សៀមរាប ៖ សម្ដេចអគ្គមហាសេនាបតីតេជោ ហ៊ុន សែន ទើបតែបានប្រកាសព្រមានសារជាថ្មីម្តងទៀត កាលពីថ្ងៃទី២០ ខែកញ្ញា ឆ្នាំ២០១២ គឺមិនអាចអត់ឱនបានទេ ចំពោះអ្នកបាញ់បោះសេរី ដែលបង្កឲ្យមានភាពជ្រួលច្របល់ និងរំខានអារម្មណ៍របស់ភ្ញៀវទេសចរណ៍ ហើយករណីដែលលោក ម៉ៅ ពៅ ជាស្នងការនគរបាលខេត្តព្រះវិហារ បានប្រព្រឹត្តអំពើបាញ់បោះសេរី កណ្តាលក្រុងសៀមរាប ដែលជាតំបន់ទេសចរណ៍ដ៏សំខាន់កាលពីវេលាម៉ោង១១និង៣០ នាទីយប់ ថ្ងៃទី៣០ ខែកញ្ញា ឆ្នាំ២០១២ នៅក្នុងសណ្ឋាគារឡកយីញ ស្ថិតនៅតាមបណ្ដោយផ្លូវជាតិលេខ៦ សង្កាត់ស្លក្រាម ក្រុង-ខេត្ដសៀមរាបអាចចាត់ទុកជាអំពើមិនសមរម្យ និងជាការបំពានដោយកំរោលទៅលើបទបញ្ជារបស់ប្រមុខរាជរដ្ឋាភិបាលផងដែរ។
លោក ម៉ៅ ពៅ ស្នងការនគរបាលខេត្ដព្រះវិហារ ត្រូវបានសមត្ថកិច្ចក្រុង-ខេត្ដសៀមរាបឃាត់ខ្លួន ហៅមកសាកសួរនៅស្នងការដ្ឋាននគរបាលខេត្ដ បន្ទាប់ពីបានបាញ់បោះសេរីជាច្រើនគ្រាប់នៅក្នុងសណ្ឋាគារឡកយីញទាំងយប់ ផ្អើលអស់ប្រជាពលរដ្ឋនិងភ្ញៀវដែលស្នាក់នៅទីនោះ ប៉ុន្តែត្រូវបានដោះលែងឲ្យមានសេរីភាពវិញប៉ុន្មានម៉ោងក្រោយមក។ សមត្ថកិច្ចបានឱ្យដឹងថា មុនពេលកើតហេតុ លោក ម៉ៅ ពៅ បានមកចូលស្នាក់នៅក្នុងសណ្ឋាគារខាងលើ ក្នុងអាការស្រវឹងជោកជាំ រួចហើយមិនដឹងជាមានរឿងអ្វីកើតឡើងនោះទេ បែរជាគាត់បើកទ្វារបន្ទប់ចេញ ស្ទុះទៅឆក់កាំភ្លើងពីអង្គរក្សរបស់ខ្លួនបាញ់ ប្រមាណពី៥-៦គ្រាប់ក្រោមលេសថា មានអ្នកមកធាក់ទ្វារបន្ទប់របស់គាត់កំពុងស្នាក់នៅ ដូច្នេះការបាញ់នេះគឺជាសិទ្ធិការពារខ្លួនរបស់គាត់។
បន្ទាប់ពីមានការភ្ញាក់ផ្អើលដោយសារអំពើបាញ់បោះសេរីនេះ ប្រជាពលរដ្ឋក៏ដូចជាម្ចាស់សណ្ឋាគារ និងសមត្ថកិច្ចបានមកដល់កន្លែងកើតហេតុភ្លាមៗ ហើយបានឃាត់ខ្លួនលោក ម៉ៅ ពៅ បញ្ជូនទៅកាន់ស្នងការដ្ឋាននគរបាល ប៉ុន្ដែត្រូវបានដោះលែងបន្ទាប់ពីមានការសារភាពនូវកំហុស ក៏ដូចជាការអន្ដរាគមន៍មួយចំនួន ។ ពាក់ព័ន្ធករណីបាញ់បោះសេរីនេះ សាធារណជនតែងតែបានហៅជនបង្កថាជាជនទំនើង ហើយបើទោះបីជាហេតុការណ៍បាញ់បោះសេរីនេះមិនបណ្ដាលឱ្យនរណាម្នាក់រងរបួសនោះឡើយ គ្រាន់តែខូចខាតទ្រព្យសម្បត្ដិ មួយចំនួននៅក្នុងសណ្ឋាគារក៏ដោយ អាចចាត់ទុកជាការបំពានច្បាប់ និងជាកំហុសឆ្គងដ៏ធ្ងន់ធ្ងរមួយ ផ្ទុយពីអនុសាសន៍របស់ប្រមុខរាជរដ្ឋាភិបាល។
យ៉ាងណាក៏ដោយ របាយការណ៍លម្អិតមួយ ពាក់ព័ន្ធនឹងករណីដែលលោកស្នងការ ម៉ៅ ពៅ បាញ់បោះសេរីនេះ ត្រូវបានបញ្ជូនមកដល់ថ្នាក់លើ ព្រោះការផ្អើលឆោរឡោ ដោយអំពើបាញ់បោះសេរីនេះមិនអាចលាក់បាំងជិតទេ ទោះជាលោក ម៉ៅ ពៅ មានប្រាក់ច្រើនហូរហៀរក៏មិនអាច កាឡៃរឿងនេះឲ្យទៅជារឿងផ្សេងបានទេ។ មិនទាន់មានការបញ្ជាក់ថា ទង្វើបាញ់បោះសេរីរបស់លោក ម៉ៅ ពៅ បែបនេះត្រូវនាំទៅដាក់ពិន័យផ្នែករដ្ឋបាល ឬត្រូវបញ្ជូនខ្លួនឱ្យទទួលទោសទណ្ឌតាមផ្លូវតុលាការនោះនៅឡើយទេ។ ព្រះរាជអាជ្ញាអមសាលាដំបូងខេត្ដសៀមរាប បានបញ្ជាក់ថា ពិតជាមានការបាញ់បោះនៅសណ្ឋាគារឡកយីញមែន ហើយលោកក៏បានបញ្ជាឱ្យសមត្ថកិច្ចឃាត់ខ្លួន មកសួរនាំហើយគាត់បានទទួលកំហុសពេលដែលសមត្ថកិច្ចហៅមកសាកសួរ ទើបមានការដោះលែងឱ្យត្រឡប់ទៅវិញ ដូច្នេះ គាត់នៅតែជាប់បណ្ដឹងអាជ្ញាដដែលនូវបទល្មើសចំនួន២។
យោងតាមហេតុការណ៍ដែលកើតមានដោយសារអំពើបាញ់បោះសេរីរបស់ លោក ម៉ៅ ពៅ គេរកឃើញបទល្មើសចំនួនពីរគឺ ទី១- គាត់បានធ្វើឱ្យខូចខាតទ្រព្យសម្បត្ដិរបស់អ្នកដទៃនៅក្នុង សណ្ឋាគារខាងលើ តែខាងម្ចាស់សណ្ឋាគារមិនប្ដឹងនិងមិនទាមទារសំណង ហើយបទល្មើសទី២- គាត់បានប្រើប្រាស់កាំភ្លើងបាញ់ខុសច្បាប់។ ក្រោយពេលសារភាពកំហុសលោក ម៉ៅ ពៅ បានចាកចេញពីខេត្ដសៀមរាបទៅកាន់ខេត្ដព្រះវិហារដោយសុវត្ថិភាព ហើយបើតាមប្រភពព័ត៌មានមួយចំនួនបានឲ្យដឹងថា លោក ម៉ៅ ពៅ ដែលកាន់តំណែងជាស្នងការខេត្ដព្រះវិហារជាច្រើនឆ្នាំ ត្រូវបានថ្នាក់លើដកតំណែងរួចហើយ ដូច្នេះតុលាការនៅតែបន្ដអនុវត្ដនីតិវិធីក្នុងសំណើរឿងព្រហ្មទណ្ឌនេះដដែល។
ប្រជាពលរដ្ឋនិងភ្ញៀវទេសចរណ៍បានចាត់ទុកថា ការបាញ់បោះសេរីបែបនេះកំពុងជះឥទ្ធិពលអាក្រក់ដល់សង្គមជាតិ ជាពិសេសប៉ះពាល់ទៅនឹងបញ្ហាសន្ដិសុខសណ្ដាប់ធ្នាប់សង្គម ហើយម្យ៉ាងវិញទៀត ជនបង្កដែលមានតួនាទីជាស្នងការខេត្ដព្រះវិហារ ត្រូវបានសមត្ថកិច្ចបានដោះលែង បន្ទាប់ពីបានប្រព្រឹត្ដបទល្មើសជាក់ស្ដែង ហើយសមត្ថកិច្ចឃាត់ខ្លួនបានតែមួយដង្ហើមចង្រិតក៏មានអន្តរាគមន៍ឲ្យដោះលែងទៅវិញ។ គួររំលឹកថា លោក ម៉ៅ ពៅ ធ្លាប់រងនូវបណ្ដឹងជាច្រើនរបស់ប្រជាពលរដ្ឋ ខណៈដែលគាត់ធ្លាប់ប្រើអំពើហិង្សាទៅលើជនសង្ស័យ និងអនុវត្ដខុសនីតិវិធីក្នុងនាមមន្ដ្រីនគរបាលយុត្ដិធម៌ ហើយការងារមួយចំនួនមិនបានឆ្លងយោបល់ឯកភាពណាមួយពីតំណាងអយ្យការ និងមានបញ្ហាជាច្រើនទៀតដែលថ្នាក់លើកំពុងមានចំណាត់ការ៕
No comments:
Post a Comment
yes