លោកឆាវ៉េស និងកូនស្រីរបស់លោក នៅពេលធ្វើការវះកាត់រួច នៅប្រទេសគុយបា
បន្ទាប់ពីប្រយុទ្ធតទល់នឹងជម្ងឺមហារីក តាំងពី២ឆ្នាំកន្លងមក
ប្រមុខរដ្ឋដ៏មានប្រជាប្រិយ នៃប្រទេសវ៉េនេស៊ុយអេឡា បានធ្វើមរណភាព ក្នុងអាយុ៥៨ឆ្នាំ
នៅថ្ងៃ៥ខែមិនា វេលាម៉ោងប្រមាណជា៤ម៉២៥នាទី ម៉ោងនៅក្នុងស្រុក។
ប្រធានាធិបតីហ៊ុយហ្គោ ឆាវ៉េស (Hugo Chavez) បានលាចាកលោក នៅទីក្រុងការ៉ាកាស ក្នុងអាយុ៥៨ឆ្នាំ បណ្ដាលមកពីជម្ងឺមហារីក
ដែលចាប់ផ្ដើមរោគសញ្ញាដំបូង នៅខែមិថុនាឆ្នាំ២០១១។ មរណភាពរបស់លោក
បានបិទបញ្ចប់ការកាន់អំណាចជាង១៤ឆ្នាំ ដែលជាសម័យកាលមួយ មានពណ៌ក្រហមតាមបែបផ្ដាច់ការ
នៅប្រទេសស្ថិតនៅក្នុងទ្វីបអាមេរិកខាងត្បូងមួយនេះ។
«យើងទើបនឹងបានទទួលដំណឹង មិនអាចទទួលយកបាន និងរន្ធត់
ដែលយើងអាចផ្សាយ ទៅជូនប្រជាជនរបស់យើង។ នៅវេលាម៉ោង០៤ម៉២៥នាទីរសៀលថ្ងៃអង្គារទី៥ខែមិនា
លោក ប្រធានាធិបតីឧត្តមសេនីយ ហ៊ុយហ្គោឆាវ៉េស បានទទួលមរណភាព
បន្ទាប់ពីលោកបានប្រយុទ្ធតស៊ូ មិនចេះរាថយ ប្រឆាំងនឹងជម្ងឺតាំងពីជិត២ឆ្នាំមកហើយ។»
នេះជាការប្រកាសអោយដឹង របស់លោកនីកូឡា ម៉ាដូរ៉ូ (Nicolas Maduro)
អនុប្រធានាធិបតីនៃប្រទេស ជាមួយនឹងទឹកភ្នែកផង។
លោកបានបញ្ជាក់បន្ថែមថា យោធានឹងត្រូវយកមកដាក់ពង្រាយ ដើម្បីថែរក្សាសន្តិភាព
ក្នុងដំណាក់កាលនេះ។
គូររំលឹកថា នៅក្នុងបទអន្តរាគមន៍តាមទទស្សន៍ មេទ័ពសំខាន់ៗ
របស់ប្រទេស ក៏បានសន្យាដែរ ថានឹងស្មោះស្ម័គ្រ នឹងអនុប្រធានាធិបតីអាយុ៥០ឆ្នាំរូបនេះ
នៅក្រោយបន្ទាប់ពីមរណភាព របស់លោកឆាវ៉េស។ លោកនីកូឡា ម៉ាដូរ៉ូ
នឹងត្រូវបន្តតំណែងពីលោកឆាវ៉េស តែនៅក្នុងស្ថានភាពបែបនេះ រដ្ឋធម្មនុញ្ញរបស់ប្រទេស
តម្រូវអោយមានការបោះឆ្នោត មុនកាលកំណត់មួយ ដែលទំនងជានឹងរៀបចំធ្វើនៅខែមិថុនាខាងមុខ។
វះកាត់ជម្ងឺមហារីក នៅប្រទេសគុយបា
នៅមុននេះ ភាពមិនច្បាស់លាស់បានលេចចេញឡើង
ពីស្ថានភាពរបស់ប្រធានាធិបតី ដែលបានចូលទៅកាន់មន្ទីពេទ្យយោធា នៃរដ្ឋធានី
បន្ទាប់ពីបញ្ជូនត្រឡប់ពីប្រទេសគុយបាមកវិញ។ លោកឆាវ៉េស បានទ្រាំទ្រនឹងជម្ងឺមហារីក
ផ្នែកតម្រងនោម តែស្ថានភាពជម្ងឺរបស់លោក កាន់តែធ្ងន់ធ្ងរទៅៗ ជាលំដាប់
ជាពិសេសនៅពេលម៉ោងចុងក្រោយនេះ។ នេះបើតាមការបញ្ជាក់អោយដឹង
របស់រដ្ឋាភិបាលទីក្រុងការ៉ាកាស។
លោកបានឡើងមកកាន់អំណាច តាំងពីឆ្នាំ១៩៩៩
សម្រាប់អាណត្តិដឹកនាំប្រទេស ៦ឆ្នាំម្ដង ហើយទើបតែត្រូវបានជ្រើសតាំងជាថ្មីទៀត
នៅខែតុលាឆ្នាំ២០១២កន្លងមក មុននឹងលោកត្រូវទៅធ្វើការវះកាត់ជាលើកទីបួន
នៅក្នុងប្រទេសគុយបា។ តាំងពីពេលនោះមក គេលែងបានឃើញលោកឆាវ៉េស បង្ហាញមុខជាសាធារណៈទៀត
រហូតមកដល់ថ្ងៃនេះ៕
No comments:
Post a Comment
yes