កណ្ដាល ៖ ករណីដែលគ្រូពេទ្យបម្រើការងារនៅមន្ទីរសម្រាកព្យាបាលនិង សម្ភពក្រុងតាខ្មៅបានចាក់ថ្នាំចំនួន៣ម្ជុល បណ្តលឲ្យបុរសម្នាក់ឈ្មោះ ទឹម រីន អាយុ៥១ឆ្នាំ ជាជនជាតិខ្មែរអ៊ិំស្លាមដែលមានអាការៈឈឺចុកពោះ ស្លាប់បាត់បង់ជីវិតយ៉ាងអាណោចអធម្ម មានកាសម្របសម្រួលជាមួយគ្រួសារជនរងគ្រោះ ផ្តល់ជាសំណងចំនួន ១៥០០ ដុល្លារអាមេរិកដើម្បីបញ្ចប់រឿង ប៉ុន្តែមិនមានការឯកភាពគ្នាទើបមានពាក្យបណ្តឹងដាក់ចូលអធិការដ្ឋាននគរបាល ក្រុងតាខ្មៅដោយ ប្ដឹងចោទប្រកាន់គ្រូពេទ្យពីបទមនុស្សឃាតដោយអចេតនា ហើយករណីនេះសមត្ថកិច្ចប៉ូលិសបានព្រមានថា នឹងកសាងសំណុំរឿងបញ្ជូនទៅកាន់តុលាការដើម្បីចាត់ការបន្តតាម ផ្លូវច្បាប់។
យោងតាមពាក្យបណ្ដឹងរបស់ស្ដ្រី ឈ្មោះសឹម សារីហ្វាស់ អាយុ៤៩ឆ្នាំ ដែល ត្រូវជាប្រពន្ធរបស់បុរសរងគ្រោះបាន រៀបរាប់ថា រូបគាត់និងប្ដីព្រមទាំងប្អូន ស្រីជីដូនមួយបាននាំគ្នាមកពីស្រុកពញាឮ ខេត្ដកណ្ដាល មកកាន់ក្រុងតាខ្មៅអស់ រយៈពេល១០ថ្ងៃមកហើយដើម្បីមកលក់ ខោអាវនៅក្នុងផ្សារតាខ្មៅ ដោយបាន ជួលបន្ទប់ផ្ទះសំណាក់ឡុងសៀង ក្រុងតាខ្មៅស្នាក់នៅ ។ រហូតមកដល់វេលា ម៉ោង១១យប់ ថ្ងៃទី១៧ ខែកញ្ញា ឆ្នាំ ២០១២ ប្ដីរបស់គាត់ស្រាប់តែមាន អាការចុកដើមទ្រូងទើបគាត់និងប្អូនស្រីជីដូនមួយឈ្មោះ ស្លេស ស៊ីម៉ាស់ អាយុ៣១ឆ្នាំ បាននាំប្ដីរបស់គាត់មកព្យាបាលនៅមន្ទីរសម្រាក ព្យាបាល និងសម្ភពក្រុងតាខ្មៅ ដើម្បីឱ្យ ក្រុមគ្រូពេទ្យពិនិត្យអាការរោគ ។
ភ្លាម នោះគ្រូពេទ្យម្នាក់បានវាស់ឈាម ហើយ បានដាក់សេរ៉ូមមួយប្លោកនិងចាក់ថ្នាំ ចំនួន៣ម្ជុល រួចគ្រូពេទ្យបានបូមឈាម យកទៅពិនិត្យ ដោយបញ្ជាក់ថា ប្ដីរបស់ខ្លួនមានជំងឺរលាក លំពែង។
រហូតដល់វេលាម៉ោង៣ រំលងអធ្រាត្រឈានដូលថ្ងៃទី១៨ ខែកញ្ញា ប្ដីរបស់គាត់បានធូរស្រាលពី អាការ ខណៈនោះគ្រូពេទ្យបានប្រាប់គាត់ថា ប្ដីរបស់គាត់លែងកើតអីហើយ បន្ទាប់មកគ្រូពេទ្យក៏បានបើកថ្នាំគ្រាប់ ទុកសម្រាប់លេបបន្ដ និងបានអនុញ្ញាត ឱ្យត្រឡប់ទៅផ្ទះវិញបន្ទាប់ពីបង់ប្រាក់ អស់ចំនួន១៨៨.០០០រៀលថ្លៃព្យាបាល ហើយពេលដែលរូបគាត់ និងប្អូនជីដូនមួយនាំ ប្ដីទៅដល់ផ្ទះសំណាក់វិញបានប្រមាណ ១០នាទី ប្ដីរបស់គាត់មានអាការចុក ដើមទ្រូងឡើងវិញ ហើយគាត់ក៏បាននាំ ប្ដីមកកាន់មន្ទីរសម្រាកព្យាបាលខាងលើម្ដងទៀត ។ ពេលទៅដល់ភ្លាមគ្រូពេទ្យក៏ បានចាក់ថ្នាំឱ្យប្ដីរបស់គាត់ចំនួនមួយ ម្ជុលបន្ថែមទៀត ស្រាប់តែប្រមាណ ៥នាទីក្រោយមកប្ដីរបស់គាត់បានប្រកាច់ បែកពពុះមាត់នៅលើគ្រែលែងដឹងខ្លួន តែម្ដង។
ខណៈដែលប្ដីរបស់គាត់លែងដឹងខ្លួន គ្រូពេទ្យបានដឹកប្ដីរបស់គាត់ទៅ មន្ទីរពេទ្យជ័យជំនះដោយបានប្រាប់គាត់ថា យកទៅធ្វើការសង្គ្រោះនៅទីនោះវិញ ខណៈដែលដឹកទៅដល់មន្ទីរពេទ្យជ័យជំនះ គ្រូពេទ្យប្រចាំការនៅទីនោះបានពិនិត្យថា ប្ដីរបស់គាត់បានដាច់ខ្យល់ស្លាប់នៅមុន មកដល់មន្ទីរពេទ្យទៅហើយ ។ លុះដល់ ព្រឹកថ្ងៃទី១៨ គាត់បានមកដាក់ពាក្យ បណ្ដឹងនៅអធិការដ្ឋាននគរបាលក្រុង តាខ្មៅដើម្បីឱ្យជួយអន្ដរាគមន៍ និងបានជួលរថយន្ដសាមុយដឹកសពប្ដី របស់គាត់យកទៅធ្វើបុណ្យតាមប្រពៃណី នៅឯស្រុកពញាឮវិញ ។ អ្នកច្បាប់និយាយថា បើគ្រូពេទ្យចាក់ថ្នាំធ្វើឱ្យអ្នកជំងឺស្លាប់ដោយសារតែការ ធ្វេសប្រហែស ឬខ្វះជំនាញនោះ គ្រូពេទ្យ នឹងប្រឈមការជាប់ចោទពីបទមនុស្ស ឃាតដោយអចេតនា ដូចមានចែងក្នុងមាត្រា២០៧ នៃក្រមព្រហ្មទណ្ឌថ្មី។
សាច់ញាតិជនរងគ្រោះ បានអះអាងកាលពីរសៀលថ្ងៃទី១៩ ខែកញ្ញា ឆ្នាំ២០១២ វេជ្ជបណ្ឌិតម្នាក់ឈ្មោះ កែវ ធាញ ភេទ ប្រុស អាយុ៤២ឆ្នាំ រស់នៅសង្កាត់បឹង កេងកង១ ខណ្ឌចំការមន រាជធានីភ្នំពេញ ជាវេជ្ជបណ្ឌិតប្រចាំការនៅក្នុងមន្ទីរ សម្រាកព្យាបាល និងសម្ភពក្រុងតាខ្មៅ បានទំនាក់ទំនងជាមួយប្រពន្ធជនរងគ្រោះ ដើម្បីសុំចរចាសងសំណងចំនួន១៥០០ ដុល្លារដើម្បីសុំឱ្យប្រពន្ធជនរងគ្រោះដកពាក្យបណ្ដឹងវិញ ។ យ៉ាងណាក៏ដោយ នេះជាលើកទីពីរហើយដែលគ្រូពេទ្យនៅក្នុងមន្ទីរ សម្រាកព្យាបាល និងសម្ភពក្រុងតាខ្មៅបានធ្វេសប្រហែសបណ្តាលឲ្យមនុស្សស្លាប់ ហើយបើគេចាំមិនភ្លេចទេ នោះកាលពីប៉ុន្មានខែមុនក៏មានករណីស្លាប់ស្ត្រីម្នាក់ផងដែរ ប៉ុន្តែមានការសម្របសម្រួលគ្នា មិនដាក់ពាក្យបណ្តឹងនោះទេ៕
No comments:
Post a Comment
yes