លោក ម៉ឹក ដារ៉ា ក្នុងពេលនាំឡើងសវនាការ នៅសាលាឧទ្ធរណ៍
ភ្នំពេញៈ ក្នុងសវនាការកាលពីម្សិលមិញលោក ម៉ឹក ដារ៉ា និង ជា ឡេង បានស្នើឲ្យសាលាឧទ្ធរណ៍លើកលែងការចោទប្រកាន់និងដោះលែងពួកគាត់ ហើយទាមទារក្នុងសេចក្តីសន្និដ្ឋានរបស់ខ្លួននោះ ឲ្យតុលាការផ្តន្ទាទោសព្រះរាជអាជ្ញា ចៅក្រមស៊ើបសួរ និងអ្នកសូកប៉ាន់ ដែលពាក់ព័ន្ធនឹងសំណុំរឿងពួកគាត់ផង បើសិនតុលាការនៅចោទប្រកាន់និងផ្តន្ទាទោសពួកគាត់នោះ។
សាលាឧទ្ធរណ៍កាលពីម្សិលមិញបន្តធ្វើការសន្និដ្ឋាន លើសវនាការឧទ្ធរណ៍របស់ ម៉ឹក ដារ៉ា និង ជា ឡេង សម្រាប់អង្គហេតុទី៧, ៨, ៩, និងទី១១រហូតដល់១៧។ ក្នុងអង្គហេតុទាំង១០នេះ ម៉ឹក ដារ៉ា និងជា ឡេង ត្រូវចោទពីបទកែសំណុំរឿងរបស់ឧក្រិដ្ឋជនគ្រឿងញៀន ការដោះលែងពួកគេជាថ្នូរនឹងសំណូក ការបំផ្លាញភស្តុតាងថ្នាំញៀន និងការរក្សាទុកថ្នាំញៀន ដែលរឹបអូសបានសម្រាប់ការប្រើប្រាស់ផ្ទាល់ខ្លួន។
លោក ម៉ឹក ដារ៉ា ថ្លែងថា គាត់មិនបានប្រព្រឹត្តដូចការចោទប្រកាន់ទេ។ គាត់ថា ការចោទប្រកាន់គាត់នេះគឺគ្រាន់តែជាល្បិចរបស់ឧក្រិដ្ឋជន គ្រឿងញៀន ឬអ្នកទាំងឡាយដែលមិនពេញចិត្តនឹងគាត់ ហើយគេបានរៀបចំនិងទម្លាក់ការចោទមកលើគាត់។
គាត់ប្រាប់ ចៅក្រមនៅសាលាឧទ្ធរណ៍ថា៖ «ខ្ញុំបានពិចារណាថា រាល់ការចោទប្រកាន់មកលើខ្ញុំ គឺគ្រាន់តែជាការប្រមូលសំរាមដុតជាភ្នក់ភ្លើងដែលតាមពិត មានអ្នកពាក់ព័ន្ធច្រើនទៀត»។ គាត់បន្តថា៖ «តុលាការចោទប្រកាន់ខ្ញុំថា បានកែរបាយការណ៍ ឬចុះហត្ថលេខាសំណុំរឿងក្លែងក្លាយ ឬដោះលែងឧក្រិដ្ឋជន ប៉ុន្តែ ខ្ញុំគិតថា ព្រះរាជអាជ្ញា និងចៅក្រមស៊ើបសួរ ដែលពាក់ព័ន្ធនឹងសំណុំរឿងទាំងនោះរបស់ខ្ញុំ ក៏ត្រូវតែចោទប្រកាន់ និងផ្តន្ទាទោសដែរ ព្រោះពួកគេក៏ចុះហត្ថលេខាលើការដោះលែងនោះដែរ»។
គាត់និយាយថា៖ «តុលាការគួរតែចោទប្រកាន់ឬចាប់ខ្លួន អ្នកដែលសូកខ្ញុំ ឬអ្នកដែលទទួលសំណូកជាថ្នូរនឹងការមិនកាត់ទោស ទៅតាមច្បាប់ប្រឆាំងអំពើពុករលួយ»។ គាត់បន្តថា៖ «បេះដូងនិងបំណងខ្ញុំគឺកម្ចាត់ការជួញដូរគ្រឿងញៀន និងឧក្រិដ្ឋជន។ ខ្ញុំសូមសាលាឧទ្ធរណ៍លើកលែងបទចោទប្រកាន់ទាំងអស់មកលើរូប ខ្ញុំ ហើយដោះលែងខ្ញុំ»។
លោក ជា ឡេង ក៏បដិសេធរាល់ការចោទប្រកាន់ទាំងអស់ហើយថា បទចោទទាំងនោះត្រូវគេរៀបចំនិងបំផ្លើសដោយក្រុមឧក្រិដ្ឋជន គ្រឿងញៀនដែលគាត់បានបង្ក្រាបនិងចាប់ខ្លួនកន្លងមក ដោយពួកគេខឹងនឹងគាត់ ទើបគេរៀបចំសំណុំរឿងនេះឡើង និងទម្លាក់កំហុសមកលើរូបគាត់។
គាត់ថា សាក្សី គឺមន្រ្តីនគរបាលប្រឆាំងគ្រឿងញៀន និងឧក្រិដ្ឋជន ដែលគាត់ចាប់ខ្លួនកាលពីមុន ហើយឥឡូវពួកគេកំពុងជាប់ពន្ធនាគារ។ ពួកគេត្រូវបង្ខំឲ្យឆ្លើយទម្លាក់លើគាត់ ដើម្បីបន្ថយទោសខ្លួននៅពន្ធនាគារ។ គាត់បន្តថា៖ «ការចោទប្រកាន់ទាំងនេះ គឺជាការមួលបង្កាច់ទាំងស្រុងមកលើរូបខ្ញុំ។ ខ្ញុំសុំបដិសេធទាំងស្រុង នូវការចោទប្រកាន់ទាំងនេះ ខ្ញុំសូមតុលាការលើកលែងបទចោទប្រកាន់មកលើរូបខ្ញុំ និងដោះលែងរូបខ្ញុំឲ្យមានសេរីភាព»។
ទាំងមេធាវីការពារ ក្តីឲ្យ ម៉ឹក ដារ៉ា និង ជា ឡេង សន្និដ្ឋានថា មានភស្តុតាងពិតប្រាកដបង្ហាញថា ម៉ឹក ដារ៉ា និង ជា ឡេង មិនបានទទួលសំណូក និងប្រព្រឹត្តអំពើពុករលួយ ដូចការចោទប្រកាន់ទេ។ ពួកគេក៏ស្នើឲ្យសាលាឧទ្ធរណ៍បដិសេធសេចក្តីសម្រេចរបស់ សាលាដំបូងខេត្តបន្ទាយមានជ័យ ផងដែរ។
លោក ចាយ ច័ន្ទតារាវណ្ណ ប្រធានចៅក្រមប្រឹក្សាជំនុំជម្រះ បានប្រកាសថា ការសន្និដ្ឋានសវនាការឧទ្ធរណ៍របស់ពួកគេនឹងបន្តនៅថ្ងៃទី៥ ខែតុលា។
លោក ម៉ឹក ដារ៉ា និង ជា ឡេង ត្រូវចាប់ខ្លួនកាលពីឆ្នាំ២០១១ ហើយពួកគេត្រូវចោទប្រកាន់ពីបទស៊ីសំណូក និងការដឹកនាំក្រុមឧក្រិដ្ឋជនគ្រឿងញៀន តាំងពីឆ្នាំ២០០៧ ដល់ឆ្នាំ២០១១ នៅក្នុងកម្ពុជា៕
No comments:
Post a Comment
yes