ទិដ្ឋភាពនៅខាងក្រៅកាស៊ីណូមួយនៅក្រុងបាវិត ខេត្តស្វាយរៀង កាលពីថ្ងៃចុងសប្ដាហ៍
ស្វាយរៀងៈ រៀងរាល់ព្រឹកនៅម៉ោង ៧ អ្នកលេងល្បែងជនជាតិបរទេសជាច្រើននាក់បានឆ្លងដែនពីប្រទេសវៀតណាម ចូលមកទីក្រុងបាវិត ខេត្តស្វាយរៀង ដើម្បីមកលេងល្បែងជាប្រចាំនៅតាមកាស៊ីណូនានាក្បែរព្រំដែន។
តាមបណ្តោយព្រំដែន អ្នកបើកបរម៉ូតូកង់បី និងរថយន្តកាស៊ីណូ កំពុងរង់ចាំដឹកអ្នកលេងល្បែងជនជាតិវៀតណាម ទៅកាន់កាស៊ីណូជិតបំផុតប្រហែលជាង ១០០ គីឡូម៉ែត្រ ដែលទទួលយកប្រាក់ដុង ក្នុងការភ្នាល់និងដែលមានបុគ្គលិកចេះភាសាវៀតណាម។
ប៉ុន្តែ ពេញមួយថ្ងៃនោះ អ្នកលេងល្បែងជនជាតិកម្ពុជាហូរហែក៏បានឆ្លងកាត់កងសន្តិសុខ ចូលទៅអង្គុយនៅតុ Baccarat ឬស្លុតម៉ាស៊ីនដែរ។
បុគ្គលិកមកពីកាស៊ីណូ Las Vegas Sun ម្នាក់បានប្រាប់ឲ្យដឹងថា៖ «ខ្មែរ អាចលេងល្បែងនៅតុណាក៏បាន។ គ្រាន់តែប្តូរប្រាក់របស់ខ្លួននៅកន្លែងប្តូរប្រាក់ទៅជា កាក់ជាមុនសិន»។
នៅម៉ោងជិត ៩ យប់ មានអ្នកលេងល្បែងជាជនជាតិកម្ពុជាជាច្រើនថែមទៀតបានមកលេងល្បែង ក្រោមការឃ្លាំមើលពីអ្នកចាត់ការ អ្នកគ្រប់គ្រង និងសន្តិសុខរបស់កាស៊ីណូនានា។
កាលពីខែសីហា កិច្ចប្រជុំមួយបានរៀបចំឡើងនៅរាជធានីភ្នំពេញ ដែលប្រមូលផ្តុំគណៈគ្រប់គ្រងពីកាស៊ីណូទាំង៦១ កន្លែង នៅក្នុងព្រះរាជាណាចក្រកម្ពុជា ដើម្បីដោះស្រាយបញ្ហាបទល្មើសកើនឡើងនៅក្នុងកាស៊ីណូ។
បើទោះជាភ្ញៀវ និងបុគ្គលិកកាស៊ីណូនៅទីក្រុងបាវិតមើលមិនឃើញក៏ដោយ ក៏ប៉ុន្តែលោកឧត្តមសេនីយ៍ សុខ ផល អគ្គស្នងការរងនគរបាលជាតិបានលើកឡើងពីចំណុចនេះយ៉ាងច្បាស់ថា៖ « យើងសូមលើកទឹកចិត្តម្ចាស់កាស៊ីណូទាំងអស់ឲ្យគោរពច្បាប់កម្ពុជា ឲ្យបានតឹងរ៉ឹង ហើយសុំបញ្ឈប់ការអនុញ្ញាតឲ្យប្រជាជនកម្ពុជាចូល និងទៅលេងល្បែងក្នុងកាស៊ីណូរបស់ខ្លួនជាបន្ទាន់»។
ប្តូរពីកាស៊ីណូនៅលើនាវា ទៅជាកាស៊ីណូនៅតាមព្រំដែនវិញ
ការលេងល្បែងទោះក្នុងទម្រង់ណាក៏ ដោយ សម្រាប់ប្រជាជន គឺជាអំពើខុសច្បាប់នៅកម្ពុជា នេះបើយោងទៅតាមច្បាប់ស្តីពីការបង្រ្កាបល្បែង ដែលបានអនុម័តដោយរដ្ឋសភា នៅក្នុងអំឡុងឆ្នាំ ១៩៩៦។
ក្នុងឆ្នាំ ១៩៩៤ អាជ្ញាប័ណ្ណកាស៊ីណូទី១ ត្រូវបានផ្តល់ឲ្យណាហ្គាវើលដែលបើកនៅលើនាវាដែលស្ថិតនៅដងទន្លេ ចតុមុខ ក្នុងរាជធានីភ្នំពេញ។
ចាប់តាំងពីពេលនោះមក អាជ្ញាប័ណ្ណកាស៊ីណូត្រូវបានផ្តល់ដោយរដ្ឋាភិបាល ប៉ុន្តែ រាជរដ្ឋាភិបាល និងប្រតិបតិ្តករកាស៊ីណូ បានអនុវត្តគោលនយោបាយគ្មានប្រជាជនក្នុងស្រុកចូលលេងល្បែង ដោយធូររលុងនោះទេ។
លោក Thomas Pearson ទីប្រឹក្សាច្បាប់ជាន់ខ្ពស់នៃក្រុមមេធាវី BNG Legal បានថ្លែងថា ៖ «ច្បាប់ល្បែងកម្ពុជាពុំទាន់គ្រប់ជ្រុងជ្រោយ និងផ្លូវការនៅឡើយទេ»។
ស្រដៀងនឹងកាស៊ីណូនៅព្រំដែនវៀតណាម ទីក្រុងអូរស្មាច់ព្រំដែនថៃ មានជនជាតិថៃប្រហែល ២០០០ នាក់ បានឆ្លងកាត់ព្រំដែនជារៀងរាល់ថ្ងៃ។ នេះបើយោងតាមលោក ឃុន សារ៉ុន មេបញ្ជាការកងរាជអាវុធហត្ថក្រុងអូរស្មាច់ ខេត្តឧត្ដរមានជ័យបានឲ្យដឹង។
ទោះជាយ៉ាងណា នៅពេលមន្រ្តីនគរបាល និងសន្តិសុខកាស៊ីណូបញ្ចប់វេនធ្វើការ ប្រជាជនកម្ពុជាចូលទៅក្នុងកាស៊ីណូបានយ៉ាងងាយស្រួល។
លោក ឃុន សារ៉ុន បានបន្តថា៖ «នៅតែមានប្រជាជនកម្ពុជា ជាច្រើននាក់ ដែលចាញ់ល្បែង ហើយអស់ផ្ទះសម្បែង និងក្លាយជាអ្នកក្រ។ អ្នកខ្លះក្លាយជាអ្នកសុំទាន ព្រោះតែគេញៀនល្បែង»។
គជ់នៃរាជធានីភ្នំពេញ
កាស៊ីណូ ណាហ្គាវើល នៅកណ្តាលរាជធានីភ្នំពេញសម្បូរដោយភ្ញៀវ កាលពីរសៀលថ្ងៃចន្ទ ថ្មីៗនេះ ដែលប្រមូលផ្តុំគ្នានៅតុល្បែង blackjack ទូរ៉ូឡែត តុ baccarat និងស្លុតម៉ាស៊ីន។ បើទោះបីជាមានកងសន្តិសុខស្លៀកពាក់ឯកសណ្ឋានច្រើនក៏ដោយ ក៏ប៉ុន្តែជនជាតិខ្មែរដើរចូលកាស៊ីណូដោយសេរី ហើយខ្លះចូលលេងនៅតុល្បែងទៀតផង។
សន្តិសុខម្នាក់ថា៖ «គ្មានការហាមឃាត់ប្រជាជនខ្មែរមកកាន់ទីនេះទេ។ ពួកគេអាចមកបានដោយសេរី»។
បុរសជនជាតិខ្មែរម្នាក់ អាយុ ៣២ ឆ្នាំ បាននិយាយថា លោកមក ណាហ្គាវើលជាប្រចាំ ហើយអាចឈ្នះ ឬចាញ់ ១ពាន់ដុល្លារអាមេរិក ជារៀងរាល់ថ្ងៃ។
លោកលើកឡើងថា៖ «ខ្ញុំមកទីនេះ ព្រោះខ្ញុំជំពាក់ប្រាក់ ឥឡូវនេះ ខ្ញុំមកទីនេះ៥ថ្ងៃ ក្នុងមួយសប្តាហ៍។ គេមិនដែលប្រាប់ខ្ញុំថា ខ្ញុំមិនអាចលេងល្បែងបានទេ។ ប្រសិនបើខ្ញុំលេងឈ្នះបានមួយលានដុល្លារ ខ្ញុំនៅតែមកវិញនៅថ្ងៃស្អែកទៀតដដែល»។
លោក Florian Pastiu ប្រធានប្រតិបតិ្តការកាស៊ីណូ ណាហ្គាវើលបានបដិសេធមិនផ្តល់ការអត្ថាធិប្បាយទេលើបញ្ហានេះ ប៉ុន្តែ លោកកត់សម្គាល់ដែរថា មានប្រជាជនកម្ពុជាដែលមានសញ្ជាតិពីរ អាចលេងល្បែងដោយស្របច្បាប់បាន។
ក្រុមហ៊ុនណាហ្គាវើលមិនបានធ្វើអត្ថាធិប្បាយណាមួយនោះទេទាក់ទងនឹងបញ្ហានេះ បើទោះបីភ្នំពេញ ប៉ុស្ដិ៍ បានស្នើសុំជាច្រើនដងក៏ដោយ។
យោងតាមប្រភពដែលយល់ដឹងច្បាស់ ពីប្រតិបតិ្តការល្បែងនៅកម្ពុជាបានឲ្យដឹងថា ប្រាក់ចំណូលច្រើនជាង៧០ ភាគរយរបស់ ណាហ្គាវើល គឺបានមកពីអ្នកលេងល្បែងក្នុងស្រុក ហើយប្រាក់ចំណូលជាច្រើនបានមកដោយសារជនកម្ពុជាញៀនម៉ាស៊ីនល្បែង។
លោក Traci Mangini ទីប្រឹក្សាហិរញ្ញវត្ថុរបស់ក្រុមហ៊ុន Entertainment Gaming Asia ជាក្រុមហ៊ុនពហុជាតិ ដែលជួលនិងគ្រប់គ្រងរួមលើស្លុតម៉ាស៊ីនចំនួន ៦៧០ គ្រឿងនៅ ណាហ្គាវើលបានថ្លែងបញ្ជាក់ដែរថា៖ «ប្រភពចំណូលចម្បងរបស់យើងនៅកម្ពុជាបច្ចុប្បន្ន គឺស្លុតម៉ាស៊ីនៅកាស៊ីណូ ណាហ្គាវើល»។
ការយកពន្ធដ៏ធូររលុង
កាស៊ីណូ ៦១ កន្លែង ក្នុងប្រទេសកម្ពុជាត្រូវគោរពតាមរចនាសម្ព័ន្ធដោយឡែកពីក្រុមហ៊ុន ប្រហែលដើម្បីជំរុញការវិនិយោគ និងឧស្សាហកម្មល្បែង។
ការ យកពន្ធកាស៊ីណូត្រូវបានគ្រប់គ្រង ដោយក្រសួងសេដ្ឋកិច្ចនិងហិរញ្ញវត្ថុ បើទោះជាសេចក្តីលម្អិតនៃកិច្ចព្រមព្រៀងកំណត់ពន្ធកាស៊ីណូ ពុំទាន់មានលក្ខណៈច្បាស់លាស់ក៏ដោយ។
លោក វ៉ាន់ ម៉ី ប្រធាននាយកដ្ឋានឧស្សាហកម្មហិរញ្ញវត្ថុ បានមានប្រសាសន៍ថា ៖ «កាស៊ីណូនីមួយៗមានសកម្មភាពខុសៗគ្នា។ បើកាស៊ីណូរកចំណូលបានច្រើន កាស៊ីណូនឹងបង់ពន្ធច្រើន បើកាស៊ីណូរកចំណូលបានតិច គេបង់ពន្ធតិច»។
លោក វ៉ាន់ ម៉ី បានបដិសេធមិនរៀបរាប់លម្អិតអំពីរចនាសម្ព័ន្ធនៃការប្រមូលពន្ធពីកាស៊ីណូទេ។
យោងតាមរបាយការណ៍ហិរញ្ញវត្ថុឆ្នាំ ២០១១ របស់ ណាហ្គាវើល កាស៊ីណូបានបង់ពន្ធតាមកំណត់ព្រមព្រៀង។ ក្រុមហ៊ុនកាស៊ីណូនេះបានបង់ពន្ធល្បែងចំនួន ២២៨០៦៩ ដុល្លារអាមេរិក ក្នុងមួយខែ និងពន្ធក្រៅពីល្បែង ១០៣៥០០ ដុល្លារ ក្នុងមួយខែទៅឲ្យក្រសួងសេដ្ឋកិច្ចនិងហិរញ្ញវត្ថុ។
ការព្រមព្រៀងបែបនេះអនុញ្ញាតឲ្យ ណាហ្គាវើល បង់ពន្ធត្រឹមតែ ៣,៩៨ លានដុល្លារអាមេរិក ក្នុងមួយឆ្នាំលើប្រាក់ចំណូល ៩៦ លានដុល្លារអាមេរិកសម្រាប់ឆ្នាំ ២០១១។ គឺជាអត្រាពន្ធប្រចាំឆ្នាំ ៤,១ ភាគរយ ដែលតិចជាងអត្រាពន្ធក្រុមហ៊ុន ២០ ភាគរយ។
ការ យកពន្ធមួយចំណែកតូច ដោយរដ្ឋាភិបាលកម្ពុជា ចោទជាសំណួរថា តើអ្នកណាទទួលបានអត្ថប្រយោជន៍ពីកាស៊ីណូទាំងនេះ នៅកម្ពុជា។
លោក ជា ប៉េងឈាង រដ្ឋលេខាធិការ ក្រសួងសេដ្ឋកិច្ចនិងហិរញ្ញវត្ថុ បានថ្លែងថា ៖ «ប្រាក់ចំណូលពីពន្ធកាស៊ីណូមិនច្រើនទេ។ គ្រាន់តែជាមួយផ្នែកនៃថវិការដ្ឋ ហើយប្រាក់ចំណូលទាំងនេះនឹងប្រើប្រាស់សម្រាប់រាល់ការចំណាយទាំង អស់របស់រដ្ឋាភិបាល»។
ពេលវេលាត្រូវបិទទ្វារ
នៅទីក្រុងបាវិត បន្ទប់មួយគឺសម្រាប់អ្នកលេងល្បែងសម្រាកពេលយប់ នៅពេលពួកគេអស់ប្រាក់ពីហោប៉ៅ។
ហាងបញ្ចាំ ២៤ ម៉ោង ទទួលយកម៉ូតូ នាឡិកា និងគ្រឿងអលង្ការពីអ្នកលេងល្បែងចាញ់ ដែលណែនាំដោយឈ្នួញកណ្តាល ដែលមានពាសពេញវង់ល្បែង។ នៅពីក្រោយហាងបញ្ចាំនោះ គេឃើញកាស៊ីណូ វិន ដែលបិទទ្វារ និងងងឹតសូន្យឈឹង។
លោក លីម អៀង នាយសន្តិសុខកាស៊ីណូនៅបាវិត នៃក្រសួងមហាផ្ទៃ បានប្រាប់ ភ្នំពេញ ប៉ុស្តិ៍ កាលពីម្សិលមិញថា បើទោះជាអ្នកលេងល្បែងកម្ពុជាបន្តមកកាស៊ីណូជាញឹកញាប់ ទូទាំងប្រទេសក៏ដោយ ក៏ប៉ុន្តែចំនួននោះបានថយចុះ ចាប់តាំងពីកិច្ចប្រជុំជាមួយម្ចាស់កាស៊ីណូថ្នាក់ជាតិមកម្ល៉េះ។
លោក អៀង បានបន្ថែមថា៖ «ពីមុន មានខ្មែរមកលេងល្បែងច្រើន ប៉ុន្តែឥឡូវនេះមានតែពីរបីនាក់ប៉ុណ្ណោះដែលហ៊ានមកលេង។ កាស៊ីណូទាំងអស់ជិតបិទទ្វារហើយព្រោះគ្មានខ្មែរលេង»។
អ្នក ចែកបៀរនៅកាស៊ីណូមួយនៅបាវិតប្រាប់យ៉ាងខ្លីថា ៖ «ច្បាប់មិនអនុញ្ញាតឲ្យជនកម្ពុជាលេងល្បែងនៅកាស៊ីណូទេ តែគេនៅតែមកលេង»៕ TK
No comments:
Post a Comment
yes