ckn-media.blogspot.com: និគមជនយួនសុំទានអនាធិបតេយ្យនៅតំបន់ចុងឃ្នៀសរំខានអ្នកទេសចរ

និគមជនយួនសុំទានអនាធិបតេយ្យនៅតំបន់ចុងឃ្នៀសរំខាន់ដល់ភ្ញៀវទេសច

ខេត្ដសៀមរាប ៖ សកម្មភាពក្រុមនិគមជនយួនជិះទូកនិងចានដែកសុំទាននៅតំបន់ចុងឃ្នៀស នៅតែបន្ដបង្កការក្ដៅក្រហាយដល់ភ្ញៀវទេសចរអន្ដរជាតិទៅកម្សាន្ដនៅរមណីយដ្ឋានមាត់បឹងទន្លេសាបចុងឃ្នៀស ខណៈសមត្ថកិច្ចប្រចាំការនៅទីនោះនិយាយថា ពុំមានលទ្ធភាពទប់ស្កាត់ឱ្យមានប្រសិទ្ធភាពឡើយ ។ តាមពិតនេះពុំមែនជារឿងថ្មីទេ ដែលបញ្ហាសុំទានអនាធិបតេយ្យបែបនេះធ្វើឱ្យប៉ះពាល់ធ្ងន់ធ្ងរដល់អ្នកទេសចរ ។

ជុំវិញសកម្មភាពជិះទូកសុំទាននេះ មន្ដ្រីប៉ូលិសមួយរូបសុំមិនបញ្ចេញឈ្មោះនិយាយថា «សកម្មភាពសុំទានហ្នឹង វាកើតឡើងស្ទើរទូទាំងរមណីយដ្ឋានចុងឃ្នៀស យូរខែ យូរឆ្នាំមកហើយ គ្មានអ្នកណាអាចបញ្ឈប់បានទាល់តែសោះ គឺមើលទៅអនាធិបតេយ្យគ្មានលេខដាក់ ធ្វើឱ្យប៉ះពាល់យ៉ាងខ្លាំងដល់សេចក្ដីថ្លៃថ្នូររបស់ប្រទេសកម្ពុជា» ។

មន្ដ្រីប៉ូលិសដដែលបញ្ជាក់ថា បច្ចុប្បន្នមានទូកម៉ាស៊ីននិងទូលអុំរបស់និគមជនយួនប្រមាណ១៥ទៅ២០គ្រឿង កំពុងធ្វើសកម្មភាពសុំទានពីភ្ញៀវ ដោយបែងចែកជា៣មុខសញ្ញាធំៗ តាមរូបភាពផ្សេងៗគ្នា ។ ក្រុមទី១ មានទូកម៉ាស៊ីនចំនួន៦គ្រឿង ជាក្រុមស្ទាត់ជំនាញក្នុងការប្រដេញចាំស្កាត់នៅមាត់កំពង់ ឱ្យតែឃើញកាណូតដឹកភ្ញៀវមកដល់ ពួកគេបើកទូកដេញតាមក្នុងល្បឿនលឿនដូចព្រួញបែកទឹកសំពោង រួចលោតតោងឡើងបង្ខំឱ្យទិញភេសជ្ជៈ ។

ក្រុមទី២ ជាស្រ្ដីពេញកម្លាំងជិះទូកអុំមានដាក់ក្មេងតូចៗចាប់ពី២ទៅ៣នាក់ សំកុកចាំនៅក្បែរភោជនីយដ្ឋានបណ្តែត ទឹកឱ្យតែឃើញមានកាណូតភ្ញៀវមកដល់ ពួកគេធ្វើល្បិចឱ្យក្មេងទាំងនោះយំស្រែកទ្រហឹងពេញផ្ទៃទឹក ដើម្បីបង្កើតជាក្ដីអាណិតអាសូរឱ្យដាក់ទានដល់ពួកគេ ។ ចំណែកក្រុមទី៣ ជាក្មេងស្រី-ប្រុស ពួកនេះជិះចានដែក ឬហែលផ្ទាល់ស្រែកជាភាសាយួន និងភាសាអង់គ្លេស «វ័នដុល្លារ វ័នដុល្លារ !» សុំលុយត្រង់ៗតែម្ដង ។ ក្នុងចំណោមពួកនោះមានស្ពាយសត្វពស់នៅជាប់នឹងស្មាផង ខ្លះលោតឡើងកាណូតភ្ញៀវទាំងសម្លៀកបំពាក់ទទឹកជោក ជួនកាលសត្វអាសិរពិសទាំងនោះខាំភ្ញៀវក៏មានដែរ ហើយភ្ញៀវខ្លះភ័យខ្លាចរហូតដល់ស្រែកយំ ឬលោតចូលទៅក្នុងទឹកក៏មាន ។

ម្ចាស់ភោជនីយដ្ឋានបណ្តែតទឹកម្នាក់និយាយថា «ពួកយួនទាំងនោះដូចជាសេរី និងមានសិទ្ធិជាងខ្មែរម្ចាស់ស្រុកទៅទៀត គ្មានខ្លាចអំណាចសមត្ថកិច្ចទេ ។ សកម្មភាពសុំទានបែបនេះ ឃើញកើតមានជាយូរមកហើយ សមត្ថកិច្ចដេញដូចបក់រុយរោមប្រហុកអីុចឹង» ។

គួររំលឹកថា ៖ អាជ្ញាធរខេត្តសៀមរាប និងក្រសួងទេសចរណ៍ ធ្លាប់បានទទួលស្គាល់ពីបញ្ហាប៉ះទង្គិចដល់អារម្មណ៍ភ្ញៀវ និងសេចក្តីថ្លៃថ្នូររបស់ប្រទេស បង្កឡើងដោយនិគមយួនខាងលើនោះ ព្រមទាំងបានប្តេជ្ញារួមគ្នាថា នឹងលុបបំបាត់ឱ្យអស់រាល់សកម្មភាពសុំទាននៅក្នុងតំបន់រមណីយដ្ឋានចុងឃ្នៀសនោះជារបៀបភ្លៀងរលឹម ដោយសម្រេចបង្កើតទីបញ្ជាការស្រាលមួយមានកម្លាំងប៉ូលិសរដ្ឋបាលសង្កាត់ចុងឃ្នៀស ប៉ូលិសចរាចរផ្លូវទឹក និងកងរាជអាវុធហត្ថប្រចាំការនៅក្នុងតំបន់នោះ ក៏ប៉ុន្តែមិនបានមួយដង្ហើមចង្រិតផង ទីបញ្ជាការស្រាលនោះក៏បាត់ស្រមោលទៅវិញ ។

លោកវរសេនីយ៍ត្រី រ៉ា បួន ប្រធានស្នាក់ការសន្តិសុខ B8 របស់កងរាជអាវុធហត្ថប្រចាំការនៅតំបន់រមណីយដ្ឋានចុងឃ្នៀសបានមានប្រសាសន៍នៅរសៀលថ្ងៃទី២ មេសា ថាលោកបានទទួលស្គាល់សកម្មភាពជិះទូកសុំទានភ្ញៀវ ដែលទៅកម្សាន្តនៅតំបន់ចុងឃ្នៀស ប៉ុន្តែករណីនោះមិនមែនជាភារៈទទួលខុសត្រូវរបស់ខាងកម្លាំងកងរាជអាវុធហត្ថទេ វាជាការទទួលខុសត្រូវរបស់ប៉ូលិសសណ្តាប់ធ្នាប់ ។ ចំណែកលោកវរសេនីយ៍ទោ ហង្ស ហ៊ុន នាយការិយាល័យផ្លូវទឹកប្រចាំការនៅតំបន់ចុងឃ្នៀស ដែលវិនិយោគដោយក្រុមហ៊ុនស៊ូជីង នៅព្រឹកថ្ងៃទី២ មេសា នោះដែរថ្លែងថា ការដួលរលំទីបញ្ជាការស្រាលនៅតំបន់រមណីយដ្ឋានចុងឃ្នៀស ដែលដឹកនាំផ្ទាល់ដោយលោកអ៊ុំ ម៉ារ៉ា ជាអតីតអភិបាលរងខេត្តសៀមរាប បច្ចុប្បន្នជាអភិបាលខេត្តព្រះវិហារ បានធ្វើឱ្យអ្វីៗដែលរៀបចំស្អាតបាតត្រឡប់ទៅជាអនាធិបតេយ្យវិញ ជាពិសេសសកម្មភាពជិះទូក ឬចានដែកសុំទានភ្ញៀវពីសំណាក់និគមយួនតែម្តង ។

លោកបានបញ្ជាក់ថា ពួកអ្នកសុំទានឆ្លងដែនទាំងនោះរឹងរូសណាស់ ពេលសមត្ថកិច្ចទៅទប់ស្កាត់ គេសម្ងំឱ្យស្ងាត់ឈឹង លុះពេលកងកម្លាំងចេញផុត ពួកគេចេញធ្វើសកម្មភាពព្រោងព្រាត គឺដូចវែកចក ។ ដូច្នេះបើមិនមានការគាំទ្រសាជាថ្មីពីថ្នាក់លើទៅលើផ្នែកហិរញ្ញវត្ថុទេ បេសកកម្មទប់ស្កាត់សកម្មភាពអ្នកសុំទានអនាធិបតេយ្យទាំងនោះ ប្រាកដជាមិនមានប្រសិទ្ធភាពយូរអង្វែងឡើយ ៕

Thursday, April 4, 2013

និគមជនយួនសុំទានអនាធិបតេយ្យនៅតំបន់ចុងឃ្នៀសរំខានអ្នកទេសចរ

No comments:

Post a Comment