លោក ឈុត វុទ្ធី នៅពេលដែលលោកចុះទៅព្រៃឡង់ កាលលោកនៅរស់ (រូបថត VOD)
មន្រ្តីស៊ើបអង្កេតនៃអង្គការសិទ្ធិមនុស្សលីកាដូ ប្រចាំខេត្តកោះកុង លោក អ៊ិន គង់ជិត មានប្រសាសន៍ថា នៅព្រឹកថ្ងៃទី០៤ ខែតុលា ឆ្នាំ២០១២ ស្អែកនេះ តុលាការនឹងបើកសវនាការលើរឿងក្តីដែលពាក់ព័ន្ធនឹងឃាតកម្ម លោក ឈុត វុទ្ធី។ លោកបន្តថា សវនាការនោះនឹងកាត់ក្តីតែលើសំណុំរឿងលោក រ៉ាន់ បូរ័ត្ន ដែលជាប់ចោទបាញ់សម្លាប់លោក អ៊ិន រតនា ប៉ុណ្ណោះ។ ចំណែកសំណុំរឿងលោក អ៊ិន រតនា បាញ់សម្លាប់លោក ឈុត វុទ្ធី តុលាការតម្កល់រឿងទុកឥតចាត់ការ ៖ “តែសំនុំរឿងអ្នកណាសម្លាប់ ឈុត វុទ្ធី នេះ គឺអត់បានបើកទេ គឺសំនុំរឿងនេះត្រូវបានតំណាងឯយ្យការតំកល់ទុកអត់ចាត់ការ។”
លោក អ៊ិន គង់ជិត អះអាងបន្តថា ព្រះរាជអាជ្ញារងខេត្តកោះកុង លោក ស្រី ម៉ាកនី សម្រេចតម្កល់រឿងឃាតកម្មលើលោក ឈុត វុទ្ធី ទុកឥតចាត់ការ ដោយសារតុលាការរកមិនឃើញមានអ្នកពាក់ព័ន្ធដទៃទៀត ទើបបណ្តឹងអាជ្ញាត្រូវរលត់ ខណៈជនសង្ស័យស្លាប់ ៖ “គឺសំនុំរឿងនេះ ត្រូវបានតំណាងឯយ្យការ តំកល់ទុកអត់ចាត់ការ ថាកន្លងមក ធ្វើការស៊ើបសង្កេតទៅវាអត់ឃើញមាន ជនពាក់ព័ន្ធដទៃទៀត ហើយដល់ពេល អ៊ិន រតនា ស្លាប់ទៀតអញ្ចឹង ទៅតាមនីតិវិធីព្រហ្មទណ្ឌគឺ បើជនល្មើសគាត់ស្លាប់ហើយគឺ អាជ្ញាត្រូវរលត់។”
ភរិយាសពលោក ឈុត វុទ្ធី អ្នកស្រី សំ ចន្ធី មានប្រសាសន៍ថា គាត់មិនបានទទួលដំណឹងពីការតម្កល់សំណុំរឿងឃាតកម្មស្វាមីអ្នកស្រីទុកឥតចាត់ការឡើយ។ អ្នកស្រីបន្តថា តុលាការមិនបានប្រាប់អ្នកស្រីឲ្យដឹងពីសេចក្តីសម្រេចនេះទេ។ អ្នកស្រី សំ ចន្ធី បន្តថា អ្នកស្រីតែងតែទាមទារឲ្យតុលាការរកយុត្តិធម៌ឲ្យស្វាមីគាត់ ហើយថាប្រសិនបើតុលាការពិតជាសម្រេចបែបនេះមែន នោះអ្នកស្រី និងក្រុមគ្រួសារនឹងមិនមានការសប្បាយចិត្តទេ ៖ “ខ្ញុំអត់សប្បាយចិត្ត ព្រោះប្តីខ្ញុំស្លាប់ទៅដោយអត់រកយុត្តិធម៌ឲ្យគាត់សោះ ខ្ញុំគ្រាន់តែសុំទទូចហើយ សុំទទូចទៀត ខ្ញុំចង់ឲ្យតុលាការយកយុត្តិធម៌ឲ្យប្តីខ្ញុំផង។”
ប្រធានមជ្ឈមណ្ឌលសិទ្ធិមនុស្ស លោក អ៊ូ វីរៈ មានប្រសាសន៍ថា ការសម្រេចតម្កល់រឿងទុកឥតចាត់ការរបស់តុលាការបែបនេះ ជាការសម្រេចដោយមិនមានឆន្ទៈ បើកការស៊ើបអង្កេតឲ្យអស់លទ្ធភាព។ លោកបន្តថា លោកមានការសោកស្តាយ ដែលតុលាការមិនបានរកយុត្តិធម៌ជូនគ្រួសារជនរងគ្រោះបែបនេះ ៖ “សុទ្ធតែរឿងសន្និដ្ឋានដោយគ្មានការស៊ើបអង្កេត ហើយគ្មានឆន្ទៈក្នុងការស៊ើបអង្កេតផងហ្នឹង។ ជារឿងមួយសោកស្តាយមែនទែន តែអត់បានរកយុត្តិធម៌ជួនដល់គ្រួសារលោក ឈុត វុទ្ធី ហើយអ្នកដែលការពារព្រៃឈើនេះ។”
VOD មិនអាចសុំការបំភ្លឺពីព្រះរាជអាជ្ញារងតុលាការខេត្តកោះកុង លោក ស្រី ម៉ាកនី បានទេនៅរសៀលនេះ ដោយមានអ្នកទទួលទូរស័ព្ទជំនួសហើយអះអាងថា លោក ស្រី ម៉ាកនី កំពុងសវនាការ។
លោក ឈុត វុទ្ធី ប្រធានអង្គការការពារធនធានធម្មជាតិ ត្រូវគេបាញ់សម្លាប់នៅស្រុកមណ្ឌលសីមា ខេត្តកោះកុង បន្ទាប់ពីលោកព្យាយាមថតគំនរឈើ ដែលស្តុកទុកនៅក្នុងក្រុមហ៊ុន Timbergreen ។ តុលាការខេត្តកោះកុង ទើបតែចាប់ខ្លួនជនសង្ស័យជាបុគ្គលិកក្រុមហ៊ុននេះម្នាក់ឈ្មោះ រ៉ាន់ បូរ័ត្ន ឃុំខ្លួនដោយចោទពីបទមនុស្សឃាតដោយអចេតនា។ ចំណែកអង្គការសង្គមស៊ីវិល នៅតែជំរុញឲ្យតុលាការបន្តស៊ើបអង្កេតរកអ្នកពាក់ព័ន្ធ និងអ្នកនៅពីក្រោយខ្នងនៃឃាតកម្មនេះមកផ្តន្ទាទោស ដើម្បីផ្តល់យុត្តិធម៌ជូនគ្រួសារសពជនរងគ្រោះ៕
No comments:
Post a Comment
yes