សកម្មជនគណបក្សប្រឆាំងម្នាក់ រស់នៅភូមិទួលស្វាយ ឃុំមុខរាហុ៍ ស្រុករុក្ខគិរី ខេត្តបាត់ដំបង កំពុងមានការព្រួយបារម្ភពីសុវត្ថិភាពផ្ទាល់ខ្លួន ក្រោយពីរូបគាត់ទទួលរងការគំរាមសម្លាប់ពីសំណាក់មេភូមិមកពីគណបក្សប្រជាជនកម្ពុជា។
លោក អ៊ុង រឹម បានថ្លែងនៅថ្ងៃទី២០ ខែកញ្ញា ថា កាលពីថ្ងៃទី៩ ខែកញ្ញា កន្លងទៅ លោក ម៉ន ជ្រឿន ជាមេភូមិទួលស្វាយ បានជួបជជែកជាមួយរូបលោក នៅផ្ទះមួយនៅក្នុងភូមិជាមួយគ្នា។ លោកមេភូមិ បានព្យាយាមអូសទាញគាត់ឲ្យចុះចូល និងគាំទ្រគណបក្សប្រជាជនកម្ពុជា ប៉ុន្តែ លោកបដិសេធមិនព្រម ក៏ធ្វើឲ្យគាត់មានការខឹងយ៉ាងខ្លាំង ហើយបានប្រើពាក្យសម្ដីមិនសមរម្យ គំរាមសម្លាប់ថែមទៀត។
លោក អ៊ុង រឹម បន្តថា ក្រោយពីមានការគំរាមពីលោកមេភូមិ នៅពេលយប់ មានជនមិនស្គាល់មុខ បានយកដុំថ្មចំនួនបីដុំ គប់ទៅលើដំបូលផ្ទះរបស់គាត់ថែមទៀត។ ករណីនេះ ធ្វើឲ្យគាត់មានការព្រួយបារម្ភកាន់តែខ្លាំង។ លោកបានប្ដឹងទៅអាជ្ញាធរឃុំមុខរាហុ៍ ដែរ ប៉ុន្តែរហូតមកទល់ពេលនេះ នៅពុំមានការដោះស្រាយនោះឡើយ។
វិទ្យុអាស៊ីសេរី នៅពុំទាន់អាចទាក់ទងលោក ម៉ន ជ្រឿន ជាមេភូមិទួលស្វាយ ដើម្បីសុំប្រតិកម្មជុំវិញការចោទរបស់សកម្មជនគណបក្ស សម រង្ស៊ី នេះបាននោះទេ។
ប៉ុន្តែ លោក អ៊ូច សម្បត្តិ មេឃុំមុខរាហុ៍ បានថ្លែងថា អាជ្ញាធរឃុំបានទទួលបណ្ដឹងផ្ទាល់មាត់ពីលោក អ៊ុង រឹម ជាសកម្មជនរបស់គណបក្ស សម រង្ស៊ី។ លោកបន្តថា ដោយសារតែលោកជាប់រវល់ពីរឿងចុះឈ្មោះអ្នកបោះឆ្នោត នៅពុំទាន់លើកយកសំណុំរឿងនេះ មកធ្វើការសម្របសម្រួលគ្នានោះទេ។
ទោះជាយ៉ាងនេះក្តី លោក អ៊ុង រឹម បានថ្លែងថា លោកបានរត់ទៅប្ដឹងអាជ្ញាធរឃុំ តាំងពីថ្ងៃទី១០ ខែកញ្ញា មកម្ល៉េះ ហើយស្មៀនឃុំក៏បានសួរនាំ ធ្វើកំណត់ហេតុរួចហើយដែរ ប៉ុន្តែពួកគេមានបំណងចង់គេចវេសពីការដោះស្រាយ ដោយសារតែមេភូមិឈ្មោះ ម៉ន ជ្រឿន ជាមេភូមិរបស់គណបក្សប្រជាជនកម្ពុជា។
ជំទប់ទី២ ឃុំមុខរាហុ៍ មកពីគណបក្ស សម រង្ស៊ី លោក ធឿន ធីម បានថ្លែងថា ករណីខាងលើនេះ ធ្វើឲ្យសកម្មជនគណបក្ស សម រង្ស៊ី មានការព្រួយបារម្ភពីសុវត្ថិភាពក្នុងការរស់នៅ។ នៅក្នុងកិច្ចប្រជុំក្រុមប្រឹក្សាឃុំកន្លងទៅថ្មីនេះ លោកបានលើកយកករណីរបស់លោក អ៊ុង រឹម ទៅជជែកក្នុងកិច្ចប្រជុំនោះដែរ ប៉ុន្តែ លោកមេឃុំពុំបានចាប់អារម្មណ៍ក្នុងការដោះស្រាយនោះទេ។
ទោះយ៉ាងនេះ លោក សែម ពិរោះ ជាសមាជិកក្រុមប្រឹក្សាស្រុករុក្ខគិរី និងជាប្រធានក្រុមការងារគណបក្ស សម រង្ស៊ី ប្រចាំស្រុកផងនោះ បានថ្លែងថា ក្នុងនាមរូបលោកជាមន្ត្រីរបស់គណបក្ស សម រង្ស៊ី និងជាតំណាងឲ្យប្រជាពលរដ្ឋ លោកពុំពេញចិត្តចំពោះទង្វើរបស់លោកមេភូមិ ដែលបានយកតួនាទីរបស់ខ្លួនជាអាជ្ញាធរបម្រើផលប្រយោជន៍រួមឲ្យប្រជាពលរដ្ឋ បែរទៅជាប្រើពាក្យសម្ដីប្រមាថសម្លាប់ដូច្នេះឡើយ។
មន្ត្រីគណបក្ស សម រង្ស៊ី អះអាងថា បើសិនករណីនេះ អាជ្ញាធរឃុំពុំបានធ្វើការសម្របសម្រួលធ្វើឲ្យពួកគេពេញចិត្ត និងអាចទទួលយកបានទេ គណបក្ស សម រង្ស៊ី នឹងបន្តប្ដឹងទៅថ្នាក់ស្រុក ថ្នាក់ខេត្ត ទៀត ដើម្បីទាមទាររកយុត្តិធម៌ ចំពោះសកម្មជនគណបក្ស សម រង្ស៊ី ឈ្មោះ អ៊ុង រឹម ដែលត្រូវលោកមេភូមិគំរាមសម្លាប់ ដោយសារហេតុផលនយោបាយអូសទាញគាត់ឲ្យទៅចុះចូលជាមួយគណបក្សប្រជាជនកម្ពុជា ពុំបានសម្រេច៕
No comments:
Post a Comment
yes