សកម្មជនការពារសិទ្ធិមនុស្សនៃសមាគមអាដហុក លោក ចាន់ សុវ៉េត អះអាងថា លោកចូលបំភ្លឺតាមដីកាកោះរបស់សាលាដំបូងរាជធានីភ្នំពេញជាថ្មីទៀត នៅថ្ងៃទី២៤ ខែធ្នូ ក្រោមបណ្ដឹង ផ្តល់មធ្យោបាយឲ្យជនសង្ស័យបង្កើតតំបន់អបគមន៍នៅខេត្តក្រចេះគេចខ្លួន។
មន្រ្តីស៊ើបអង្កេតជាន់ខ្ពស់នៃសមាគមសិទ្ធិមនុស្សអាដហុក លោក ចាន់ សុវ៉េត មានប្រសាសន៍ថា លោកនឹងចូលបំភ្លឺតាមដីកាកោះរបស់សាលាដំបូងរាជធានីភ្នំពេញនៅថ្ងៃទី២៤ ខែធ្នូ។ លោកថា បើទោះជាកន្លងមក តុលាការកម្ពុជារងការរិះគន់ថា មិនមានឯករាជ្យ តែក្នុងនាមលោកជាប្រជាពលរដ្ឋមានតួនាទីគោរពច្បាប់របស់ប្រទេស ៖ "អញ្ចឹងដើម្បីបង្ហាញពីភាពស្មោះត្រង់ ដើម្បីបង្ហាញពីភាពសុច្ចរិតរបស់យើង យើងត្រូវទៅបំភ្លឺ ដើម្បីឲ្យតុលាការយល់ដឹងពីបញ្ហាហ្នឹង។ អារឿងភ័យរឿងព្រួយចាំតែមានហើយ ប៉ុន្តែយើងមិនដឹងធ្វើម៉េច នេះឆន្ទានុសិទ្ធិរបស់តុលាការ អញ្ចឹងតុលាការលោកត្រូវពិចារណា ថាតើតុលាការរបស់យើងមានភាពឯករាជ្យ ដែរឬទេ? ព្រោះកន្លងមកមានមតិជាតិ និងអន្តរជាតិ គេបានរិះគន់ថាតុលាការប្រទេសយើង ជាតុលាការអត់ឯករាជ្យ អញ្ចឹងបើលោកត្រូវការចាប់ឃុំខ្លួនអីជាដើម អាហ្នឹង ដឹងធ្វើម៉េច?"
សាលាដំបូងរាជធានីភ្នំពេញ បានចេញដីកាកោះហៅ ជាលើកទី២ បង្គាប់ឲ្យលោក ចាន់ សុវ៉េត ចូលបំភ្លឺនៅព្រឹកថ្ងៃទី២៤ ខែធ្នូ ឆ្នាំ២០១២ វេលាម៉ោង ៨ព្រឹក។
គួរបញ្ជាក់ថា សាលាដំបូងរាជធានីភ្នំពេញ ធ្លាប់បានបង្គាប់ឲ្យ លោក ចាន់ សុវ៉េត ចូលបំភ្លឺម្តងរួចមកហើយ កាលពីថ្ងៃទី២៤ ខែសីហា ឆ្នាំ២០១២ តែលោកមិនបានចូលបំភ្លឺដោយសារលោកជាប់បេសកកម្មទៅក្រៅប្រទេស។ ដីកាកោះហៅនោះ បានធ្វើឡើងក្រោយពីលោកនាយករដ្ឋមន្ត្រី ហ៊ុន សែន ព្រមានមិនចំឈ្មោះ កាលពីថ្ងៃទី១ ខែសីហា ថានឹងចាត់វិធានការលើមន្ត្រីសង្គមស៊ីវិលម្នាក់ ដែលលោកចោទថា ផ្តល់មធ្យោបាយឲ្យជនសង្ស័យបង្កើតតំបន់អបគមន៍នៅខេត្តក្រចេះគេចខ្លួន៕
No comments:
Post a Comment
yes