី៣ ខែមិថុនា ខាងមុខនេះ៕
No comments:
Post a Comment
yes