ភ្នំពេញ: លោក រ៉ុង ឈុន ប្រធានសមាគមគ្រូបង្រៀនកម្ពុជាឯករាជ្យ និងជាប្រធានសហភាពសហជីពកម្ពុជា បានសរសេរលិខិតទៅកាន់សម្តេចនាយករដ្ឋមន្ត្រី ហ៊ុន សែន ដោយបានស្នើសុំជួយផ្ដល់ដំណោះស្រាយជូនបងប្អូនកម្មករ-កម្មការិនី នៃរោងចក្រ តៃ ណាន អតីតរោងចក្រ តៃ យៀនទី១ ទី២ និងខេមវែល។
ក្នុងលិខិត ចុះថ្ងៃទី១៩កក្កដា ឆ្នាំ២០១២ លោក រ៉ុង ឈុន បានជម្រាបសម្តេច ហ៊ុន សែន ថា បន្ទាប់ពីលិខិតលេខ៨២៦ ខន/០១២ ចុះថ្ងៃទី១១ ខែកក្កដា ឆ្នាំ២០១២ របស់ខុទ្ទកាល័យសម្ដេចអគ្គមហាសេនាបតីតេជោ ផ្ញើជូនឯកឧត្តមរដ្ឋមន្ត្រីក្រសួងការងារ និងបណ្ដុះបណ្ដាលវិជ្ជាជីវៈ ឱ្យពិនិត្យមើលឡើងវិញចំពោះករណីការទាមទាររបស់បងប្អូនកម្មករ កម្មការិនី នៃរោងចក្រ តៃ ណាន (អតីតរោងចក្រ តៃ យៀនទី១ ទី២ និងខេមវែល) មិនទាន់មានដំណោះស្រាយនៅឡើយ។
លោក រ៉ុងឈុន លើកឡើងថា នៅថ្ងៃទី១៣ និងទី១៨ ខែកក្កដា ឆ្នាំ២០១២ មានជំនួបចរចាគ្នាក្រោមការសម្របសម្រួលគណៈកម្មការសម្រាប់ដោះស្រាយបញ្ហាកូដកម្ម បាតុកម្ម នៅតាមគ្រប់មុខសញ្ញា បងប្អូនកម្មករ កម្មការិនី មិនបានទទួលលទ្ធផលអ្វីឡើយ ហើយការទាមទាររបស់កម្មករ ឱ្យក្រុមហ៊ុនផ្ដល់នូវអត្ថប្រយោជន៍ផ្សេងៗតាមច្បាប់ ពេលក្រុមហ៊ុនប្ដូរឈ្មោះពីតៃ យៀន ទៅ តៃ ណាន ដោយគ្មានចេញលិខិតជូនដំណឹង និងលិខិតធានាអំពីអត្ថប្រយោជន៍របស់កម្មករ គឺនិយោជកត្រូវធានាខុសត្រូវចំពោះបងប្អូនកម្មករ កម្មការិនីតាមច្បាប់។
លិខិតបានបន្តថា បងប្អូនកម្មករ កម្មការិនី បានចំណាយពេលជាច្រើនថ្ងៃ ក្នុងការស្វែងរកដំណោះស្រាយមួយសមរម្យសម្រាប់ពួកគាត់ ( ប្រសើរជាង ៧០ដុល្លារ ក្នុងមួយឆ្នាំ ) ហើយបងប្អូនកម្មករ កម្មការិនី ស្នើយ៉ាងទទូច ពីព្រោះមានតែសម្ដេចទេ ទើបអាចអន្តរាគមន៍ចំពោះករណីនេះបាន។
មិនទាន់មានការឆ្លើយតបបែបណាឡើយពីសម្តេចនាយករដ្ឋមន្ត្រីហ៊ុន សែន ចំពោះលិខិតរបស់លោករ៉ុងឈុន ខាងលើ៕
No comments:
Post a Comment
yes