បន្ទាប់ពីសហរដ្ឋអាមេរិក នៅថ្ងៃនេះប្រទេសបារាំងតាមរយៈអ្នកនាំពាក្យក្រសួងការបរទេសខ្លួន ក៏បានចេញសេចក្តីថ្លែងការណ៍ផងដែរពាក់ព័ន្ធនឹងការកាត់ទោសលោក ម៉ម សូណង់ដូ ដោយតុលាការក្រុងភ្នំពេញនោះ។
លោក Philippe Lalliot អ្នកនាំពាក្យក្រសួងការបរទេសបារាំងបាននិយាយនៅក្នុងសេចក្តីថ្លែងការណ៍ចេញផ្សាយនៅថ្ងៃអង្គារនេះថា ប្រទេសបារាំងសោកស្តាយចំពោះការកាត់ទោសនេះ ហើយអំពាវនាវឲ្យអាជ្ញាធរកម្ពុជាធានាថា នីតិវិធីបណ្តឹងឧទ្ធរណ៍នឹងអនុញ្ញាតឲ្យមានការត្រួតពិនិត្យរឿងក្តីនេះឡើងវិញឆាប់ៗ ប្រកបដោយយុត្តិធម៌ និងសមធម៌។
ស្របគ្នានេះ រដ្ឋាភិបាលប្រទេសបារាំងក៏បានអំពាវនាវផងដែរឲ្យប្រទេសកម្ពុជាគោរពសេរីភាព នៃការបញ្ចេញមតិ និងទស្សនៈស្របតាមកត្តិកាសញ្ញាអន្តរជាតិស្តីពីសិទ្ធិពលរដ្ឋ និងនយោបាយដែលកម្ពុជាជាម្ចាស់ហត្ថលេខីដែរនោះ។
បើតាមអ្នកនាំពាក្យក្រសួងការបរទេសបារាំង លោក ម៉ម សូណង់ដូ មានសញ្ជាតិបារាំង ដូច្នេះលោកបានទទួលការការពារផ្នែកកុងស៊ុលដូចពលរដ្ឋបារាំងដទៃទៀតដែរ។ ហើយថា កុងស៊ុលបារាំងប្រចាំទីក្រុងភ្នំពេញតែងតែទៅសួរសុខទុក្ខលោក ម៉ម សូណង់ដូ យ៉ាងទៀងទាត់ បន្ទាប់ពីលោកត្រូវបានឃុំខ្លួន៕
No comments:
Post a Comment
yes