មេដឹកនាំសហជីពអ្នកស្រី យ៉ាង សុភ័ណ្ឌ និងលោក រ៉ុង ឈុន ក្នុងកូដកម្មកម្មករ
រោងចក្រតៃយ៉ាង
ភ្នំពេញៈ លោករ៉ុង ឈុន ប្រធានសហភាពសហជីពកម្ពុជានឹងចូលទៅអយ្យការអមសាលាដំបូង ខេត្តកណ្តាល ដើម្បីធ្វើការបំភ្លឺ តាមដីកាកោះលើកទីពីរ ពាក់ព័ន្ធនឹងសំណុំរឿងដែលឈ្មោះ Jack Liu អគ្គនាយកនៃសហគ្រាសតៃ យ៉ាងប្តឹងលោករ៉ុង ឈុនពីបទញុះញង់ឲ្យកម្មករធ្វើកូដកម្មដោយខុសច្បាប់ និងបទបរិហាកេរ្តិ៍ជាសាធារណៈ។
លោករ៉ុង ឈុនបានប្រាប់ភ្នំពេញ ប៉ុស្តិ៍តាមទូរស័ព្ទនៅថ្ងៃព្រហស្បតិ៍នេះថា លោកនឹងធ្វើការចូលខ្លួនទៅបំភ្លឺ តាមដីកាកោះរបស់សាលាដំបូងខេត្តកណ្តាល បើទោះជាលោកមិនទាន់រកបានមេធាវីក៏ដោយ។
តំណាងអយ្យការអមសាលាដំបូងខេត្តកណ្តាលលោក ទេព មុនិន្ន បានចេញដីកាកោះជាលើកទីពីរអញ្ជើញលោក រ៉ុង ឈុន មកធ្វើការសាកសួរក្នុងបទចោទប្រកាន់ខាងលើនៅថ្ងៃទី២៧ ខែកញ្ញាឆ្នាំ២០១២ខាងមុខនេះ។
សូមបញ្ជាក់ថាលោក ទេព មុនិន្ន បានចេញដីកាកោះហៅលោករ៉ុង ឈុនម្តងរួចមកហើយ ឲ្យចូលទៅកាន់អយ្យការអមសាលាដំបូងខេត្តកណ្ដាល កាលពីថ្ងៃទី១១ ខែកញ្ញា ឆ្នាំ២០១២ ប៉ុន្តែលោករ៉ុង ឈុន ប្រធានសហភាពសហជីពកម្ពុជា បានស្នើសុំពន្យារពេលចូលបំភ្លឺ ដោយមូលហេតុថា មិនទាន់រកបានមេធាវីការពារសិទ្ធិ និងមិនទាន់មានការត្រៀមខ្លួន ក្នុងការការពារសិទ្ធិរបស់ខ្លួននៅឡើយ។
No comments:
Post a Comment
yes