ពោធិ៍សាត់ៈ អាជ្ញាធរខេត្តបានព្យាយាមលាក់បាំងព័ត៌មានអំពីការឃុំខ្លួន ពលរដ្ឋនៅក្នុងចំណុចស្រែយក្ស ភូមិកំពង់ក្ដី ឃុំក្រពើពីរ ស្រុកវាលវែង ខណៈអាជ្ញាធរបើកយុទ្ធនាការបោសសម្អាតតំបន់ដែលគេចាត់ ថា ជាតំបន់អនាធិបតេយ្យ ដោយបង្ខំឲ្យពលរដ្ឋទីនោះចាកចេញពីលំនៅដ្ឋាន ក្រោមការចោទពីបទចាប់យកដីរដ្ឋខុសច្បាប់និងបង្កើតតំបន់អបគមន៍។
លោក សារុន ចន្ធី ស្នងការនគរបាលខេត្តពោធិ៍សាត់បានថ្លែងប្រាប់ឲ្យដឹងថា ពលរដ្ឋដែលត្រូវបានឃាត់ខ្លូននោះ គឺស្ថិតនៅក្នុងចំណាត់ការរបស់រដ្ឋបាលព្រៃឈើ ហើយលោកពុំបានដឹងព័ត៌មានលម្អិតអំពីការឃាត់ខ្លួនអ្នកទាំង នោះទេរហូតមកដល់ពេលនេះ។
លោកបានឲ្យដឹងថា ៖ «តាមខ្ញុំដឹង គឺពលរដ្ឋទាំងនោះខាងរដ្ឋបាលព្រៃឈើកំពុងរៀបចំបញ្ជូន សំណុំរឿងទៅតុលាការ»។
លោក លី ជូបៀង ប្រធានរដ្ឋបាលព្រៃឈើខេត្តពោធិ៍សាត់បានបដិសេធពុំធ្វើអត្ថា ធិប្បាយពីករណីនេះទេ ដោយតបយ៉ាងខ្លីថា៖ «ខ្ញុំពុំបានដឹងរឿងទេ ពីព្រោះខ្ញុំជាប់រវល់ ពុំបានចូលរួមក្នុងបេសកកម្មនេះ»។
លោក តន់ សីហតេជៈ ព្រះរាជអាជ្ញារងអមតុលាការខេត្តពោធិ៍សាត់បានឲ្យដឹងថា តាមលោកដឹងពលរដ្ឋដែលឃាត់ខ្លួននោះគឺស្ថិតនៅក្នុងដៃមន្ត្រី រដ្ឋបាលព្រៃឈើនៅឡើយ។ លោកបន្តថា ៖ «គេពុំទាន់បានបញ្ជូនសំណុំរឿងមកដល់យើងទេ»។ ប៉ុន្តែ បើតាមលោក ថោង អុល ប្រធានសាលាដំបូងខេត្តពោធិ៍សាត់អះអាងវិញថា សំណុំរឿងនោះគឺស្ថិតនៅក្នុងដៃលោកចៅក្រម លី ចន្ថា។
លោក លី ចន្ថា ចៅក្រមសាលាដំបូងខេត្តពោធិ៍សាត់ក៏បានបដិសេធពុំធ្វើអត្ថាធិប្បាយរឿងនេះដែរ ដោយគ្រាន់តែប្រាប់ថា«ខ្ញុំកំពុងជាប់រវល់ប្រជុំ»។
លោក ប៊ុល ស៊ុន អាយុ ៦១ឆ្នាំ ដែលត្រូវអាជ្ញាធរចោទថា បង្កើតតំបន់អបគមន៍បាននិយាយថា លោកពុំបានដឹងថា លោក បុល ដែលជាជនពិការត្រូវគេឃាត់ខ្លួននាំយកទៅណាទេ ហើយនៅថ្ងៃនេះពលរដ្ឋប្រាប់ថា អាជ្ញាធរបានចាប់ឈ្មោះធឿន ម្នាក់ទៀត ក៏មិនដឹងថា គេយកទៅណាដែរ។ លោកថា៖ «បើខ្ញុំអាចចេញទៅទីក្រុងភ្នំពេញរួច ខ្ញុំនឹងរត់ទៅផ្ទះសម្តេច ហ៊ុន សែន ឲ្យលោកជួយពីព្រោះយើងមិនបានធ្វើអ្វីខុសទេ ហេតុអីក៏មករុះផ្ទះពួកយើងចោល»។
លោកបន្តថា នៅថ្ងៃនេះអាជ្ញាធរបានឈូសផ្ទះពលរដ្ឋ ៥៣៧ខ្នង និងដុត៩៥ខ្នង ធ្វើឲ្យអ្នកនៅក្នុងភូមិ គ្មានអ្វីនៅសល់ទេ។
នៅក្នុងយុទ្ធនាការរបស់អាជ្ញាធរចម្រុះ គិតចាប់តាងពីថ្ងៃទី១៦ ដល់ថ្ងៃទី១៧ ខែកក្កដា អាជ្ញាធរបានរុះរើផ្ទះពលរដ្ឋ៥០០ខ្នង និងចាប់ខ្លួនពលរដ្ឋម្នាក់ជាជនពិការនិងកំពុងតាមស្វែងរកចាប់ អ្នកតំណាងបីនាក់ទៀត ក្រោមការចោទពីបទតាំងទីលំនៅបែបអនាធិបតេយ្យទន្ទ្រានយកដីរដ្ឋខុសច្បាប់ ហើយនិងបង្កើតតំបន់អបគមន៍៕
No comments:
Post a Comment
yes