ប្រជាពលរដ្ឋរស់នៅភូមិពូត្រំ សង្កាត់រមនា ក្រុងសែនមនោរម្យ នៅថ្ងៃព្រហស្បត្តិ៍ ទី១៣ ខែកញ្ញា ឆ្នាំ២០១២ ចោទប្រកាន់មន្ត្រីព្រៃឈើ និងមន្ត្រីកងរាជអាវុធហត្ថប្រចាំព្រៃអភិរក្សសត្វដំរី នៅតំបន់ពូត្រំលើ ថាបានជំរិតយកប្រាក់៥០០ដុល្លារពីគាត់ ដោយសារគាត់បានដឹកជញ្ជូនឈើប្រណិតបីកំណាត់ពីចម្ការ ហើយឆ្លងកាត់ព្រៃអភិរក្សសត្វដំរី ក្នុងខេត្តមណ្ឌលគិរី។
មន្ត្រីទាំងពីររូបដែលរងការចោទប្រកាន់នោះ គឺលោក មីយ៊ូ រ៉ាវី ជាកងរាជអាវុធហត្ថលើផ្ទៃប្រទេស និងលោក យឹម ព្រីយ៉ា មន្ត្រីខណ្ឌរដ្ឋបាលព្រៃឈើ ខេត្តមណ្ឌលគិរី។
ប្រជាពលរដ្ឋរស់នៅភូមិពូត្រំ លោក ចាន់ គា មានប្រសាសន៍បញ្ជាក់ថា កាលពីថ្ងៃអង្គារ មន្ត្រីបង្ក្រាបទាំងពីររូបបានស្ទាក់ចាប់គោយន្តដឹកជញ្ជូនឈើរបស់គាត់ នៅក្នុងព្រៃភូមិដំរីជាន់ ហើយបង្ខំទារប្រាក់២ពាន់ដុល្លារជាថ្នូរដោះលែង ក៏ប៉ុន្តែ លោករកប្រាក់បានតែ៥០០ដុល្លារប្រគល់ឲ្យមន្ត្រីទាំងពីរ និងសន្យាថាសុខចិត្តសងជំពាក់ប្រាក់នៅពេលក្រោយ ទើបមន្ត្រីទាំងពីរអនុញ្ញាតឲ្យចេញពីព្រៃ៖ «គ្រាន់តែឈើពីរដុំបីដុំយកពីចម្ការមក យកមកធ្វើកៅអី គេចុះទៅគេចាប់។ គេទារដំបូង គេទារ២.០០០។ ខ្ញុំប្រាប់ ហើយវាថាបើមិនឲ្យ វាចាប់ វាហៅសមត្ថកិច្ចផ្សេងៗមកចាប់ ទាល់តែឲ្យលុយគេបានឲ្យយើងសម្រុះសម្រួលនៅសល់១.២០០។ ខ្ញុំរត់ទៅខ្ចីគេបាន៥០០ ឲ្យគាត់សិន ហើយសល់ប៉ុន្មានជំពាក់គាត់ក្រោយទៀត»។
ដូចគ្នានេះដែរ ប្រជាពលរដ្ឋរស់នៅភូមិពូត្រំ ម្នាក់ទៀត គឺលោក គួយ សុឃុន មានប្រសាសន៍បញ្ជាក់ថា លោក និងប្រជាពលរដ្ឋអ្នកចូលព្រៃកាប់ឈើធ្វើលំនៅឋានជាច្រើន ត្រូវបង់ប្រាក់ទៅឲ្យមន្ត្រីបង្ក្រាបទាំងនោះ ទើបអាចចេញចូលកាប់ឈើបាន។ លោកបន្តថា បទល្មើសព្រៃឈើជាច្រើន ដឹកជញ្ជូនចេញពីព្រៃដែនជម្រកសត្វព្រៃភ្នំពេ្រច កាត់តាមច្រកព្រៃអភិរក្សសត្វដំរី មិនមានការបង្ក្រាបឡើយ៖ «ឡានពួកឈ្មួញវាចេញពីភូមិពូត្រំ មកខាងមេម៉ង់មកស្រែ ហួសពីតំបន់វា ប៉ុន្តែវាដាក់បារ៉ាស់ គេបង់លុយឲ្យវាអ៊ីចឹងទៅ។ ប៉ុន្តែឈ្មួញ វាធម្មតា វាគាបសង្កត់លើឈ្មួញត្រូវហើយ ប៉ុន្តែវាគាបសង្កត់លើប្រជាពលរដ្ឋអ៊ីចឹង»។
ឆ្លើយតបការចោទប្រកាន់មន្ត្រីកងរាជអាវុធហត្ថ លោក មីយ៉ូ រ៉ាវី បានបដិសេធថា លោកមិនបានជំរិតទារប្រាក់អ្វីពីប្រជាពលរដ្ឋអ្នកដឹកជញ្ជូនឈើ នៅតំបន់នោះទេ។ លោកបន្តថា ភារៈលោក គឺការពារព្រៃអភិរក្សសត្វដំរី កុំឲ្យមានការកាប់បំផ្លាញតែប៉ុណ្ណោះ៖«ខ្ញុំអត់ដែលទេ ព្រោះខ្ញុំដើរក្នុងតំបន់អភិរក្ស តំបន់ការពារមើលក្រែងគេកាប់ ក្រែងមានម៉ាស៊ីនស្អីអ៊ីចឹងណា! ម្សិលមិញចាប់បានម៉ាស៊ីនមួយដែរ»។
ចំណែកមន្ត្រីព្រៃឈើ លោក យឹម ព្រីយ៉ា ក៏បានបដិសេធសេចក្តីចោទប្រកាន់នេះដូចគ្នាដែរ៖ «ខ្ញុំអត់ដឹងទេ ខ្ញុំអត់មានទៅលាក់កំបាំងរឿងបទល្មើសព្រៃឈើទេ។ ខ្ញុំអត់មានទេ ខ្ញុំនៅត្រឹមតែពូត្រំ ទេ ហើយនៅត្រឹមដំរីជាន់ ខ្ញុំក៏អត់បានដឹង ខ្ញុំនិយាយត្រង់ ខ្ញុំអត់ទាន់បានទៅដល់ហ្នឹងដែរ។ អ្នករាយការណ៍ព័ត៌មាននេះ វាលឿនជ្រុលពេក ខ្ញុំអត់ទាន់ដឹង»។
កាលពីចុងខែសីហា កន្លងទៅនេះ ប្រធានសហគមន៍អភិរក្សព្រៃឈើឈ្មោះសហគមន៍ឡៃកា ក្នុងសង្កាត់សុខដុម្យ ក្រុងសែនមនោរម្យ បានរាយការណ៍ថា សកម្មភាពកាប់ឈើប្រណិតធ្វើអាជីវកម្មនៅបន្តកើតមាននៅក្នុងតំបន់ដែនជម្រកសត្វព្រៃភ្នំព្រេច នៅឡើយទេ។
ប្រធានសហគមន៍ឡៃកា លោក ផ្លឹក ម៉ាល់ សម្ដែងការព្រួយបារម្ភពីសុវត្ថិភាព បន្ទាប់ពីលោកបានរាយការណ៍ពីសកម្មភាពកាប់បំផ្លាញព្រៃឈើ ក្នុងតំបន់អភិរក្ស។ លោកបន្តថា ក្រុមបុគ្គលជាមន្ត្រីពាក់ព័ន្ធបទល្មើសព្រៃឈើ បានគំរាមកំហែងចំពោះសុវត្ថិភាពលោក៖ «បើយើងចង់មើលប្រហែលបាន១០០គីប ខ្លះមិនទាន់ជញ្ជូនដាក់រទេះទេ។ យើងដើរតាមព្រៃ ឃើញរូបភាពនេះ ខ្ញុំថតបានអស់។ តំបន់អូររនូស អូរដូនហ្សា ស្រែម៉ែអែល អាហ្នឹងកន្លែងគេកាប់បំផ្លាញ បេង នាងនួន ធ្នុង ហើយឥឡូវនេះ ឲ្យតែឈើប្រភេទក្រហម គេកាប់ទាំងអស់»។
យ៉ាងនេះក្តី នាយខណ្ឌរដ្ឋបាលព្រៃឈើ ខេត្តមណ្ឌលគិរី លោក កែប តក់ មានប្រសាសន៍បញ្ជាក់ថា មន្ត្រីជំនាញព្រៃឈើកំពុងចាត់វិធានការតឹងរ៉ឹងបំផុត ក្នុងការបង្ក្រាបបទល្មើសព្រៃឈើ។ លោកអំពាវនាវឲ្យប្រជាពលរដ្ឋសហការផ្តល់ព័ត៌មានមកខណ្ឌរដ្ឋបាលព្រៃឈើ ចំពោះមន្ត្រីព្រៃឈើណាដែលបានប្រព្រឹត្តអំពើពុករលួយ ទទួលប្រាក់ពីសកម្មភាពបង្ក្រាបបទល្មើសព្រៃឈើ៖«ខ្ញុំកំពុងតែស្រាវជ្រាវរកនរណាដែលនៅហ៊ានប្រព្រឹត្តបទល្មើស យកលុយហ្នឹង ព្រោះឥឡូវខាងរដ្ឋបាលព្រៃឈើ ខ្ញុំកំពុងចាត់វិធានការតឹងរ៉ឹងបំផុត។ រឿងអ្វីបានជាគាត់មិនរាយការណ៍មកខាងរដ្ឋបាលព្រៃឈើ បានន័យថា គាត់អត់សហការល្អជាមួយខ្ញុំ។ ខ្ញុំកំពុងតែការពាររឿងសហគមន៍ គាត់យល់ហើយរឿងសហគមន៍ គាត់ត្រូវការពាររបៀបម៉េច។ គាត់ឃើញបទល្មើសព្រៃឈើ គាត់រាយការណ៍។ អ្នកណាដែលចាត់វិធានការបាន អត់មានទៅលេងសើចបានទេបទល្មើសព្រៃឈើ»។
អ្នកសម្របសម្រួលសមាគមអាដហុក ខេត្តមណ្ឌលគិរី លោក គល់ មីឌី កត់សម្គាល់ថា លោកបានទទួលពាក្យបណ្ដឹងច្រើនពីប្រជាពលរដ្ឋ ស្ដីពីបទល្មើសព្រៃឈើកើតមាននៅក្នុងខេត្ត ក៏ប៉ុន្តែ ចំណាត់ការបង្ក្រាបនៅខ្សោយមិនមានប្រសិទ្ធភាព។
លោកចាប់អារម្មណ៍ថា ប្រជាពលរដ្ឋ ឬសហគមន៍អ្នកអភិរក្សព្រៃឈើ កាន់តែឃ្លាតឆ្ងាយក្នុងកិច្ចសហការជាមួយមន្ត្រីបង្ក្រាប ដែលមិនបានបំពេញតួនាទីត្រឹមត្រូវនោះ៖ «បទល្មើសព្រៃឈើនៅខេត្តមណ្ឌលគិរី ជារឿយៗយើងឃើញថា នៅតែមានការកើតឡើង ហើយប្រជាពលរដ្ឋតែងតែផ្តល់ព័ត៌មានជាញឹកញាប់ ក៏ដូចជាបានធ្វើពាក្យប្ដឹងជាញឹកញាប់ទៅដល់មន្ត្រីមានសមត្ថកិច្ច អាជ្ញាធរមានសមត្ថកិច្ច។ ប៉ុន្តែយើងឃើញចំណាត់ការរបស់អាជ្ញាធរមិនមើលឃើញកាត់ទោសណាមួយឲ្យប្រជាពលរដ្ឋសហគមន៍អស់ចិត្តនោះទេ។ បើសិនជានៅរបៀបនេះតទៅទៀត យើងឃើញថា ភាពនៃការជឿជាក់របស់ប្រជាពលរដ្ឋទៅលើប្រព័ន្ធរដ្ឋាភិបាលឆ្ងាយទៅៗ»។
ក្រុមសមាជិកសហគមន៍ឡៃកា អ្នកដើរល្បាតព្រៃរាយការណ៍ថា គេបានរកឃើញគំនរឈើប្រណិតអារជាឈើជ្រុងរាប់រយម៉ែត្រគូប នៅតាមអូរចំនួនបី ក្នុងតំបន់ព្រៃអភិរក្ស ដែលគេត្រៀមដឹកជញ្ជូនចេញពីព្រៃ៕
No comments:
Post a Comment
yes