លោកឈូក បណ្ឌិត ពេលនាំឡើងមកសវនាការសាលាឧទ្ធរណ៍ រាជធានីភ្នំពេញ
សវនាការសាកសួរលើសំណុំរឿងដ៏ចម្រូងចម្រាសដែលអតីតអភិបាលក្រុងបាវិតលោក ឈូក បណ្ឌិត បាញ់កម្មការិនី ៣នាក់ឲ្យរងរបួសធ្ងន់ នឹងត្រូវប្រកាសលទ្ធផលនៅថ្ងៃទី ២៥ ខែមិថុនា ឆ្នាំ២០១៣។
សវនាការដែលបានធ្វើឡើងអស់រយៈពេលបីថ្ងៃ ចាប់តាំងពីថ្ងៃទី១២ដល់ថ្ងៃទី១៤ ខែមិថុនា ចៅក្រមបានសាកសួរជនរងគ្រោះ ៣នាក់ និងសាក្សី២០នាក់ ប៉ុន្តែមិនមានវត្តមានលោក ឈូក បណ្ឌិត ដែលជាជនសង្ស័យ និងមេធាវីរបស់លោកឡើយ។
លោក ស ចន្ថា នាយផ្នែកព្រហ្មទណ្ឌ នគរបាលក្រុងបាវិត ដែលត្រូវបានសាលាដំបូងខេត្តស្វាយរៀង ដាក់ឲ្យស្ថិតនៅក្រោមការឃ្លាំមើលរបស់តុលាការដោយចោទប្រកាន់ពីបទ បង្ករបួសស្នាមដោយអចេតនា បានថ្លែងថា តាមស្តាប់សាក្សីដែលនិយាយនៅក្នុងសវនាការ មានសាក្សីខ្លះនិយាយពិត ហើយសាក្សីខ្លះនិយាយមិនពិត។
លោកបញ្ជាក់ថា៖ «ទោះបីជាតុលាការចោទប្រកាន់ខ្ញុំយ៉ាងណាក៏ដោយក៏ខ្ញុំនៅតែ ប្រកាន់ថា ខ្ញុំជាមនុស្សស្អាតស្អំពុំមានកំហុសដូចការចោទប្រកាន់នោះទេ»។
កាលពីម្សិលមិញ សាក្សីជាមន្ត្រីប៉ូលិស និងប៉េអឹមមួយចំនួន ក្នុងចំណោមសាក្សីជាង១០នាក់ បានឆើ្លយចោទប្រកាន់ទៅលើលោក ឈូក បណ្ឌិត ថា ជាអ្នកបាញ់កម្មការិនី ៣នាក់ ឲ្យរងរបួសនៅក្នុងបាតុកម្មនៅក្រុងបាវិត កាលពីថ្ងៃទី២០ ខែកុម្ភៈឆ្នាំ ២០១២។
លោក ឈូក បណ្ឌិត មិនដែលត្រូវបានចាប់ខ្លួនទេ បើទោះបីជាលោក ស ខេង រដ្ឋមន្ត្រីក្រសួងមហាផ្ទៃ ធ្លាប់បានថ្លែងថា អតីតអភិបាលក្រុងបាវិតរូបនេះ គឺជាជនសង្ស័យតែម្នាក់គត់ ដែលបានបាញ់កម្មករឲ្យរងរបួសនៅក្នុងការតវ៉ាមួយនៅក្រុងបាវិត កាលពីដើមឆ្នាំ ២០១២ ក្តី។ សំណុំរឿងរបស់លោក ឈូក បណ្ឌិត ត្រូវបានរុញចុះឡើងៗ នៅតុលាការខេត្តស្វាយរៀងជិតពេញមួយឆ្នាំ មុននឹងតុលាការដដែលនេះទម្លាក់ចោលមិនចាត់ការ។ ប៉ុន្តែបន្ទាប់ពីមានការរិះគន់យ៉ាងខ្លាំងពីមជ្ឈដ្ឋានជាច្រើន នៅថ្ងៃទី៤ ខែមីនា ឆ្នាំ ២០១៣ សាលាឧទ្ធរណ៍ បានលើកយកសំណុំរឿងនេះ មកបើកសវនាការ ហើយបានសម្រេចធ្វើការចោទប្រកាន់លោកឈូក បណ្ឌិត ពីបទបង្ករបួសស្នាមដោយអចេតនា ហើយបង្វិលសំណុំរឿងនេះ ទៅឲ្យតុលាការខេត្តស្វាយរៀង ចាត់នីតិវិធីដំណើរការក្តីជាថ្មីឡើងវិញ។
No comments:
Post a Comment
yes