កណ្តាល ៖ ថ្មីៗនេះនៅមុខសាលាខេត្តកណ្តាលមានពលរដ្ឋចំនួនបីឃុំបានប្រមូលគ្នាមកធ្វើការតវ៉ាអំពីបញ្ហាដីធ្លីដែលមានជម្លោះជាមួយក្រុមហ៊ុនហេងអភិវឌ្ឍន៍ហើយត្រូវឈ្មួញដ៏មានអំណាចរំលោភយកដីរបស់ពួកគាត់នាពេលកន្លងមកនោះដោយយោងតាមលិខិតស្នើសុំចុះថ្ងៃទី៩ ខែកក្កដា ឆ្នាំ២០១២ ដើម្បីឲ្យអាជ្ញាធរខេត្តកណ្តាល បង្កើតគណៈកម្មាធិការជំនាញចុះវាស់វែងដីធ្លីចំនួន ៤៥០ ហិកតាស្ថិតនៅក្នុងឃុំទី១ ឃុំកណ្ដោក២ ឃុំជើងកើប ស្រុកកណ្តាលស្ទឹង និងសង្កាត់ព្រែកហូរ ក្រុងតាខ្មៅ ខេត្តកណ្តាល ជូនប្រជាពលរដ្ឋចំនួន ២៩២ គ្រួសារ និងចេញប័ណ្ណសំគាល់សិទ្ធិកាន់កាប់ដីធ្លីផងនោះ។
កាលពីថ្ងៃទី២៣ ខែសីហា ឆ្នាំ២០១២ នៅវេលាម៉ោង ៨ និង ៣០ នាទីព្រឹកគេសង្កេតឃើញពលរដ្ឋដែលបានប្រមូលផ្តុំគ្នាមកធ្វើការតវ៉ារឿងដីធ្លីនៅក្នុងឃុំសង្កាត់ខាងលើនេះមានចំនួនប្រហែល ៥០ ទៅ ៦០ នាក់ជាអ្នកតំណាងឲ្យពលរដ្ឋចំនួន ២៩២ គ្រួសារមកផ្តុំគ្នានៅមុខសាលាខេត្តកណ្តាលដើម្បីស្នើសុំឲ្យអាជ្ញាធរអនុវត្តទៅតាមអនុសាសន៍ដ៏ខ្ពង់ខ្ពស់បំផុតរបស់សម្ដេចតេជោ ហ៊ុន សែន ដោយយោងតាមលិខិតស្នាមជាច្រើនដូចជា កំណត់ហេតុអនុវត្តសាលក្រមលេខ ៤០.វ ចុះថ្ងៃទី២៥ ខែកក្កដា ឆ្នាំ២០០៧
និងសាលក្រមលេខ ១២.វ ចុះថ្ងៃទី២៦ ខែកុម្ភះ ឆ្នាំ២០០៧ និងកំណត់ហេតុសាលក្រមលេខ ១២.វ ចុះថ្ងៃទី២១ ខែសីហា ឆ្នាំ២០០៧ លិខិតបំភ្លឺរបស់លោក ជ័យ សុវណ្ណ ចៅក្រមសាលាដំបូងក្រុងភ្នំពេញអតីតចៅក្រមសាលាដំបូងខេត្តកណ្តាលចុះថ្ងៃទី៧ ខែឧសភា ឆ្នាំ២០០៨ លិខិតលេខ ២១៥រប របស់អយ្យការអមតុលាការខេត្តកណ្តាលចុះថ្ងៃទី៥ ខែមិនា ឆ្នាំ២០០៧ លិខិតលេខ ១៨លជណ របស់អយ្យការអមតុលាការខេត្តកណ្តាលចុះថ្ងៃទី៧ ខែកុម្ភះ ឆ្នាំ២០០៧ លិខិតលេខ ១៣៥សជណ របស់ក្រសួងមហាផ្ទៃចុះថ្ងៃទី១៥ ខែវិច្ឆិកា ឆ្នាំ២០០៧ លិខិតលេខ ៣០៧សជណ របស់ក្រសួងមហាផ្ទៃចុះថ្ងៃទី២៩ ខែកុម្ភះ ឆ្នាំ២០០៨ លិខិតលេខ ១០១០កយព្រទ/០៩ របស់ក្រសួងយុត្តិធម៌ចុះថ្ងៃទី៦ ខែកក្កដា ឆ្នាំ២០០៩ លិខិតលេខ ៥៨០លស របស់ទីស្តីការគណៈរដ្ឋមន្ត្រីចុះថ្ងៃទី២៨ ខែមេសា ឆ្នាំ២០០៩ លិខិតលេខ ០៦៩/៤០៩/ពស/ខល របស់ព្រឹទ្ធសភាចុះថ្ងៃទី១០ ខែមេសា ឆ្នាំ២០០៩ លិខិតលេខ ២៩៥/១២០៩/ពស/ជក របស់ព្រឹទ្ធសភាចុះថ្ងៃទី៣០ ខែធ្នូ ឆ្នាំ២០០៩ លិខិតលេខ ៤៩/០៩អដដ របស់អាជ្ញាធរជាតិដោះស្រាយទំនាស់ដីធ្លី ដែលលិខិតទាំងអស់នេះ បានសម្រេចប្រគល់ដីធ្លីដែលក្រុមហេងអភិវឌ្ឍន៍រំលោភយក និងឲ្យអាជ្ញាធរបង្កើតគណៈកម្មាធិការជំនាញចុះវាស់វែងជូនប្រជាពលរដ្ឋជាស្ថាពរតាមនីតិវិធីច្បាប់ដែលបានកំណត់ ព្រមទាំងមានចំណាត់ការពីអយ្យការអមតុលាការខេត្តកណ្ដាលគឺលោក ហួត វុទ្ធី អតីតព្រះរាជអាជ្ញា និងលិខិតបំភ្លឺរបស់លោក ជ័យ សុវណ្ណ ចៅក្រមសាលាដំបូងក្រុងភ្នំពេញអតីតចៅក្រមសាលាដំបូងខេត្តកណ្ដាល និងលិខិតបំភ្លឺរបស់រដ្ឋមន្ត្រីក្រសួងយុត្តិធម៌ និងអគ្គលេខាធិការអាជ្ញាធរជាតិដោះស្រាយទំនាស់ដីធ្លីជាពិសេសលិខិតរបស់ព្រឹទ្ធសភាលេខ ២៩៥/១២០៩/ពស/ជក ចុះថ្ងៃទី៣០ ខែធ្នូ ឆ្នាំ២០០៩។
ក៏ប៉ុន្តែផ្ទុយទៅវិញអាជ្ញាធរមូលដ្ឋាន ជាពិសេសគឺឯកឧត្តម ឈុន ស៊ីរុន គណៈនៃគណៈអភិបាលខេត្តកណ្តាលមិនបានចាត់ចែងរៀបចំគណៈកម្មាធិការជំនាញធ្វើការចុះវាស់វែងដីធ្លីដែលមានផ្ទៃក្រឡាដូចខាងលើនេះ ចែកជូនពលរដ្ឋទាំងបីឃុំ ដែលមានពលចំនួន ២៩២ គ្រួសារនោះ។ ប្រជាពលរដ្ឋបានរិះគន់ថា អាជ្ញាធរថែមទាំងរួមគំនិតឃុបឃិតជាមួយក្រុមហ៊ុនហេងអភិវឌ្ឍន៍ធ្វើការលួចវាស់វែងចេញប្លង់កម្មសិទ្ធិឲ្យទៅក្រុមហ៊ុនដោយស្ងាត់ៗទៅវិញ គឺវាខុសពីគោលការណ៍របស់លិខិតនិងសាលក្រមចូលជាស្ថាពររបស់សាលាដំបូងខេត្តកណ្ដាល លិខិតរបស់ទីស្តីការគណៈរដ្ឋមន្ត្រី លិខិតរបស់អាជ្ញាធរជាតិដោះស្រាយទំនាស់ដីធ្លី លិខិតរបស់ក្រសួងមហាផ្ទៃ និងលិខិតរបស់ក្រសួងយុត្តិធម៌ទៅវិញ។
តំណាងរបស់ពលរដ្ឋចំនួន ២៩២ គ្រួសារដែលប្រមូលផ្តុំគ្នានៅមុខសាលាខេត្តកណ្តាលបានឲ្យវរជនខ្មែរដឹងថា បានជាពួកគាត់មកធ្វើការតវ៉ាពីបញ្ហាដីធ្លីនេះសាជាថ្មី ពីព្រោះអាជ្ញាធរខេត្តកណ្ដាលមិនព្រមរៀបចំបង្កើតគណៈកម្មាធិការចុះអនុវត្តវាស់វែងដីធ្លីដែលក្រុមហ៊ុនហេងអភិវឌ្ឍន៍បានរំលោភយកនោះចែកជូនឲ្យទៅពួកគាត់វិញ ងាយស្រួលពួកគាត់កាន់កាប់ស្របច្បាប់ដើម្បីធ្វើស្រែ ដាំដុះស្រូវ សម្រាប់ចិញ្ចឹមជីវិតទៅថ្ងៃអនាគត។ ពីព្រោះដីនេះគឺពួកគាត់បានកាប់គាស់ឆ្ការព្រៃកាន់កាប់ធ្វើស្រែតាំងពីឆ្នាំ១៩៩៩ មកម្ល៉េះ រហូតដល់ឆ្នាំ២០០៦ ស្រាប់តែមានក្រុមហ៊ុនហេងអភិវឌ្ឍន៍ដែលជាអ្នកមានអំណាចផងនោះបានមកធ្វើសកម្មភាពរំលោភយកទទេៗ ថែមទាំងយកកងកម្លាំងប្រដាប់អាវុធមកបណ្ដេញបង្ខំឲ្យពួកគាត់ឈប់មកធ្វើស្រែត្រង់ចំណុចដីរបស់ពួកគាត់នេះតែម្តង ហើយសមត្ថកិច្ចទាំងនោះគេបាននិយាយថា ដីចំណុចទំនប់ ៩៤ ទាំងអស់នេះជារបស់ក្រុមហ៊ុនទេមិនមានដីរបស់ពលរដ្ឋទៅវិញ។
ចាប់តាំងពីពលរដ្ឋបានដាក់ពាក្យបណ្ដឹងពីឆ្នាំ២០០៨ រហូតដល់ពេលបច្ចុប្បន្ននេះ ក្រុមហ៊ុនហេងអភិវឌ្ឍន៍ បានយកកម្លាំងប៉េអឹមមួយក្រុមឲ្យទៅយាមជាប្រចាំត្រង់ចំណុចដីមានទំនាស់រហូតមក សូម្បីនៅរដូវទឹកឡើងប្រជាពលរដ្ឋអុំទូករាយមង ចងសន្ទូចជាលក្ខណៈគ្រួសារ ដោយឆ្លងកាត់តាមដីនោះក៏មិនបានផង។ បើប្រជាពលរដ្ឋហ៊ានរឹងទទឹងកម្លាំងប៉េអឹមទាំងនោះ ឃើញពួកគេនឹងចាប់វាយខ្នោះភ្លាម។ ប្រជាពលរដ្ឋទាំងបីឃុំមានចំនួន ២៩២ គ្រួសារកំពុងរងទុក្ខលំបាកដោយសារក្រុមហ៊ុនហេងអភិវឌ្ឍន៍រំលោភយកដីស្រែប្រាំងចំនួន ៤៥០ ហិកតាសូមគោរពឱនកាយដល់សម្តេចតេជោ ហ៊ុន សែន ដ៏ខ្ពង់ខ្ពស់ មេត្តាជួយអន្តរាគមន៍ផ្តល់ដីជូនប្រជាពលរដ្ឋបានធ្វើស្រែវិញដោយក្តីមេត្តាធម៌៕
No comments:
Post a Comment
yes