១៣-០១-១០: លោក ហោ ណាំហុង ឧបនាយករដ្ឋមន្រ្តីនិងជារដ្ឋមន្រ្តីក្រសួង
ការបរទេសកម្ពុជា ធ្វើសន្និសីទកាសែតអំពីបញ្ហាខ្មែរថៃនៅឯអាកាសយាន្តដ្ឋានអន្តរ
ជាតិភ្នំពេញ នៅមុនពេលលោកចេញដំណើរទៅចូលរួមកិច្ចប្រជុំថ្នាក់រដ្ឋមន្រ្តីការបរទេសនៅវៀតណាម
ប្រមុខការទូតកម្ពុជា លោក ហោ ណាំហុង បញ្ជាក់នៅថ្ងៃទី១៥ ខែវិច្ឆិកា នៅក្នុងសន្និសីទកាសែតថា ឯកសារដែលមេដឹកនាំកំពូលអាស៊ាន ត្រៀមនឹងចុះហត្ថលេខានៅក្នុងកិច្ចប្រជុំកំពូលអាស៊ានលើកទី២១ នោះ គឺសេចក្តីថ្លែងការណ៍ទីក្រុងភ្នំពេញ អំពីការអនុម័តសេចក្តីថ្លែងការណ៍សិទ្ធិមនុស្សអាស៊ាន ហើយថាសេចក្តីថ្លែងការណ៍នេះមិនធ្វើដើម្បីបំពេញចិត្តរបស់អង្គការសង្គមស៊ីវិលនោះទេ។
ការសម្រេចនេះ ខណៈដែលក្រុមអង្គការសង្គមស៊ីវិលមកពីបណ្ដាប្រទេសសមាជិកអាស៊ាន បានជួបជុំគ្នាជាច្រើនក្រុមនៅរាជធានីភ្នំពេញ ដើម្បីត្រៀមផ្តល់អនុសាសន៍រួម ដែលផ្ដោតសំខាន់លើសេចក្តីថ្លែងការណ៍សិទ្ធិមនុស្សអាស៊ាន ដែលអង្គការសង្គមស៊ីវិលព្រួយបារម្ភថាពុំទាន់មានលក្ខណពេញលេញនៅឡើយ។
ទោះជាមិនមានការពេញចិត្តពីមន្ត្រីអង្គការសង្គមស៊ីវិលជាតិ និងអន្តរជាតិ ជុំវិញសេចក្តីថ្លែងការណ៍សិទ្ធិមនុស្សអាស៊ាន ក៏រដ្ឋមន្ត្រីក្រសួងការបរទេសកម្ពុជា បញ្ជាក់ថាសេចក្តីថ្លែងការណ៍នេះនឹងអនុម័តជាផ្លូវការក្នុងកិច្ចប្រជុំកំពូលអាស៊ាន ស្របពេលដែលកម្ពុជា ជាម្ចាស់ផ្ទះនៃកិច្ចប្រជុំនេះ នៅថ្ងៃទី១៨ ខែវិច្ឆិកា។
ក្នុងសន្និសីទកាសែតនៅថ្ងៃទី១៥ ខែវិច្ឆិកា នៅទីស្ដីការក្រសួងការបរទេស លោក ហោ ណាំហុង រដ្ឋមន្ត្រីក្រសួងការបរទេសបញ្ជាក់ថា ឯកសារដែលមេដឹកនាំកំពូលអាស៊ានត្រូវចុះហត្ថលេខា គឺសេចក្ដីថ្លែងការណ៍ភ្នំពេញ អំពីការអនុម័តសេចក្តីថ្លែងការណ៍សិទ្ធិមនុស្ស ដែលរៀបចំដោយគណៈកម្មការអន្តររដ្ឋាភិបាលរបស់អាស៊ាន អំពីសិទ្ធិមនុស្ស អាយឆា (AICHA)។
លោក ហោ ណាំហុង បញ្ជាក់ថា មានការអត្ថាធិប្បាយជាច្រើន ពិសេសពីអង្គការសង្គមស៊ីវិល អំពីបញ្ហាសិទ្ធិមនុស្ស។ ប៉ុន្តែ មុននឹងរដ្ឋមន្ត្រីការបរទេសឯកភាព មុននឹងដាក់ជូនប្រមុខរដ្ឋ ប្រមុខរដ្ឋាភិបាលអាស៊ានអនុម័ត និងចុះហត្ថលេខាលើសេចក្តីថ្លែងការណ៍នេះ គឺគណៈកម្មការអន្តររដ្ឋាភិបាល ពិភាក្សាជាមួយសង្គមស៊ីវិលរបស់អាស៊ានច្រើនលើកច្រើនសារទាំងនៅប្រទេសប្រ៊ុយណេ និងនៅហ្វីលីពីន មុននឹងសម្រេចបានសេចក្តីថ្លែងការណ៍អាស៊ាន៖ «មិនមែនអត្តនោម័តិរបស់គណៈកម្មការអន្តររដ្ឋាភិបាលអាស៊ានស្ដីពីសិទ្ធិមនុស្ស។ ពិតហើយ សេចក្តីថ្លែងការណ៍ស្ដីពីសិទ្ធិមនុស្សអាស៊ាននេះ មិនបំពេញចិត្តទាំងស្រុងរបស់ អ៊ិន.ជី.អូ (NGO) ខ្លះ សង្គមស៊ីវិលខ្លះ។ ហើយខ្ញុំសូមបញ្ជាក់សេចក្តីថ្លែងការណ៍ស្ដីពីសិទ្ធិមនុស្សនេះ មិនមែនជាសេចក្តីថ្លែងការណ៍របស់អ៊ិន.ជី.អូ ឬរបស់សង្គមស៊ីវិលទេ»។
លោក ហោ ណាំហុង បញ្ជាក់ថា សេចក្តីថ្លែងការណ៍នេះមិនបានធ្វើដើម្បីផ្គាប់ចិត្តអង្គការសង្គមស៊ីវិលមួយចំនួននោះទេ តែជាសេចក្តីថ្លែងការណ៍របស់អាស៊ាន អំពីសិទ្ធិមនុស្ស ដើម្បីឈានទៅរកការការពារឲ្យកាន់តែមានប្រសិទ្ធភាព ឈានទៅរកការជំរុញឲ្យមានការគោរពសិទ្ធិមនុស្សឲ្យកាន់តែខ្លាំងក្លាថែមទៀត៖ «វាជាជំហានលើកទី១ ដែលអាស៊ាន មានសេចក្តីថ្លែងការណ៍នេះ។ ខ្ញុំយល់ថា ជាការល្អណាស់ហើយដែលអាស៊ានមានឯកសារជាផ្លូវការ ឯកសារចុះហត្ថលេខា និងអនុម័តដោយថ្នាក់ដឹកនាំកំពូលរបស់អាស៊ាន នៅពេលនេះ។ ហើយនេះ ក៏ជាជំហានទី១ទៅមុខទៀត ក្នុងករណីមានការចាំបាច់ គណៈកម្មការអន្តររដ្ឋាភិបាលស្ដីពីសិទ្ធិមនុស្សអាចនឹងពិភាក្សាគ្នាទៀត អាចប្រជុំគ្នា អាចពិគ្រោះយោបល់ជាមួយអង្គការសង្គមស៊ីវិល ដើម្បីកែលំអអត្ថបទនេះតទៅទៀត»។
ប្រធានគណៈកម្មាធិការសិទ្ធិមនុស្សកម្ពុជា និងជាប្រធានគណៈកម្មការអន្តររដ្ឋាភិបាលសិទ្ធិមនុស្សអាស៊ាន លោក ឱម យ៉ិនទៀង ធ្លាប់បញ្ជាក់ថា សេចក្តីថ្លែងការណ៍ស្ដីពីសិទ្ធិមនុស្សអាស៊ាន ជាអត្ថបទនយោបាយដែលបង្ហាញពីសុឆន្ទៈរបស់រដ្ឋជាសមាជិកអាស៊ាន ហើយមិនមែនជាអត្ថបទច្បាប់នោះទេ។
អង្គការសង្គមស៊ីវិលដែលធ្វើការងារការពារសិទ្ធិមនុស្សនៅក្នុងតំបន់អាស៊ាន ធ្លាប់លើកឡើងថា គណៈកម្មការអន្តររដ្ឋាភិបាលសិទ្ធិមនុស្សអាស៊ាន មិនទាន់មានសិទ្ធិគ្រប់គ្រាន់ក្នុងការស្រាវជ្រាវ ឬស៊ើបអង្កេតអំពីបញ្ហាសិទ្ធិមនុស្សក្នុងតំបន់អាស៊ានបាននៅឡើយទេ។
អ្នកស្រី ធីតា ឃឹះ នាយិកាអង្គការសីលកា បញ្ជាក់ថា សេចក្តីថ្លែងការណ៍ដែលគ្មានការគាំទ្រពីអង្គការសង្គមស៊ីវិល និងប្រជាពលរដ្ឋនោះ វាគ្រាន់តែជាក្រដាសធម្មតា។
ជាមូលដ្ឋាន មានការព្រួយបារម្ភ ២សំខាន់ ទី១ គឺសេចក្ដីប្រកាសស្ថិតនៅក្រោមបទដ្ឋានអន្តរជាតិ មានន័យថា បទបញ្ញត្តិនានានៅក្នុងសេចក្ដីព្រាងរបស់សេចក្ដីប្រកាស ស្ដីពីសិទ្ធិមនុស្សអាស៊ាន ត្រូវស្ថិតក្រោមបទដ្ឋានអន្តរជាតិ។ ក្ដីបារម្ភធំមួយទៀតរបស់អង្គការសង្គមស៊ីវិល គឺសេចក្ដីព្រាងនេះ នឹងត្រូវគេអនុម័ត តែសិទ្ធិជាមូលដ្ឋានមួយចំនួន គេមិនបានបញ្ចូលក្នុងសេចក្ដីប្រកាសស្ដីពីសិទ្ធិមនុស្សនេះទេ។
តំណាងឲ្យសង្គមស៊ីវិលមួយនៅកម្ពុជា លោក ធន សារ៉ាយ និងជាប្រធានសមាគមសិទ្ធិមនុស្សអាដហុក (Adhoc) ធ្លាប់កត់សម្គាល់ថា ពង្រាងសេចក្តីថ្លែងការណ៍សិទ្ធិមនុស្សអាស៊ាននៅខ្វះចំណុចមួយចំនួន ដូចជាសិទ្ធិសេរីភាពជនជាតិដើមភាគតិច និងសិទ្ធិរបស់អ្នកស្រឡាញ់ភេទដូចគ្នាជាដើម។ លោកបន្ថែមថា ចំណុចមួយចំនួនទៀតដែលប្រទេសភាគីនៅក្នុងតំបន់ត្រូវពិចារណា ធ្វើសម្រេចឲ្យបានតាមធម្មនុញ្ញអាស៊ាន គឺការបើកចំហព្រំដែននៃសេរីភាពនៅក្នុងការបញ្ចេញមតិ។
ទោះជាយ៉ាងណា អ្នកស្រី ធីតា ឃឹះ នាយិកាអង្គការសីលកា បញ្ជាក់ថា សេចក្តីថ្លែងការណ៍រួមរបស់អង្គការជាតិ និងអន្តរជាតិប្រមាណ ៥០០ស្ថាប័ន ដែលផ្ដោតទៅលើបញ្ហាសិទ្ធិពលករចំណាកស្រុក បញ្ហាយន្តការអភិវឌ្ឍន៍សេដ្ឋកិច្ចកម្ពុជា ដែលខ្វះការការពារ និងកង្វះខាតនៅក្នុងសេចក្តីថ្លែងការណ៍សិទ្ធិមនុស្សអាស៊ាន នឹងត្រូវចាប់ផ្ដើមដាក់ជូនទៅស្ថានទូតនៃបណ្ដាប្រទេសនៃសមាជិកអាស៊ាន និងស្ថានទូតសហរដ្ឋអាមេរិក ចាប់ពីថ្ងៃទី១៦ ខែវិច្ឆិកា តទៅ ក្នុងគោលបំណងឲ្យការទាមទារ ឬអនុសាសន៍របស់ពួកគេមានប្រសិទ្ធភាព៕
No comments:
Post a Comment
yes