ភ្នំពេញ: ខណៈដែលមានការលើកឡើងតពីមាត់មួយទៅមាត់មួយ និងមានការចុះផ្សាយដំណឹងក្នុងកាសែតផងនោះ មន្ត្រីជាន់ខ្ពស់រដ្ឋាភិបាលកម្ពុជា បានប្រកាសថា នៅពេលនេះ សុខភាពរបស់លោក សុខ អាន ឧបនាយករដ្ឋមន្ត្រី រដ្ឋមន្ត្រីទីស្តីការគណៈរដ្ឋមន្ត្រី បានល្អប្រសើរឡើងវិញហើយ។ ប៉ុន្តែលោកសុខអាន នៅបន្តសម្រាកព្យាបាល នៅក្នុងប្រទេសសឹង្ហបុរីនៅឡើយទេ។
ក្នុងទំព័រហ្វេសបុក របស់លោក ស្វាយ ស៊ីថា រដ្ឋលេខាធិការ និងជាប្រធានអង្គភាពព័ត៌មាន និងប្រតិកម្មរហ័ស របស់ទីស្តីគណៈរដ្ឋមន្ត្រី នៅថ្ងៃទី១៩កក្កដា ឆ្នាំ២០១២ បានលើកឡើងថា ក្នុងពេលលោកទៅសម្រាកព្យាបាលជំងឺនៅប្រទេសសឹង្ហបុរី លោកបានជួបជាមួយលោកឧបនាយករដ្ឋមន្ត្រី សុខ អាន ២ដង។ លោកឧបនាយករដ្ឋមន្ត្រី សុខ អាន មានសុខភាពល្អប្រសើរឡើងវិញហើយ ដោយអាចនិយាយបានឮជាងមុន និងអាចអង្គុយបានយូរជាងមុន។
យ៉ាងណាក៏ដោយ ក្នុងដំណឹងនោះ ដែលមន្ត្រីរដ្ឋាភិបាលបានបញ្ជូនដល់អ្នកកាសែតនោះ មិនបានបញ្ជាក់ថា លោកឧបនាយករដ្ឋមន្ត្រី សុខ អាន មានជំងឺអ្វីនោះទេ ដែលតម្រូវឲ្យបញ្ជូនលោក ទៅសង្គ្រោះបន្ទាន់ នៅក្នុងប្រទេសសឹង្ហបុរី ជាច្រើនថ្ងៃមកហើយ។
ក្នុងរយៈពេលចុងក្រោយនេះ លោកឧបនាយករដ្ឋមន្ត្រី សុខ អាន បានអវត្តមាន ពីកម្មវិធីសំខាន់ៗ ដោយសារតែបញ្ហាជំងឺ ហើយចេញទៅសង្គ្រោះបន្ទាន់ នៅប្រទេសសឹង្ហបុរី៕
No comments:
Post a Comment
yes