គណបក្ស សម រង្ស៊ី បានហៅការចាប់ខ្លួនលោក មាស ប៉េង ថាជាការគំរាមកំហែងផ្នែកនយោបាយ និងអំពាវនាវឲ្យមានការដោះលែង

ជំទប់ទី១ជាប់ឆ្នោតនៅក្នុងអាណត្តិថ្មី ឃុំបន្ទាយដែក ស្រុកកៀនស្វាយ ខេត្តកណ្តាល មកពីគណ បក្ស សម រង្ស៊ី លោក មាស ប៉េង កាលពីព្រឹកថ្ងៃទី១២ ខែមិថុនា ឆ្នាំ២០១២ វេលាម៉ោង៨និង​៣០​នាទី ត្រូវបានអាជ្ញា​ធរចាប់ខ្លួនខណះដែលលោកកំពុងតែពិសារកាហ្វេ នៅហាងការហ្វេ​មួយ ​ស្ថិ​ត​នៅក្នុងឃុំបន្ទាយដែក តាមដីការបស់សាលាដំបូងខេត្តកណ្តាល ។

សូមរំលឹកថាកាលពីថ្ងៃទី២២ ខែកញ្ញា ឆ្នាំ២០១១ លោក មាស ប៉េង ត្រូវបានលោក លឹម សុគន្ថា ចៅក្រមស៊ើបសួរបានធ្វើការចោទប្រកាន់ពីបទ « អ្នកផ្តើមគំនិតប្រើអំពើហិង្សាលើអ្នកកាន់កាប់ អចលនវត្ថុដោយសុច្ចរិត » ហើយបានបញ្ជាឲ្យនគរបាលចាប់បញ្ជូនទៅដាក់ពន្ធនាគារខេត្ត​កណ្តាល ដោយគ្មានដីការសម្រេចឃុំខ្លួន ។

ក៏ប៉ុន្តែដោយមានការតវ៉ាពីសំណាក់មេធាវីដែលបាន ការពារក្តីជូនលោកគឺលោក ជួង ជូងី និងដោយមានការឃ្លាំមើលពីអ្នកតំណាងរាស្រ្តផងនោះ លោក មាស ប៉េង ត្រូវបានមន្រ្តីពន្ធនាគារអនុញ្ញាត្តិឲ្យត្រឡប់មកផ្ទះវិញ ។ ដែលចាប់តាំងពីពេល នោះមក លោក មាស ប៉េង មានសេរីភាពជាធម្មតា និងបានបន្តរសកម្មភាពនយោបាយជាមួយ និងគណបក្ស សម រង្ស៊ី ជាពិសេសគឺលោកបានដឹកនាំយុទ្ធនាការឃោសនាបោះឆ្នោតជ្រើសរើស ក្រុមប្រឹក្សាឃុំ-សង្កាត់ អាណត្តិទី៣ នាថ្ងៃអាទិត្យ ទី០៣ ខែមិថុនា ឆ្នាំ២០១២ ហើយរូបលោកបាន ជាប់ឆ្នោតនៅក្នុងអាណត្តិថ្មីនេះជាជំទប់ទី១ ឃុំបន្ទាយដែក ស្រុកកៀនស្វាយ ខេត្តកណ្តាល ដែលកាលពីអាណត្តិចាស់លោក មាស ប៉េង គឺជាជំតប់ទី២ ។

ចាប់ចាប់ខ្លួនលោក មាស ប៉េង បន្ទាប់ពីការបោះឆ្នោតរួចនេះ ត្រូវបានគណបក្ស សម រង្ស៊ី ហៅថា ជាការ គំរាមកំហែងផ្នែកនយោបាយ និងបំបាក់ស្មារតីសកម្មជនរបស់គណបក្ស សម រង្ស៊ី និងជា ពិសេសប្រជាពលរដ្ឋដែលបានបោះឆ្នោតជូនគណបក្ស សម រង្ស៊ី នៅឃុំបន្ទាយដែកតែម្តង ។ តុលាការខេត្តកណ្តាលនិងមិនត្រូវធ្វើការចាប់ខ្លួនលោក មាស ប៉េង នោះទេ ពីព្រោះលោក មាស ប៉េង មិនបានប្រព្រឹត្តិដូចការចោទប្រកាន់នោះឡើយ ហើយសុំណុំរឿងដីធ្លីនៅឃុំព្រែកត្រែង នេះ បានបញ្ចប់ ដោយប្រជាពលរដ្ឋយល់ព្រមទទួលសំណងក្នុង១គ្រួសារចំនួន១០០០ដុល្លា ពីលោក ប្រាក់ សា វុធ រួចទៅហើយ ។ ម្យ៉ាងវិញទៀតអ្នកពាក់ព័ន្ធដែលត្រូវបានតុលាការធ្វើការចោទប្រ

កាន់ ដូចជាលោក ម៉ឹក ជា ក៏ត្រូវបានតុលាការដោះលែងហើយផងដែរ ។

គួររំលឹកបញ្ជាក់ជូនជាថ្មីម្តងទៀតថាលោក មាស ប៉េង កាលពីថ្ងៃទី២៣ ខែកញ្ញា ឆ្នាំ២០១២ ត្រូវ​បានលោក លឹម សុគន្ថា ចៅក្រមស៊ើបសួរ បានបញ្ជាឲ្យនគរបាលចាប់ខ្លួនលោក មាស ប៉េង យក​ទៅឃុំទាំងពុំមានដីកាសម្រេចឃុំខ្លួននោះឡើយ បើទោះបីជាកាលណោះលោក ជូង ជូងី ដែលជាមេធាវី ការពារក្តីជូនលោក មាស ប៉េង ទាមទាឲ្យលោក លឹម សុគន្ថា បង្ហាញដីកាឃុំខ្លួន​យ៉ាងណាក៏ដោយ ក៏លោក លឹម សុគន្ថា នៅតែមិនបានបញ្ចេញ និងមិនមានដីកាបង្ហាញមក​លោក ជូង ជូងី ដដែលគឺបានចាប់លោក មាស ប៉េង យកទៅពន្ធនាគារ ខេត្តកណ្តាលទាំងបំពាន ។ ក្រោយមកទើបលោក លឹម សុគន្ថា លោក វង្ស ប៊ុនវិសុទ្ធ និងលោក ស៊ុម បូរ៉ា បានឃុំឃិតគ្នា​ធ្វើដីការសម្រេចឃុំខ្លួនបណ្តុះអាសន្ន និងធ្វើដីកាបង្គាប់ឲ្យឃុំខ្លួនក្លែងបន្លំ បំភ្លៃការពិត ដាក់ចូល​ទៅក្នុងសុំណុំរឿងខាងលើ ដែលដីកាទាំងនោះគឺមានកំហុសជាច្រើនសឹង​រាប់ភ្លិច ។ ដែលមាន

ដូចជា ចុះថ្ងៃទី២០ ខែឧសភា ឆ្នាំ២០១១ ប៉ុន្តែលោក លឹម សុគន្ថា បានដាក់ថាសំណុំរឿង​ចុះថ្ងៃ​ទី២០ ខែឧសភា ឆ្នាំ២០១០ ទៅវិញ ហើយ នៅត្រង់កន្លែងកាលបរិច្ឆេទលោក លឹម សុគន្ថា បាន​ចុះកាលបរិច្ឆេទ កណ្តាល ថ្ងៃទី២៣ ខែកញ្ញា ឆ្នាំ២០១ ដែលមានស្នាមកែលេខ៣ និងដាក់ថា​ឆ្នាំ​២០១ ដែលបច្ចុប្បន្នកាលនោះ គឺឆ្នាំ២០១១ មិនមែនឆ្នាំ២០១ នោះទេ ។

មួយវិញទៀត នៅក្នុងដីការសម្រេចឃុំខ្លួនបណ្តុះអាសន្នក្រឡាបញ្ជី ស៊ុម បូរ៉ា ចុះថា « បានទទួល អនុវត្ត » ប៉ុន្តែចាប់តាំងពីបាននាំខ្លួនលោក មាស ប៉េង ទៅដល់ពន្ធនាគារ រហូតដល់លោក មាស ប៉េង ចេញពីពន្ធនាគារទៅផ្ទះនោះ មិនមានវត្តមានលោក លឹម សុគន្ថា ហើយក៏មិនមានវត្តមាន លោក វង្ស ប៊ុនវិសុទ្ធ ដែលសូម្បីតែក្រឡាបញ្ជីលោក ស៊ុម បូរ៉ា ក៏មិនមានវត្តមាននៅពន្ធនាគារ ដែរ ។ ដែលកាលណោះលោក លឹម សុគន្ថា បានចារថាបានជូនដំណឹងដល់ជនដែលត្រូវចោទ ឈ្មោះ មាស ប៉េង រួចហើយនិងថាក៏បានជូនដំណឹងដល់មេធាវីជនត្រូវចោទគឺលោក ជូង​ ជូងី រួច ហើយផងដែរ  ក៏ប៉ុន្តែអ្វីដែលជាការពិតគឺលោក មាស ប៉េង មិនបានផ្តិតមេដៃទទួលដំណឹងពីការ​សម្រេចឃុំខ្លួននោះទេ​ ។

សូមជំរាបជូនផងដែរថា ចំពោះដីកាបង្គាប់ឲ្យឃុំខ្លួនដែលលោក លឹម សុគន្ថា ធ្វើដាក់ចូលក្នុងសំ ណុំរឿងតាមក្រោយនោះ ក៏មានកំហុសឆ្គងជាច្រើនទៀត ដែលនៅក្នុងដីការបង្គាប់ឲ្យឃុំខ្លួនដាក់ ថា យោងដីកាសម្រេចឲ្យឃុំខ្លួនលេខ១៦៩១ ដកសឃខ ចុះថ្ងៃទី២៣ ខែកញ្ញា ឆ្នាំ២០១១ ដែល​មានស្នាមកែលេខ៣ ហើយនៅត្រង់ចំណុចទី១ នៃការបង្គាប់លោក លឹម សុគន្ថា បានដាក់ថា « ត្រូវចាប់ខ្លួននៅថ្ងៃទី២២ ខែកញ្ញា ឆ្នាំ២០១១ » ។ ដែលសូមជំរាបថានៅថ្ងៃទី២២ ខែកញ្ញា ឆ្នាំ​២០​១២ គឺមិនមានការចាប់ខ្លួនលោក មាស ប៉េង ទាល់តែសោះ ដែលនេះគឺជាកំហុសឆ្គង​របស់លោក​ចៅ​ក្រមស៊ើបសួរ លឹម សុគន្ថា ។ កាលណោះក្រោយពីបានសួរចំលើយហើយលោក មាស ប៉េង គឺបានវិលត្រឡប់ទៅផ្ទះវិញជាធម្មតា ។ និងនៅមានបញ្ហាជាច្រើនទៀតដែលលោកចៅ​ក្រម​ស៊ើប​សួរ លឹម សុគន្ថា បានធ្វើទាំងបំពាននិងរំលោភលើច្បាប់នោះ រួមជាមួយនិងការជាប់ពាក់ ព័ន្ធ​បញ្ហា​មួយចំនួនជាមួយនិងលោកមេធាវី ជូង ជូងី ផងដែរ ។

ដូចនេះហើយបានជាគណបក្ស សម រង្ស៊ី បានហៅការចាប់ខ្លួនលោក មាស ប៉េង ថាជាការ « គំរាមកំហែងផ្នែកនយោបាយ និងបំបាក់ស្មារតីសកម្មជនរបស់គណបក្ស សម រង្ស៊ី » ហើយគណ បក្ស សម រង្ស៊ី បានធ្វើការអំពាវនាវឲ្យសាលាដំបូងខេត្តកណ្តាលធ្វើការដោះលែងលោក មាស ប៉េង ឲ្យមានសេរីភាពឡើងវិញ ដូចជាករណីដែលតុលាការខេត្តកណ្តាលបានធ្វើការដោះលែង លោក ម៉ឹក ជា យ៉ាងដូចច្នោះដែរ ព្រោះថាលោក មាស ប៉េង ពុំបានប្រព្រឹត្តខុស ឬមានកំហុសអ្វី ដូចការចោទប្រកាន់នោះឡើយ ៕