លោក មឹុក ដារ៉ា អតីតប្រធានមន្ទីរប្រឆាំងគ្រឿងញៀ
ភ្នំពេញៈ ក្នុងសវនាការឧទ្ធរណ៍បន្តកាលពីថ្ងៃចន្ទ លោក ម៉ឹក ដារ៉ា អតីតប្រធានមន្ទីរប្រឆាំងគ្រឿងញៀនលើកឡើងក្នុងការសន្និដ្ឋាន ថានឹងតស៊ូស្វែងរកយុត្តិធម៌រហូតដល់ជីវិតចុងក្រោយហើយបើនៅតែមិនបានសម្រេចទេ លោក នឹងធ្វើអត្តឃាតក្នុងពន្ធនាគារដើម្បីបញ្ជាក់ពីភាពស្អាតស្អំ ក្នុងអង្គហេតុចោទប្រកាន់ជាមួយនឹង ជា ឡេង អតីតប្រធានការិយាល័យប្រឆាំងគ្រឿងញៀន ពីបទស៊ីសំណូក កែសំណុំរឿងនិងការដឹកនាំក្រុមឧក្រិដ្ឋជនគ្រឿងញៀន កាលពីឆ្នាំ២០០៧ ដល់ដើមឆ្នាំ ២០១១។
ក្នុងអំឡុងការធ្វើការ សន្និដ្ឋានអង្គហេតុកាលពីម្សិលមិញ លោក ម៉ឹក ដារ៉ា អតីតទីប្រឹក្សាប្រធានព្រឹទ្ធសភាលោក ជា ស៊ីម និងជាអគ្គលេខាធិការអាជ្ញាធរជាតិប្រឆាំងគ្រឿងញៀនលើកឡើងថា ការចោទប្រកាន់គាត់គឺជាល្បិចរបស់ឧក្រិដ្ឋជនគ្រឿងញៀន ដែលធ្វើឡើងក្នុងបំណងចោទប្រកាន់និងបំផ្លាញរូបគាត់ពីការងារប្រឆាំងគ្រឿងញៀន។
លោកបន្តថា ដើម្បីស្វែងរកភាពយុត្តិធម៌ក្នុងករណីនេះ គាត់នឹងតស៊ូនិងបន្តតស៊ូតាមប្រព័ន្ធតុលាការរហូតដល់ចុង បញ្ចប់នៃជីវិតរបស់គាត់។
គាត់ថ្លែងក្នុងតុលាការឧទ្ធរណ៍ថា៖ «ខ្ញុំមានការឈឺចាប់ណាស់ក្នុងជីវិតរបស់ខ្ញុំ ដោយសារខ្ញុំចាញ់ល្បិចពួកឧក្រិដ្ឋជនគ្រឿងញៀន។ ខ្ញុំជាអ្នកបង្ក្រាបគ្រឿងញៀន ដូចតុលាការនិងព្រះរាជអាជ្ញាដែរ ប៉ុន្តែ ផ្ទុយទៅវិញនៅទីបំផុត ខ្ញុំត្រូវតុលាការខេត្តបន្ទាយមានជ័យចោទប្រកាន់ ចាប់ខ្លួន និងដាក់ពន្ធនាគារអស់មួយជីវិត រីឯឧក្រិដ្ឋជនគ្រឿងញៀនត្រូវបានកាត់ទោសឲ្យជាប់ពន្ធនាគារ តែពីរឆ្នាំតែប៉ុណ្ណោះ»។
គាត់អះអាងថា៖ «ដើម្បីស្វែងរកការពិតនិងយុត្តិធម៌សម្រាប់រូបខ្ញុំផ្ទាល់ ខ្ញុំនឹងតស៊ូនិងបន្តតស៊ូរហូតដល់ជីវិតចុងក្រោយ។ បើខ្ញុំបរាជ័យក្នុងការទទួលបានយុត្តិធម៌ និងការពិត ខ្ញុំនឹងធ្វើអត្តឃាតនៅក្នុងពន្ធនាគារ»។
ម៉ឹក ដារ៉ា លើកមកបង្ហាញថា ឧក្រិដ្ឋជនគ្រឿងញៀនម្នាក់ដែលបានចោទប្រកាន់មកលើរូបគាត់គឺ ឈ្មោះ «ហាក់ អៀង» ដែលត្រូវបានកាត់ទោសឲ្យជាប់ពន្ធនាគារតែ២ឆ្នាំ ដោយតុលាការខេត្តបន្ទាយមានជ័យ ហើយកំពុងជាប់ឃុំក្នុងពន្ធនាគារខេត្ត គាត់នឹងរួចខ្លួនវិញនៅ៦ខែក្រោយ។
លោកបន្តថា៖ «ហាក់ អៀង គឺជាឈ្មួញគ្រឿងញៀន ក្នុងក្រុមឈ្មួញគ្រឿងញៀនល្បីៗក្នុងប្រទេសកម្ពុជា ប៉ុន្តែ គាត់ត្រូវបានកាត់ទោសឲ្យជាប់ពន្ធនាគារតែ២ឆ្នាំ។ ប៉ុន្តែ សម្រាប់ខ្ញុំ ដែលជាអ្នកបង្ក្រាបការជួញដូរគ្រឿងញៀន ឬឧក្រិដ្ឋជនគ្រឿងញៀន ត្រូវបានកាត់ទោសឲ្យជាប់ពន្ធនាគារអស់មួយជីវិត។ វាជាការឈឺចាប់ និងអយុត្តិធម៌ណាស់សម្រាប់ខ្ញុំ»។
លោក បន្ថែមថា ក្នុងពេលចាប់ខ្លួនលោកកាលពីឆ្នាំ ២០១១ គាត់បានសរសេរលិខិតបី ដាច់ពីគ្នាផ្ញើទៅលោក ជា ស៊ីម ប្រធានព្រឹទ្ធសភា លោក ហេង សំរិន ប្រធានសភាជាតិ និងលោក ហ៊ុន សែន នាយករដ្ឋមន្រ្តី និងលិខិតមួយទៀតទៅលោកស ខេង រដ្ឋមន្រ្តីក្រសួងមហាផ្ទៃ ជម្រាបពួកគាត់អំពីភាពគ្មានទោសនិងភាពស្អាតស្អំនៅមុនពេល គាត់ធ្វើអត្តឃាត ប៉ុន្តែឆ្មាំពន្ធនាគារព្រៃសឃាត់គាត់មិនឲ្យធ្វើអត្តឃាត។
គាត់បន្តថា៖ «បេះដូងខ្ញុំគឺបេះដូងបង្ក្រាបឧក្រិដ្ឋជនគ្រឿងញៀនក្នុង ប្រទេស។ ខ្ញុំមិនដែលឃុបឃិតជាមួយឧក្រិដ្ឋជនឬឈ្មួញគ្រឿងញៀន ឬទទួលសំណូកឬប្រព្រឹត្តអំពើពុករលួយណាមួយដូចការចោទប្រកាន់ ទេ»។ ខ្ញុំសុំបដិសេធរាល់ការចោទប្រកាន់ទាំងអស់ ហើយសុំឲ្យតុលាការឧទ្ធរណ៍លើកលែងការចោទប្រកាន់មកលើរូប ខ្ញុំ និងដោះលែងរូបខ្ញុំ។ ខ្ញុំសង្ឃឹមថា តុលាការឧទ្ធរណ៍នឹងផ្តល់យុត្តិធម៌ដល់ខ្ញុំ និងស្វែងរកការពិតក្នុងរឿងខ្ញុំនេះ»។
ជា ឡេង ក៏បានបដិសេធបទចោទប្រកាន់ទាំងអស់លើរូបគាត់ដែរ ហើយសុំឲ្យតុលាការដកការចោទប្រកាន់និងដោះលែង។
គាត់ថា៖ «ខ្ញុំសូមបដិសេធទាំងស្រុងរាល់ការចោទប្រកាន់ទាំងអស់ ពីព្រោះវាគ្រាន់តែជាការរៀបចំដោយក្រុមឧក្រិដ្ឋជនគ្រឿងញៀនឬ អ្នកដែលមិនចូលចិត្តខ្ញុំ និងអ្នកដែលមិនចូលចិត្តការងារល្អរបស់ខ្ញុំ។ ហេតុនេះ ខ្ញុំសូមឲ្យតុលាការឧទ្ធរណ៍ដកការចោទប្រកាន់ និងដោះលែងខ្ញុំ»។
សម្រាប់សវនការនៅសាលាឧទ្ធរណ៍ពួកគេកាលពីម្សិលមិញ មេធាវី ម៉ឹក ដារ៉ា និង ជា ឡេង បានអានការសន្និដ្ឋានដើម្បីការពារកូនក្តីរបស់ខ្លួនសម្រាប់ អង្គហេតុព្រហ្មទណ្ឌទី២ ទី៣ ទី៤ និងទី៦ដោយស្នើឲ្យតុលាការឧទ្ធរណ៍លើកការចោទប្រកាន់លើ ម៉ឹក ដារ៉ា និង ជា ឡេង ហើយដោះលែងពួកគាត់។
លោក ង៉ែត សារ៉ាត់ អគ្គព្រះរាជអាជ្ញារងសាលាឧទ្ធរណ៍ បានសន្និដ្ឋានថា នៅក្នុងអង្គហេតុទី២ ទី៣ ទី៤ និងទី៦ ជនជាប់ចោទទាំងពីររូបនេះ សុទ្ធតែពាក់ព័ន្ធនឹងក្រុមឧក្រិដ្ឋជន ការទទួលសំណូក និងដោះលែងពួកឧក្រិដ្ឋជនជួញដូរគ្រឿងញៀន។
សវនាការរបស់ពួកគេនឹងបន្តនៅព្រឹកថ្ងៃពុធទៀត៕
No comments:
Post a Comment
yes