ប្រសិនជាចង់ក្លាយខ្លួនជា មនុស្សម្នាក់ ដែលមានវោហាសព្ទល្អគួរអនុវត្តតាម លក្ខណៈសម្បត្តិទាំង១១ ដូចខាងក្រោមនេះ៖
១. មុននឹងនិយាយ ត្រូវតែគិតអោយបានល្អិតល្អន់ជាមុនសិនថា តើពាក្យសំដីនេះនឹងផ្តល់លទ្ធផលយ៉ាងណា?
២. មិនគួរនិយាយអាក្រក់ពីអ្នកណា ដោយសារតែការច្រណែននិន្ទា មិននិយាយផ្លែផ្កា មិនត្រូវទំលាក់កំហុសទៅលើអ្នកដទៃទេ ដែលវាជាការបង្ហាញនូវការខ្វះសីលធម៌ និងបង្ហាញពីទឹកចិត្តមិនល្អ របស់អ្នកនិយាយ។
៣. នៅពេលដែលកំពុងខឹង ឬមិនពេញចិត្តនឹងអ្នកណាម្នាក់ អ្នកគួរតែអត់ធ្មត់ សង្កត់ចិត្តទុកសិន ព្រោះក្នុងពេលខឹងអាចឃើញថា សជាខ្មៅ អាក្រក់ជាល្អ ហើយអាចនឹងបង្កឲ្យមានអំពើហឹង្សាបាន។
ទោះបីជានៅក្នុងការសន្ទនាក្តី ឬក្នុងការជជែកវែកញែកក្នុងអង្គប្រជុំក្តី ករណីនេះ យើងត្រូវតែអត់ធ្មត់ និងពិចារណាអោយបានល្អិតល្អន់ជាទីបំផុត។
៤. មិនត្រូវនិយាយចំអកទេ ទោះបីជានិយាយលេងក៏ដោយ ព្រោះនឹងធ្វើអោយអ្នកស្តាប់អាក់អន់ចិត្ត។
៥. បើទោះបីជាមានការយល់ឃើញខុសគ្នាក៏ដោយ យើងក៏មិនគួរ ប្រឆាំងជំទាស់ដែរ ប៉ុន្តែគួររកវិធីនិយាយអោយបានសុភាព ដោយបញ្ចេញការយល់ឃើញរបស់ខ្លួន។ ទង្វើដូចនេះក៏ជាការបង្ហាញអោយគេឃើញថា យើងមានការយល់ឃើញខុសពីគេបានដែរ។
៦. ត្រូវប្រើប្រាស់ពាក្យពេចន៍ឲ្យសមរម្យ ចំពោះអ្នកស្តាប់ជូចជានិយាយជាមួយចាស់ទុំ អ្នកដឹកនាំ លោកគ្រូអ្នកគ្រូ ឬអ្នកដែលមានឋាន:ខ្ពស់ជាង។ មិនត្រូវនិយាយអួតខ្លួន អួតចំណេះដឹង ឬគំរាមអ្នកដទៃជាដាច់ខាត។
៧. បើនៅក្នុងការសន្ទនា ត្រូវចេះធ្វើជាអ្នកស្តាប់ខ្លះ បើនៅក្នុងអង្គប្រជុំ ត្រូវតែចេះគោរពពេលវេលាឲ្យបានទៀងទាត់។ ត្រូវចេះស្តាប់យោបល់របស់អ្នកដទៃឲ្យបានច្រើន នឹងមិនត្រូវគិតថាគំនិតរបស់ខ្លួនត្រូវទាំងអស់នោះទេ។
៨.មិនត្រូវនិយាយរឿងផ្ទាល់ខ្លួនលើកលែងតែមានអ្នកសួរ។ គួរនិយាយតែរឿងដែលអ្នកស្តាប់ពេញចិត្ត។
៩. មិនប្រើអារម្មណ៍ឆេវឆាវក្នុងការនិយាយ ហើយគួរនិយាយដោយមានហេតុផល និសតិបញ្ញាផង។
១០. បើចង់និយាយនៅពេលដែលអ្នកដទៃ គេនិយាយមិនទាន់ចប់ ត្រូវសុំអភ័យទោសជាមុនសិន ប៉ុន្តែតាមគោលការណ៍ គួរតែរង់ចាំអោយគេនិយាយចប់សិនទើបល្អ។
១១. បើសិនយកសំដីរបស់អ្នកដទៃមកនិយាយ ត្រូវតែប្រាប់ឈ្មោះផង ព្រោះវាជាការសំដែងនូវសេចក្តីគោរព។ នៅពេលនិយាយត្រូវមានទឹកមុខញញឹមញញែម កាយវិការសុភាពរាបសារ និងតែងខ្លួនឲ្យបានសមរម្យ។
ប្រសិនបើប្រិយមិត្តទាំងអស់ ចង់ឲ្យខ្លួននិយាយទៅហើយមានអ្នកស្តាប់ ហើយគេចូលចិត្តគ្រប់គ្នានោះ គឺអ្នកគ្រាន់តែ អនុវត្តទៅតាម ចំណុចដែលយើងបានរៀបរាប់ខាងលើ នោះយើង នឹងជឿជាក់ថា គ្រប់ពេលដែលអ្នកនិយាយប្រាកដជា ធ្វើឲ្យអ្នកស្តាប់មានការចូល ចិត្តច្រើន ជាងមុនជាមិនខាន៕
No comments:
Post a Comment
yes