ភ្នំពេញៈ មន្រ្តីជាន់ខ្ពស់រដ្ឋាភិបាលកម្ពុជាកាលពីថ្ងៃអង្គារកន្លង ទៅបានច្រានចោលរបាយការណ៍តំណាងពិសេសរបស់អង្គការសហប្រជាជាតិផ្នែកសិទ្ធិមនុស្ស និងក្រុមគាំទ្រទណ្ឌិត ថាមានបំណងទុកជាមុន ដើម្បីបង្ខូចតម្លៃបោះឆ្នោតខែកក្កដា ឆ្នាំក្រោយនេះ។
នៅក្នុងបន្ទប់សន្និសីទកាសែតក្នុងទីស្តីការ គណៈរដ្ឋមន្រ្តី លោក កែវ រ៉េមី អនុប្រធានអង្គភាពព័ត៌មាននិងប្រតិកម្មរហ័សបានចោទក្រុមសកម្មជនសិទ្ធិមនុស្ស សង្គមស៊ីវិល បក្សប្រឆាំងថា កំពុងតែបង្កើតវប្បធម៌គាំទ្រអ្នកទោស ហើយប្រឆាំងនឹងរដ្ឋាភិបាល។
លោក កែវ រ៉េមី បានរិះគន់ លោក ស៊ូប៊ែរឌី និងលោក ប្រេដ អាដាម នៃអង្គការឃ្លាំមើលសិទ្ធិមនុស្សនិងសង្គមស៊ីវិលថា កំពុងប្រើរូបភាពនៃបញ្ហាសិទ្ធិមនុស្សបង្កើតចលាចលក្នុងកម្ពុជា និងដើរតួប្រឆាំងរដ្ឋាភិបាល។
លោកកែវ រ៉េមី ថ្លែងថា៖«យើងចាប់អារម្មណ៍ថា ក្រុមអ្នកទាំងនោះ បាននិងកំពុងបង្កើតវប្បធម៌និទ្ទណ្ឌភាពគាំទ្រអ្នកទោស។ នយោបាយរបស់រដ្ឋាភិបាលនៅក្នុងពេលបច្ចុប្បន្ននេះមិនសម្រប សម្រួលនយោបាយឬផ្សះផ្សា បង្រួបបង្រួមជាតិ ដូចឆ្នាំ១៩៩២‑១៩៩៣ទេ គឺជាដំណាក់កាលពង្រឹងនីតិរដ្ឋ»។
លោកបន្តថា ៣០ឆ្នាំបន្ទាប់ពីការបោះឆ្នោតឆ្នាំ១៩៩៣ គាំទ្រដោយអង្គការសហប្រជាជាតិ រដ្ឋាភិបាលបាននិងកំពុងពង្រឹងការអនុវត្តច្បាប់ដើម្បីឲ្យ ក្លាយជានីតិរដ្ឋ។ លោកបន្ថែមថា ជុំវិញបញ្ហាកាត់ទោស មិនមែនតែ សម រង្ស៊ី និងម៉ម សូណង់ដូ ទេ តែស័ក្តិ៥ ផ្កាយ៣, ២, ១ ចៅក្រម ព្រះរាជអាជ្ញា ជាមន្រ្តីនៅក្នុងបក្សកាន់អំណាច ក៏បានផ្តន្ទាទោសដាក់គុក ពួកគេពាក់ព័ន្ធនឹងអំពើពុករលួយ ថ្នាំញៀននិងព្រៃឈើ។
លោកថ្លែងបន្តថា អត្ថាធិប្បាយមួយចំនួនរបស់លោក ស៊ូប៊ែរឌី អំពីគណៈកម្មាធិការជាតិរៀបចំការបោះឆ្នោត ថាគួរតែមានការឯកភាពរួមគ្នា ក្នុងចំណោមគណបក្សនយោបាយសំខាន់ៗតំណាងក្នុងសភា លើបញ្ហាតែងតាំងប្រធាន និងសមាជិកគ.ជ.ប និងគ.ខ.បខេត្ត ដែល គ.ជ.ប បានកែទម្រង់ ពីរ-បីដងមកហើយ។
លោកថ្លែងទៀតថា លទ្ធផលនៃការបោះឆ្នោតឃុំ-សង្កាត់ឆ្នាំ២០១២ កាលពីពេលមុន គឺជាភស្តុតាងនៃឯករាជភាពនៃគ.ជ.ប ព្រោះសង្គមស៊ីវិល អ្នកសង្កេតការណ៍ គណបក្សប្រឆាំង បានទទួលយកថា មានបរិយាកាសល្អ ប៉ុន្តែ ហេតុអ្វីបានជាពេលនេះពួកគេព្យាយាមបង្កើតបញ្ហាមុនការបោះឆ្នោតជាតិខែកក្កដាឆ្នាំក្រោយ ២០១៣ ទៅវិញ។
លោក កែវ រ៉េមី បានថ្លែងបន្តថា ៖ «លោក ស៊ូប៊ែរឌី និង លោក ប្រេដ អាដាម បានចោទរដ្ឋាភិបាលថា បានលុបសិទ្ធិអ្នកបោះឆ្នោត ប៉ុន្តែ ក៏ត្រូវតែពិនិត្យទៅលើច្បាប់ដែលថាទណ្ឌិត (សម រង្ស៊ី) មិនមានសិទ្ធិបោះឆ្នោតទេ»។
លោក យឹម សុវណ្ណ អ្នកនាំពាក្យគណបក្សសមរង្ស៊ី បានថ្លែងថា អង្គការសហប្រជាជាតិ និងសង្គមស៊ីវិលត្រូវបានបង្កើតឡើងដើម្បីជំរុញនិងការពារលទ្ធិ ប្រជាធិបតេយ្យ និងសិទ្ធិមនុស្ស ក្នុងប្រទេសកម្ពុជា ប៉ុន្តែ មិនមែនដើម្បីផ្តួលរំលំរដ្ឋាភិបាលទេ។
លោកបន្តថា៖ «ខ្ញុំសោកស្តាយដែលបក្សកាន់អំណាចឬអ្នកផ្តាច់ការ មិនដែលមានទំនាក់ទំនងល្អ ជាអង្គការសហប្រជាជាតិ ហើយតែងតែច្រានចោលតួនាទីរបស់អង្គការសហប្រជាជាតិ ដែលជំរុញនិងការពារសិទ្ធិមនុស្សនិងលទ្ធិប្រជាធិបតេយ្យនៅ ក្នុងប្រទេសកម្ពុជា»។
លោក អ៊ូ វីរៈ ប្រធានមជ្ឈមណ្ឌលសិទ្ធិមនុស្សកម្ពុជាក៏បានសម្តែងការសោកស្តាយ ចំពោះការអត្ថាធិប្បាយរិះគន់ពីមន្ត្រីរដ្ឋាភិបាលមកលើសង្គម ស៊ីវិល និងបក្សប្រឆាំងនេះដែរ៕
No comments:
Post a Comment
yes