ពលករខ្មែរពីរនាក់ដែលត្រូវបានគេជួញដូរតាមរយៈក្រុមហ៊ុន Giant Ocean International Limited ទៅលក់ពលកម្មនៅក្នុងប្រទេសអាហ្វ្រិកខាងត្បូង ត្រូវបានជួយសង្គ្រោះ និងត្រូវវិលត្រលប់មកប្រទេសកម្ពុជាវិញ នៅល្ងាចនេះ។
លោកហ៊ុយ ពេជ្រសុវណ្ណ មន្ត្រីកម្មវិធីនៃមជ្ឈមណ្ឌលអប់រំច្បាប់សម្រាប់សហគមន៍បានឲ្យដឹងនៅថ្ងៃសុក្រនេះថា ពលកររងគ្រោះទាំងពីរនាក់ខាងលើត្រូវបានក្រុមហ៊ុន Giant Ocean International Limited នាំទៅធ្វើការនៅប្រទេសជប៉ុនក្នុងឆ្នាំ២០១១ ប៉ុន្តែពួគគេត្រូវបានលក់បន្តទៅធ្វើជាទាសករនេសាទនៅក្នុងប្រទេសអាហ្វ្រិកខាងត្បូង។
លោកបានមានប្រសាសន៍ថា ពួកគេត្រូវបានជួយសង្គ្រោះដោយមជ្ឈមណ្ឌលអប់រំច្បាប់សម្រាប់សហគមន៍ និងត្រូវបានបញ្ជូនខ្លួនមកប្រទេសកម្ពុជាវិញនៅព្រលានយន្តហោះភ្នំពេញអន្តរជាតិ នៅល្ងាចថ្ងៃសុក្រទី២០ កក្កដានេះ វេលាម៉ោង ៥:៣០នាទី ។
លោកហ៊ុយ ពេជ្រសុវណ្ណបានបញ្ជាក់ថា បន្ទាប់ពីវិលត្រលប់មកប្រទេសខ្លួនវិញនេះ មជ្ឈមណ្ឌលអប់រំច្បាប់សម្រាប់សហគមន៍នឹងនាំពួកគេទៅដាក់ពាក្យប្តឹងក្រុមហ៊ុន Giant Ocean International Limited នៅនាយកដ្ឋាននគរបាលប្រឆាំងការជួញដូរមនុស្សនៅក្រសួងមហាផ្ទៃ មុននឹងពួកគេត្រូវបានបញ្ជូនទៅជួបជុំក្រុមគ្រួសាររបស់ពួកគេវិញ។
No comments:
Post a Comment
yes