ក្មេងស្រីកំពុងជិះកង់លេងនៅលើផ្លូវបេតុងព្រលានយន្តហោះខេត្តកំពង់ឆ្នាំ។
ព្រលានយន្តហោះនេះនឹងក្លាយជាអាកាសយាដ្ឋានអន្តរជាតិថ្មី
ភ្នំពេញៈនាយករដ្ឋមន្ត្រីហ៊ុន សែន បានប្រកាសថាព្រលានយន្តហោះខេត្តកំពង់ឆ្នាំងនឹងក្លាយជាអាកាសយានដ្ឋានអន្តរជាតិ នាពេលអនាគតដ៏ខ្លីខាងមុខនេះ។
ក្នុងហេតុផលនេះលោកនាយករដ្ឋមន្ត្រីបានប្រកាសបដិសេធផ្តល់កម្មសិទ្ធិដីធ្លីលើផ្ទៃដី៧៦៨ហិកតាដែលប្រជាពលរដ្ឋកំពុងកាន់កាប់និងទទួលផលពីរបរកសិកម្ម។
តាមលោក ហ៊ុន សែន អាកាសយានដ្ឋានខេត្តកំពង់ឆ្នាំងនឹងក្លាយជាអាកាសយានដ្ឋានអន្តរជាតិបន្ទាប់ពីឆ្នាំ២០២៥។
លោកនាយករដ្ឋមន្ត្រីបានថ្លែងក្នុងពិធីចែកប័ណ្ណកម្មសិទ្ធិដីធ្លីដល់ប្រជាជនក្នុងខេត្តកំពង់ឆ្នាំងកាលពីថ្ងៃទី២៧ខែតុលាថា៖ «ខ្ញុំសូមជម្រាបថាចក្ខុវិស័យនៃអាកាសយានដ្ឋានអន្តរជាតិដែលនឹងត្រូវធ្វើដែលខ្ញុំនិយាយមិនបញ្ចេញឈ្មោះ[ទីកន្លែង] គឺកំពង់ឆ្នាំងនេះឯង»។
កាលពេលថ្មីៗនេះលោកនាយករដ្ឋមន្ត្រីបានបង្ហើបឲ្យដឹងពីការសាងសង់អាកាសយានដ្ឋានអន្តរជាតិថ្មីមួយទៀតដែលមានទំហំធំជាងអាកាសយានដ្ឋានអន្តរជាតិភ្នំពេញបច្ចុប្បន្នប៉ុន្តែខណៈពេលនោះលោកមិនបានប្រាប់ទីកន្លែងទេដោយអះអាងថាខ្លាចក្រែងមានការផ្អើលទៅទិញដីនៅតំបន់នោះ។
លោកបានបន្តថាព្រលានយន្តហោះសព្វថ្ងៃមិនមានសមត្ថភាពទ្រទ្រង់អ្នកដំណើររហូតទៅដល់ពី៧លានទៅ៨លាននាក់ក្នុងមួយឆ្នាំបានទេ។
លោកនាយករដ្ឋមន្ត្រីបានលើកឡើងកាលពីថ្ងៃសៅរ៍ថា៖ «យើងមិនអាចប្រើប្រាស់ពោធិ៍ចិនតុងនៅក្រោយឆ្នាំ២០៣០បានទៀតទេ។ ២០២៥ឬ២០៣០អាចថាមកធ្វើនៅទីនេះហើយដែលភ្ជាប់ទំនាក់ទំនងក្រុងភ្នំពេញក្នុងតែប្រមាណ៩០គីឡូម៉ែត្រ»។
ផ្ទៃដីអាកាសយានដ្ឋានខេត្តកំពង់ឆ្នាំងមាន១៤៦៣ហិកតាប៉ុន្តែប្រជាជនកំពុងកាន់កាប់៧៦៨ហិកតា។ អាកាសយានដ្ឋានអន្តរជាតិភ្នំពេញមានទំហំតែ៤៥០ហិកតាប៉ុណ្ណោះ។លោកហ៊ុនសែនបន្ថែមថាព្រលានយន្តហោះខេត្តកំពង់ឆ្នាំងនឹងក្លាយជាព្រលានយន្តហោះអន្តរជាតិថ្មីនៅពេលក្រោយ។
ជាមួយគ្នាដែរលោកបានអំពាវនាវមិនឲ្យប្រជាជនដែលកំពុងរស់នៅលើផ្ទៃដីអាកាសយានដ្ឋានខេត្តកំពង់ឆ្នាំងសាងសង់សំណង់រឹងនិងពង្រីកផ្ទៃដីកាន់កាប់បានទេតែគេមានសិទ្ធិអាស្រ័យផលពីផ្ទៃដីនោះរហូតដល់រដ្ឋត្រូវការ។
មន្ត្រីក្រសួងទេសចរណ៍ធ្លាប់បានព្យាករថាទេសចរអន្តរជាតិមកកាន់កម្ពុជានឹងមានកំណើនដល់៤,៥លាននាក់នៅឆ្នាំ២០១៥ហើយកំណើននេះនឹងកើនរហូតដល់ទៅ៧លាននាក់នៅឆ្នាំ២០២០។
លោកប៊ុនរដ្ឋាប្រធានអាកាសយានដ្ឋានក្រុងភ្នំពេញបាននិយាយថាគេត្រូវការសាងសង់ផ្លូវហាយវ៉េមួយទៀតពីខេត្តកំពង់ឆ្នាំមកភ្នំពេញប្រសិនព្រលានយន្តហោះនោះត្រូវបានសាងសង់ឡើង។លោកបន្តថាប្រទេសម៉ាឡេស៊ីមានអាកាសយាន្តដ្ឋាននៅឆ្ងាយពីក្រុងរហូតដល់ទៅ៧០គីឡូម៉ែត្រតែសម្រាប់អាកាសយានដ្ឋានខេត្តកំពង់ឆ្នាំងវិញនឹងមានចំងាយជិតជាងនេះប្រសិនបើការស្ថាបនាផ្លូវហាយវ៉េថ្មីមួយត្រូវគេធ្វើឡើង។
បច្ចុប្បន្នអាកាសយាន្តដ្ឋានខេត្តកំពង់ឆ្នាំងត្រូវគ្រប់គ្រង់ដោយកងទ័ពអាកាសដែលចុះចតបានតែយន្តហោះតូចៗប៉ុណ្ណោះ។
លោកប៊ុនរដ្ឋាបានថ្លែងថា៖ «ខ្ញុំគិតថាបើរដ្ឋាភិបាលសម្រេចអ៊ីចឹងទៅហើយ វាទៅតាមហ្នឹងតែវាគ្រាន់តែរង់ចំារហូតដល់ត្រូវផ្លាស់ប្តូរ»។
ទោះបីយ៉ាងនេះក្តីលោកអះអាងថារដ្ឋាភិបាលត្រូវត្រៀមលក្ខណៈទុកជាមុន។លោកបន្តថា៖«ចក្ខុវិស័យរបស់រដ្ឋាភិបាលត្រូវតែគិតមុន។យើងមិនត្រូវរង់ចំារហូតដល់ទឹកដល់ច្រមុះទើបប្រវេប្រវានោះទេ»។
លោកអាងគឹមអៀងប្រធានសមាគមទីភ្នាក់ងារទេសចរណ៍កម្ពុជាបាននិយាយថាតាមពិតទីតាំងខេត្តកំពង់ឆ្នាំងជាទីតាំងល្អដែលមានប្រព័ន្ធដឹងជញ្ជូនទាំងបួនគ្រប់គ្រាន់ ដូចជាផ្លូវទឹកផ្លូវគោក ផ្លូវដែកហើយបើមានផ្លូវអាកាសទៀតគឺជារឿងល្អ។លោកបានឯកភាពនឹងការលើកឡើងរបស់លោកប៊ុនរដ្ឋា ដែលថា គេគួរស្ថាបនាផ្លូវហាយវ៉េមួយថ្មីឬក៏ពង្រីកផ្លូវដែលមាននាពេលសព្វថ្ងៃដើម្បីបម្រើតែព្រលានយន្តហោះមួយប៉ុណ្ណោះ។លោកបន្តថា៖ «បើគេប្តូរទៅទីនោះហើយប្រើប្រាស់ផ្លូវសព្វថ្ងៃការធ្វើដំណើរនឹងត្រូវប្រើពេលយូរ»៕
No comments:
Post a Comment
yes